[دمعه ملاك]

بسم الله الرحمن الرحيم

انا طالبه ثانويه ازهريه شهاده .. مش هقول انا عندى نفس المشكله ده شىء طبيعى عند كل الشهاده الثانويه الازهريه بالذات ..بس ازاى تستغلى وقتك وتتغلبى على الموقف هو ده الحل .. لكن التوتر ده شىء طبيعى جدا جدا فى الفتره دى ... انا هقولك طريقه وجربى .. هى الطريقه دى معايا كويسه اوى اتمنى تساعدك

ــــــــــــــــــــــــــــــــــــــــــ

احنا كأزهر علشان نجيب مجموع لازم نركز على تلات حاجات مهمه مواد شرعيه مواد عربيه قرآن
المواد دى بإيديها ترفعنا فوق وبايديها برده تدمر مجموعك علشان كده لما تذاكريها اعرفى كويس انك بتذاكرى فى منطقه حساسه جدا يعنى مش هقولك تسيبى سؤال لا مش تسيبى نقطه او كلمه اقل حاجه مش تسيبيها

ـــــــــــــــــــــــــــــــــ

ازاى نذاكر

طيب انتى بتقولى بتفكرى كتير طيب نعمل ايه انا هقولك ...طبعا انا بالنسبه لى يوم بخلص دروس الساعه 6 ويوم بخلص الساعه 9 anyway تنامى 6 ساعات بعد الدروس واوعى تذاكرى بعد الدروس حاجه لانك هتنسيها بسرعه رهيبه لان فى الوقت ده بنبقى مش قادرين نفهم حاجه او نستوعب حاجه وعلى فكره ارادتك هى اللى هتصحيكى قوى ارادتك كويس .. طيب اوك صحيتى تمام
طبعا ممنوع منعا باتا تذاكرى على السرير او اى مكان ممكن يسمحلك انك تنامى مره تانيه ممكن تذاكرى على مكتب ...طيب اوك فى اليوم اللى هنرجع من الدروس 6 هنصحى الساعه 12 او 1 اول حاجه تصلى ركعتين وبعدين تشربى كوبايه لبن او نسكافيه كبيره او عصير اللى تحبيه وبعدين تبدأى تسألى نفسك انا ناقصنى ايه عاوزه اذاكر ايه وتنسى الامتحانات خالص وتبدأى فى المذاكره واحده واحده ولازم لما تخلصى اى حاجه تحلى عليها اسئله هى دى اللى هتخلي المعلومه تثبت ومش تنسيها بسهوله .ويا ريت لو تعملى كشكول للاسئله اللى هتحليها بنفسك الكتابه نفسها هتساعدك كتير ...

ــــــــــــــــــــــــــــــــــــــــــــ

ممكن تاخدى ريست كل ساعتين ربع ساعه تستريحى فيها بس برده اوعى تدخلى على السرير تنامى لانك هتزودى عن الربع ساعه صدقينى عن تجربه منى ...وبعدين تكملى

زى ما قولتلك تركزى على المواد العربيه والشرعيه والقرآن والمواد دى محتاجه دايما للتكرار يعنى مش تذاكرى بس للدرس او كده لا تراجعى مره واتنين عليها حتى لو حافظاها صم راجعيها تانى هتاخد وقت قليل وهتساعدك كتير بعدين

ــــــــــــــــــــــــــــــــــــــــــــــــ

باقى المواد زى ما انتى عارفه لو فاهمه الدرس هتذاكريه بسهوله والفيزيا والرياضه محتاجه تحلى كتير اوى
وبصراحه الرياضه عامله مشكله معايا لانها كبيره بس انا بحاول اتغلب على المشكله دى بأنى بسيب لها ساعه كل يوم بحل فيها مسائل

اتمنى كلامى يساعدك