[بحر_الامل]

السلام عليكم جميعا

اولا : انا رايح تانية ثانوى عام علمى ان شاء الله

عندى مشكلة يمكن تكون بسيطة بس محيرانى شوية

اول حاجة : طبعا اول حاجة بيعملها طالب ثانوى عام و اى طالب انه يختار المدرسين بتوعه ، و انا الحمد لله اخترتهم كلهم بس صراحة مش واثق فى كفائتهم ثقة تامة بس قلت يلا مش مشكلة ان شاء الله هعوض اللى ينقصنى منهم بمجهود منى و لكل مجتهد نصيب

المهم انا دايما بعتمد على كتب خارجى فى الشرح و الدراسة و كدة يعنى عشان موثوق بها و كدة ، و بالاخص كنت بعتمد فى اولى ثانوى بالاخص على كتاب الامتحان فى الكيمياء و على شرحه و الحمد لله كنت بذاكره كويس و جبت 19.8 من 20 فى اولى ثانوى ( مش ده موضوعنا ) ، المهم هنا المشكلة بقى انى اتفاجئت فى تانية ان معظم الكتب اسئلة بس و امتحانات بالاخص كتاب الامتحان بتاع الكيمياء اللى كنت بعتمد على اسلوب شرحه و كنت متعايش معاه مفيش منه كتاب شرح السنة دى !!!!!!!!!!!

انا حاليا جبت كتاب
المعاصر رياضة و فرنساوى
و الامتحان اسئلة فى العربى و الكيمياء

فتنصحونى بايه بخصوص كتاب الكيمياء و باقى الكتب لو فى نصيحة بخصوصها ، و انا سمعت برضه و قريت من اغلب اللى هنا ان الاعتماد فى المذاكرة يكون على كتاب الوزارة و الحل يكون منه برضه و من دليل التقويم بس ، بس على حد علمى فى السنين الماضية كتاب المدرسة كان بيبقى مختصر جدا فى شرحه و وجوده زى قلته فيا ترى فى سنة مهمة زى دى هيبقى ليه لزمة ؟؟ و يا ترى فعلا الامتحانات مبتخرجش منه ؟؟

تانى حاجة
انا مقتنع ان المدرس مش مهم اوى و المهم مجهود الطالب فهل توافقونى فى هذا الامر ؟؟؟؟

تالت حاجة
انا اخترت كل المدرسين ( و يا رب يكون اختيار صائب ) ما عدا مدرس الكيمياء محتار بين اتنين واحد ممتاز جدا بس عيبه ان عدد مجموعته كبيرة تصل 20 طالب احيانا !!! و طبعا العدد ده مينفعش فى ثانوية
و التانى عدده قليل بس مش فى نفس كفاءة الاول
فبماذا تنصحونى ؟؟؟ مع العلم انى صليت صلاة الاستخارة بخصوص الامر ده بس لسة برضه محتار مع اننى مرتاح نفسيا لانى تووكلت على الله و اكيد ربنا مش هيضيعنى ابدا طالما انا توكلت عليه و استعنت بيه

رابع حاجة
عدد الطلاب فى الدروس بتاعتى بيصل ل 10 كحد اقصى فهل ترون هذا العدد مناسب ؟ ام يجب على تقليله ان امكننى هذا مع المدرسين ؟ و هل ترون ان هذا العدد يؤثر على مستوى تقدمى ؟؟؟

اخر حاجة
يا ريت بقة ( معلش تقلت عليكم ) لو حد من اصحاب الخبرات فى الثانوية يدينى نصائح عامة بخصوص اختيار المدرس بشكل عام و بخصوص الثانوية ككل مع العلم انى مستعد باذن الله اجتهد باقصى مايمكننى و لو هذاكر اليوم كله بس المشكلة عندى فى اللى هذاكره و اللى هعتمد عليه يكون غلط مثلا ( زى ملزمة مدرس مثلا مش كاملة و فيها حاجات ناقصة من المنهج و كدة ) فيا ريت تنصحونى بخصوص الامر ده ؟


اخيرا معذرة لانى طولت عليكم بس بجد الحاجات التافهة دى من وجهة نظر الكثير تشكل عائق كبير امامى و انا موقن انه يجب على تحطيمه باسرع وقت حتى اتفرغ للثانوية بحق مع العلم ايضا انى بدأت كل الدروس حتى الكيمياء جرب المدرسين بنفسى و زى ما قلتلكم واحد ممتاز و عدده كبير و التانى اقل امتيازا و عدده صغير ..

شكرا مقدما لكل من سيجيب و اعتذر عن الاطالة