[أ/رضا عطيه]

25ميدان التحرير
يوم هنعيش نفتكروا كتير
عايزين بقى نفتكروا بخير
ونعيش ونفرح بالتغيير



يابرادعى ياللى مولًّعها
كبًّر دماغك وسًّعها
كفاية العراق واللى عملته
دى مصر مش هتوقًّعها


شبابنا دا عاقل وكبير
ياللى فى ميدان التحرير
العالم بيتربص بينا
وشعبنا بقى وضعه خطير


عملتوا ثورة جميله بجد
شكل حضارى ماعملوش حد
بس فيه ناس بتقيد فى النار
وعايزه اللى عملتوه يتهد


مشاكلكم هتتحل قوام
ومفيش تانى مسئول هينام
ارحموا مصر دا ربنا نفسه
خلق الدنيا فى ست أيام


وقْفتْكم فى ميدان التحرير
خلًّت ناس يشْمتوا كتير
وناس لها مصالح خاصة
نطقت بعد ماكانوا صراصير


ثورتكم أهدافها قويًّه
عايزين عدالة وحرية
ولما دخل بينكم الأحزاب
قلبت بفوضى وهمجيًّة



أهالينا كلها مخنوقة
وفرحتنا صبحت مسروقة
ماتسمعوش من حد غريب
دى ناس دخيله ومذقوقه



دى خطة قعدوا ورسموها
عشان بلدنا يهدُّوها
شوفوا الجزيرة بتعمل إيه
بتساعد اللى بيدُّوها



قاعدين بيكبًّروا فى الحكايات
وكل يوم فتنة وإشاعات
ماتدِّهُمْش الفرصة كفاية
دا الميدان مليان كاميرات



صورتكم كانت ضوء أخضر
أشرف من العملا وأطْهر
بلاش تمشوا ورا الكدًّاب
اسمعوا لشيخ الأزهر



ياشبابنا ياضىِّ عنينا
العملا كِتْروا حوالينا
واقْفتْكُم فى ميدان التحرير
هتفرًّجوا الدنيا علينا




كفايه كدا خلِّيكوا واعين
فى عملا بينكم لناس تانْيين
هما اللى ولًّعوا فى الاقْسام
وسيِّبوا عليكم المساجين




حرًقوا فى مساكن ومزارع
دخلوا البيوت نازل طالع
علشان شرفنا وأهالينا
وقفْنا كلِّنا فى الشارع




ياشبابنا فكر واتْحرًّى
دول دخلوا وسْطِنا بالمرًّه
هيخرًّبوها علينا وهمًّا
ليهم فِلل وقصور برًّه





خلاص هنبدأ عهد جديد
ولاتوريث بقى ولاتجديد
سيبوا الحكومة تشوف أحوالنا
دا مفيش حد فى بيته سعيد









رسالة توثيقية لثورة أمة من إنسان بسيط ولكنه غريب الطباع - هذا قدره - ولكنه أولا وأخيرا - إنسان ومصرى --


بس خلاص