[aleman]

المشاركة الأصلية كتبت بواسطة loooly el treikawya

زمان وانا صغيرة قبل ما نعزل ((لاء دى مش حدوتة ))
المهم كانت فيه واحدة بتقعد تحت البيت ((شحاتة)) صوتها يعنى رغم اننا فى الدور القبل الأخير الا انها كانت بتصحينى بدل المنبه

كانت مشهورة طبعا فى المنطقة وبتثير تعاطف البعض بس انا عن نفسى كنت بخاف منها

بس كان كتير بيديها

فى مرة ماما شافتها من البلاكونة وقفت قدامها عربية آخر شياكة ونزلت منها واحدة بتقوللها (( يا ولية حرام عليكِ مش مكفيكى التلت عمارات اللى عندك انتى مبتحرميش انا هقول لابنك وهو يتصرف معاكِ ))

الشحاتة طلعت اغنى مننا
ومن ساعتها افتقدت حد يصحينى الصبح خايفة

ودة كان موقف

وكان فى نفس المكان قدام المدرسة شحاتة تقول للبنات يا رب اللى مش تدينى تسقط

دة كان موقف تانى

وعلى مستوى المحافظة بقى كان فيه شحاتة مشهورة مش كبيرة فى السن كانت بتحط حديد او حاجة كدة فى رجليها قال يعنى مشلولة

كانت بتعصب عليا كتير

بنت عمى شافتها وهى جاية بتقسم فلوس مع حد تانى فاخد كتير فقامت جريت وراه

ودة كان موقف تالت


لما عزلنا بقى كان فيه شحات هنا بييجى صحته حديد

مكناش نعرف انه شحات بس فوجئنا انه جاى يشحت

ودة الموقف الــ ((تعبت من العد ))

وواحد بقى فكراه يخلى الواحد يعيط من شكله ((دة بس لانى كنت طفلة ومش فاهمة))
ماشى ومعلق كيس دم فى ايده وبيشحت لاء بيزعق كمان والناس كلها تجرى وتطلع كل اللى فى جيبها وتديله ((شعب طيب))
والغريبة ان الراجل كان بيتكرر انه ينزل يشحت مش مرة وعدت
يا عم احمد ربنا غيرك مش لاقى كيس الدم دة وتقريبا انا بسمع ان المستشفيات الحكومى موصلتش لدرجة انها تسرح العيانين للتبرع

واللى بيكشف رجله عشان متعورة

واللى بينيم اطفال على رجله

وانا كنت سمعت شيخ قبل كدة قال ان اللى يظهر اعاقة او عيب فيه عشان يثير اشمئزاز وتعاطف الناس ويدوه فلوس دة كأنه بيشكى ربنا للناس


وعلى صعيد آخر

اعرف عندنا هنا تلت اشخاص عندهم نفس الاعاقة فى الرجلين ((اللى هو بيبقى عنده رجل قصيرة اوووى كأنها مش موجودة والتانية طويلة بس ضعيفة))

المهم الأول: قاعد على كرسى بيبيع مناديل

التانى: مكنش عنده الكرسى بس كان بيسعى وبيذكر الله وعنده عزة نفس غير عادية وانا سبق وكتبت عنه لانه اكتر شخصية اثرت فيا بجد لو حبيته تعرفو التفاصيل هتلاقوها هنا

التالت: بيشحت ومبين رجله طبعا ....

مرة كنت راكبة الاتوبيس قعدت جمب طفل كان شكله هزيل وصغير فاتكلمت معاه
اسمك اى .. انت بتشتغل؟ قاللى اه عندك كام سنة؟ 14 ودى صدمتنى شكله لا يتعدى الـ 8 سنين طيب انت دلوقتى مروح بيتكم لاء انا رايح اشترى طلبات للورشة وراجع
طب انت طبعا مبتروحش المدرسة آه مبروحش
بتشتغل قد اى ؟ من 10 الصبح للفجر وبنام فى الورشة
متخيلين مدى المعاناة .. انا حقيقى مكنتش عارفة ازاى اعرض عليه اديله فلوس من عزة نفسه .. بس دة طبعا أولى بالمساعدة


الموقف الأخير بقى بس دة اخطرهم لو كان ظنى صحيح والمشكلة مش مجرد شحاتة

من كام شهر وانا راجعة من الدرس صحبتى دخلت مطعم تجيبلنا أكل وانا كنت مستنياها برة

لفت نظرى قدامى عربية جميلة اوى بس مش دة اللى لفت نظرى بل الست اللى كانت جوا هى اللى لفتت نظرى لان شكلها كان يدل على انها من طبقة متدنية يعنى كانت بالجلابية والاشرب وشكلها اللى هو من الناس اللى مبحبش احتك بيهم من الفاظهم

يعنى من الآخر شكلها معلمة

فاستغربت يعنى انها تكون فى العربية دى

وانا بفكر كدة لقيت ولد صغير هدومه مقطعة ومش نضيفة بيطلع فكة من جيبه وبيديها للست دى

اوبااا

لالا

اكيد انا شايفة غلط

يمكن هى اللى بتديله الفلوس

الولد وقع منه جنيه ميل على الارض واداهولها بس اخد ربع جنيه اشترى رغيف فينو اكله قدامى

طيب هى لى الست دى شكلها مبسوط تاخد من الولد اللى شكله شحات بدل ما تديله

ركزت بقى معاهم
الولد راح للعربية اللى قدامها اللى مكنتش واخدة بالى منها فى الاول

كانت بردو بنفس المستوى وفيها رجالة لابسين جلاليب

ومعرفش الولد قاللهم اى بس هو واحد خرج وعمل حاجة اثبتلى انه مش كويس سورى مش هقول عمل اى

وانا مركزة كدة لقيت الست فى العربية اللى ورا بصالى بصة انا قلت اعمل عبيطة ومش واخدة بالى من حاجة

وصحبتى خرجت ولسة جاية احكيلها لقيتها بتقوللى ان الست دى بصيتلها بطريقة غريبة

ما علينا بغض النظر عن انى روحت خايفة ساعتها وعمالة ابص ورايا كل شوية


انا كنت عاوزة اتكلم عن الشحاتة عموما

أين الذين (يحسبهم الجاهل أغنياء من التعفف، تعرفهم بسيماهم لا يسئلون الناس إلحافاً).

موجودين

وهم دول اللى يجب اننا نديهم

يعنى انا مبقولش متدوش بس بجد بيصعب عليا اوووى ان ناس نصابة تاخد فلوس
وناس محتاجة فعلا وعندها عزة نفس متلاقيش حتى نظرة احترام

يا ريت يا جماعة وكويس ان التوبيك صدف فى الشهر دة لما نطلع فلوس نبقى حريصين انها تروح للى فعلا محتاجها

انتو فى الحالتين هتاخدو الثواب فعلا .. لكن احنا عاوزين نساعد المجتمع مش نساعد على آفة فيه اللى دلوقتى البعض بيتتفنن ازاى يشحت

دة كان موضوع كتير بيدايقنى وحبيت انى اتكلم فيه

ويا ريت نكون من الذين ينفقوا مما يحبون حتى ننال البر والذين يؤثرون على انفسهم ولو كان بهم خصاصة

بس يا ريت للى يستاهل فعلا

انتو اى رأيكو بقى؟؟

بالمناسبة صحيح المواقف اللى قلتها كلها حصلت بس هى كتيرة لانى كنت بتذكر من وانا عندى اربع سنين ومع ذلك دة مش كل اللى اتذكرته

والسلام عليكم

موضوع جميل جدا
فعلا
من كثرة من يطلبون المساعدة الايام دى
اصبح الواحد ممكن يساعد واحد مش محتاج وييجى على المحتاج يطنشوا ويظن انه مش محتاج
وناهيكى عن الافلام العربية المصرية اللى وجهت انظار الناس لاحتراف الشحاته كمهنة

انا من رأيى حتى لانساعدهم على ذلك ونهدر حق المحتاجين فعلا
ان نحن نضع الصدقات او التبرعات بالجوامع
كما نعطيها للاقربين الفقراء ولمعارفهم وجيرانهم اللى فعلا يتم التأكد من صدق فقرهم وحاجاتهم الماسه للاموال

وختاما اذكر موقف حدث معى شخصيا
بس مش شحاته وانما عاملة باحدى المدارس اللى اشتغلت بيها
بنتها هتتزوج فوالدتى اعطتنى 100ج ليها كمساعدة
بعد فرح بنتها عرفت بالصدفة انها اجرت بيهم فستان سهرة وطبعا مكياج وكده
ام العروسة بقى
من يومها وانا بسأل هل ربنا هيحسبنا انا وأمى على اللى حصل ده ام هيحاسبنا بنيتنا اننا كنا عاوزين نساعدها؟!

مشكورة للموضوع