بُص أنا كنت دايماً بعتمد في مذاكرتي علي وجود كشاكيل ومذكرات جنبي، أي سؤال جديد أو حلو أقابله لازم بدونه، دايماً دايماً دايماً بكتب ملاحظاتي علي الأسئلة وأكتب أفكارها وأرجعها من وقت للتاني علشان علشان مانساش،كنت بكتب تعليقاتي بأسلوب عامي دمه خفيف علشان يثبت المعلومة أكتر،
لازم إللي بيذاكر يبقي ليه بصمة علي كتبه..لازم يبقي معاك ماركر وأقلام ألوان عشان تريح العين..لازم حل إمتحانات السنين الفاتت لإنها فيها تدريبات كتاب لمدرسة وأسئلته مع أسئلة النماذج ولكن بصيغة الإمتحانات اللي هتشوفها السنادي إن شاء الله
أنا الحمدلله مخلص كشاكيل وورق كتير جدا جدا السنادي علي الحل الفردي بتاعي غير شغلي مع المستر وكده، بحس إني بثبت إللي فهمته أكتر وبحل السؤال إللي وقفت قدامه أكتر من مرة مش مجرد الإكتفاء بإنك عرفت المعلومة وخلاص..آخر حاجة لازم كل الناس تبدأ السنة بقوة جامدة جداً وتحاول تخفف الحمل بتاع آخر السنة .. والله كل يوم بيضيع من غير فايدة حقيقية من أول السنة هتحس بيه آخر السنة وتندم عليه
|