[ماهر درويش]

وزير عبيط ووزير غبي

ياوزير عبيط ووزير غبي
مقدرش يفهم مطلبي
انا ماعتصمتش علشان فلوس
افهم علشان خاطر النبي
انا نفسي اغير في الأخلاق
وانقل شبرا جوة بولاق
واخلي العتبة ويا القللي
تسكن روكسي و الوراق
عايز اربي قبل ما اعلم
ويطلع ابني اكيد متعلم
عارف كل تاريخ اجداده
تاريخ مظبوط مش مترمم
يعرف مين عبد الناصر
صاحب السد و الأمجاد
مين الل يرجع لينا قناتنا
وخلى الكل من الأسياد
يعرف مين صاحب النصر
مين اللي خد قرار العبور
مين اللي فعلاً رفع الراية
مش تاريخ بهتان وزور
عايز ارجع رائد تاني
وسط اخواتي ووسط جراني
وكلمة مصر تكون مسموعة
برة وجوة برضا وسرور
ياوزير يانايم في العسل
عهد المهانة معاك وصل
حوافز وكادر وكام امتحان
بقيت بيضربوا بية المثل
ياراجل امشي خليك جرئ
ضيعت كل نتايج الفريق
وكمان بتحلف انك برئ
كداب يا خيشة وكلك فشل
وزارتك دي ماتت من زمان
من يوم ما عملت لية امتحان
خلتني فرجة لكل الناس
غبي و عبيط وآخر هبل
لو راجل قدم استقالتك
هقبلها فوراً وابعت لخالتك
ارجوك خلصني من رزالتك
هنكسر وراك مستودع قلل
احنا عارفينك من زمان
من ايام الحزب الوطني
فاكر لجنة السياسات
ونفسك تاخد زمنك وزمني
انا يامعلم خلاص صحيت
دانا ياما نمت واتغطيت
نفسي اشوف شروق الشمس
خلاص زهقت وكفاية ملل
ياوزير وزارتك عار عليك
تافهة وخايبة و البركة فيك
رضيت الخواجة يحطلنا المناهج
و لو سألتك تنكر يا بيك
احنا محدش واصي علينا
احنا قرارنا من دماغنا
تحلف يا فندي انك حقيقي
سيد قرارك من غير شريك
بلاش يا بيه تحلف حرام
الوزارة مش دايمة لحد
لوهتدوم دامت لغيرك
يا ما حلفوا زيك تمام
والنتيجة غاروا في داهية
وياما قالوا نفس الكلام
خدها نصيحة مني وروح
سيبنا وروح ربي عيالك
هم اولي منا بجنابك
يارب اكفيهم شر المهالك
ومتسبي اي ذكرى وراك
صورك وفكرك وكل ما لك
ارحمنا من الطلعة البهية
سيبنا يا عم مش عايزينك
انا لو مكانك كنت امشي
واحنا نولع وانت مالك.....؟!