[مشتاقه لمصر]

ايه رأيك يا جماعه فى اقتراح بسيط
ممكن ندخل هنا ونعمل زى يوميات
بها عبره مثلا او شىء اتعلمته من موقف
او موقف توقفت امامه ويكون مواقف شخصيه او كنت مشاهد لها ونتناقش فيه بشكل مجرد
انا انهارده تعرضت لموقف احكى لكم عليه انا كل يوم باروح مدرستى لانها فى حى غير الحى بتاعى
فانا بركب لها تاكسى مخصوص والبديل امشى لمده 5 -7 دقايق تقريبا

علشان اركب من الموقف تاكسيات السيرفيس والزحمة والبهدله مقولكوش
فاسهل باخد تاكسى
لكن مره تذكرة كلمه لزوجى( ربنا يرجعه بالسلامه )قالى عايزة تستمتعى بالحياه وتشعرى بمنتهى الرضا
اقفى فى طابور عيش او اركبى تاكسى سيرفيس بس متكنيش محووجه له يعنى روحى وانتى عندك وقت
وانهارده فعلا قمت بالتجربه صحيت نزلت بدرى شويه ونزلت ورحت الموقف ولقيت زحمه بس للاسف بره الموقف مش جواه يعنى الناس بره الموقف خالص ويصطادو اى ركوبه .... وانا علشان جديده فى الموضوع روحت ودخلت الموقف وعمال لما يوصلنى تاكسى كنت مش اتأخر كنت اترفت ههههه
المهم تاملت الناس وكأنى اعرفهم وجال بخاطرى اشياء كثييييييير وخلال ذلك التزمت الاستغفار لله بتكرار وقبل انا اخذ قرار انى اخرج من الموقف علشان اخود تاكسى مخصوص علشان متاخرش فجأه
اذ بتاكسى يشق الناس من خارج الموقف ولا يقف لااحد ويقف جانبى مباشرة واركب جانب السائق والناس مستغربه وبتقوله ليه موقفتش عند الناس اللى بره وركبت الناس يا جدو رد عليهم السواق وقلهم الموقف هنا وهما عملو الموقف علشان تقف في مش بره والناس اللى جوه اللى واقفين من ساعه ميلقوش حد يوصلهم مع انهم ملتزمين وواقفين فى الموقف

بصراحه كلام السواق عجبنى مع انه فى بعض الحده بس انبسط مش علشان ركبت ابدا والله علشان لسه فى ناس بتحافظ على النظام رغم الفوضى وطوال الطريق افكر فيما قابلته ويقاطعنى صوت السائق الذى يرد بحده على الركاب وتناولت الاجره من محفظتى واعطيتها له وكان معى
ثمرة يوسفى فى حقيبتى كنت وضعتها لاكلها فى المدرسه فتناولتها ووضعتها جانب السائق وقلت له اتفضل فابتسم ابتسامه مقتضبه مش باينه يعنى
السواق كبير السن وشعره ابيض ويظهر عليه الحزم
واشرت له بالوقوف لانزل فرد عليه قائلا بلطف انتظرى نوصلك والله فشكرته

تعلمت من حوالى نصف ساعه الاتى
الاستغفار فانا اعلم تمام فضل الاستغفاروهو السبب الاساسى فى تسهيل ركوب التاكسى رغم الزحمه المفرطه
ان نحاول جادين الحفاظ على النظام برغم كل فوضى فربما ينتفع منتظم وجاد من ذلك ويمكن يتعلم الناس من كده شيئا فشيئا
التعامل مع الناس برفق وادب مهما كان يظهر منهم من حده
واخير انا صدقت زوجى وفعلا استمتعت جد جد جد بيومى انهارده وشعرت برضى غير عادى وقررت احكى لكم الموقف ده