بص هاتلاقي كتير فحت .. بس اللى انا شايفه مناسب لاي شخص بيدرس في كلية تجارة هوا تلات حاجات
لغــة .. كمبيوتر .. كورسات محاسبة متخصصة
بالنسبة للغة انا مش محتاج اقولك ادرس انجليش .. لان الانجليش دا لازم يكون اساسي عندك
ومش انجليش بتاع 'i go to school every morning !!
لا لازم تكون بتتكلم والنطق يكون صح ومافيش اي اخطاء في الجرامر .. الخ الخ الخ
انا اقصد باللغة انك يكون عندك لغة تالته غير العربي والانجليش
لان انا لما خلصت الكلية اهو الحمدلله لاقيت ان كتير من الناس معاها انجليش
اي نعم اه فيه فوارق مستويات بين واحد والتانى .. يعنى تلاقي واحد تمام اوي وبيتكلم ميه ميه
والتانى نص نص والتالت بينطق غلط والرابع ماتفهمش كلامه اصلا !
بس هاتلاقي نفسك مش مميز .. ايه يعنى انجليش ؟! طوز ما فيه ناس كتير بتتكلم زيك
لكن لما مثلا تحط جنب الانجليش اسبانيش ولا فرينش كدا ساعتها تقدر تقول اه انا مميز شوية
حتى شكل السي في يبقى كويس كدا وانت حاطط 3 لغات
وماتأنتخش وتقول انا عايز اريح .. اللغة بتاخد وقت في التعلم والممارسة فابتدي من دلوقتى
وماتسمعش كلام الفتايين اللى بيفتو في اي بتنجان وخلاص
بالنسبة للكمبيوتر .. فانتا هاتركز على حاجتين
الاي سي دي ال .. ودي اجبارية عليك فلازم هاتاخدها ان شاء الله
الحاجة التانية فيه سكتين .. اما انك تاخد كورسات داتا بيز في المحاسبة زي الاوراكل بس هاتكعلك كام الف كدا
او انك تاخد شهادة mos من مايكروسوفت ..
كلمة mos اختصار لـ microsoft office specialist ودي شهادة مش مشهورة شويتين على النت
ومش هاتلاقي معلومات عنها اوي في المواقع العربى بس جامدة جدا ..
يكفى ان هايبقى اسمك expert في التعامل مع تطبيقات الاوفيس .. يعنى الاوفيس دا لعبتك
وفي بعض الشركات بتطلب الحاجات دي زي فودافون مثلا
انا مرة كنت مقدم في تريننج في فودافون ووانا بملى الابليكيشن لاقيتهم طالبين حاجات زي دي
اما بالنسبة بقى لكورسات المحاسبة المتخصصة فاعتقد ان مش وقتها دلوقتى خالص
لان انت لسه ابيـــض .. ماتعرفش اي حااااجة عن المحاسبة
فانا مش هاقولك تبتدي فيها امتى .. بس مش قبل سنة تانية عشان تبتدي تفكر انك تاخد حاجة فيها
الكلام اللى بقولهولك دا خلاصة الخلاصة .. عايز تاخد بيه كان بها ..
مش عايز دايما افتكر المقولة اللى بتقول اللى بينفع بينفع نفسه
وسبحان الله الكلمة دا يااااما اتقالتلى ودلوقتى بكتشف قيمتها لما ابتديت اواجه سوق العمل