اجازات المعلم المعين حديثا في 1/7/2011
بعد ما طلع جواب التعيين بتاع اللي دخلو امتحان الكادر في 1/4/2011 واتعينو بناء علي القرار 244 بتاريخ 27/6/2011 وعرفت ان اجازات اللي هتطبق علينا هيا 30 يوم بما اني بقيت معلم وعلشان التعيين في شهر 6 فقالو هيدوني اجازات 15 يوم بس يعني نسبة وتناسب علشان انا اتعينت في النص الثاني من السنة ومن اول السنه الجديدة هاخذ 30 يوم كاملين اتفجئت ان الادارة بعته للمدرسة بتقولهم اللي اتعينو جداد في 1/7/2011 ملهمش اجازات لمده 6 شهور لانهم معينين حديث وتحت الاختبار لمده 6 شهور كاملين واي يوم غياب سواء عارضة او اعتيادي اني انا وزمايلي هنتحول للتحقيق ، فقولتلهم الكلام ده مش صح ازاي تحطوني تحت الاختبار لمده 6 شهور وانا كنت معلم مساعد تحت الاختبار لمه 3 سنين ونجحت في اختبار الكادر وبقيت معلم ازاي ارجع ثاني تحت الاختبار لمده 6 شهور . ولما سئلت ولفيت الادارة والمديرية ، قالو لي الاتي ( يا ابني انتو ملكمش دعوي بالكلام ده انتو كنتو تحت الاختبار في وظيفة معلم مساعد والكلام ميطبقش عليكم ده يطبق علي الناس القديمة اللي كانت بتتعين وهيا قاعده في البيت وتنزل علي المدرسه دول بيقعدو 6 شهور تحت الاختبار لكن انتم مختلفين ، رجعت المدرسه وقولت الكلام ده محدش صدقني ، قالولي روح الادارة واسئل ثاني ، رحت الادارة وقولت الكلام ده ، قالولي يا بني كلام مش صح انتا و 97 معلم اتعينو في الادارة جداد محرومين من الاجازة لمدة 6 شهور ، عارفين عملت ايه رحت الجهاز المركزي للتنظيم والادارة وقدمت شكوي وكتب فيها اني كنت معلم مساعد من تاريخ 5/10/2008 لمدة سنتين واتجدد لمده سنه اخري بامر من الوزير وبعد كده دخلت اختبار الكادر ونجحت وتم تعييني في 1/7/2011 ، عارفين ردو عليا وقالولي ايه التالي بالنص :
( هناك منشور صادر من وزارة التربية والتعليم ومعمم علي مديريات التربية والتعليم بتاريخ 9/5/2011 بشان المعامله المالية والوظيفية للمعينين حديثا 2011 وينص علي الاتي :
1- كلام كتييييير .
2- كلام كتييييير .
3- ودي المهمة بقا ( لا يجوز وضع المعلم المعين حديثا تحت الاختبار حيث انه قد خضع لفترة الاختبار وتم اجتيازها بنجاحه في اختبار الكادر ويحق له الاجازات العارضه والاعتيادي المستحقة وتكون نسبه وتناسب علي حسب تاريخ التعيين ) يعني انا اتعينت في شهر سته وانا ليا 30 يوم في السنه يعني هاخذ 15 يوم من تاريخ التعيين .
رحت يمين وشمال بالكلام ده من ادارة لادارة ومن مديرية لمديرية محدش راضي يديني صورة من المنشور ده ولا حد عايز يبعت فاكس علشان نعرف راسنا من رجلينا ، اللي هيجنني ان في زمايل ليا في ادارات غيري بيخدو اجازتهم فعلا طبقا للمنشور ده ، وانا بتعامل مع 97 معلم معين حديثا علي قانون قديم .
ياريت لو حد معاه المنشور ده او يعرف ممكن الاقيه فين يقولي ويرحمني انا وزمايلي من البقر اللي في الادارة ، ويلحقني قبل ما اصور قتيل وأبدا حياتي كمعلم في السجن علي درجه سلم بدل درجه ثالثه واخذ الحوافز علي قفاية .
|