[حميد بدوى]

احنا اسفين ياريس

بجد اسفين

طول عمرك ياريس
رمز رمز للفاسدين
وقبلة المنافقين
احنا اسفين ياريس
علشان اصطبرنا سنين وسنين
وللاسف لسه لحد الان صابرين

تلاتين سنة واحنا فى ايد سيادتك
حتة عجين
بتشيل وتحط فينا ولا عمرك قلت
دول بنى ادمين
ولا عمرك فكرت تصنع وتنتج وتزرع
غير المنافقين
بيقولوا انك صاحب الطلعة الجوية
وانا بقول انك صاحب الطلعتين
بيقولوا انك حاربت الاسرائيلين
وانا شايف انك طول عمرك بتحاربنا احنا
واسال السنين؟
ياريس تقدر تقولى وديت مصر فين؟؟؟؟

احنا اسفين يا مصر
على اللى ضاع من عمرنا
احنا اسفين يا مصر
وحقك علينا كلنا
احنا اسفين
يا مصر
الذنب مش ذنب حد
الذنب ذنبنا كلنا
ولازم النهاردة نخدوا حقك وحقنا

انت بصراحة

بهدلتنا وقهرتنا فى قعر بطننا

وكسرت نفسنا اوعى حد يفكر ان الثورة دى

من عند الشعب الثورة دى من عند ربنا

وف اخرتها جاى ممدد على السرير

اقولك اية بس ربك كبير

الشاعر
عبد الحميد بدوى