اقتباس:
المشاركة الأصلية كتبت بواسطة hazenhazen
ياريت اى حد فى تجارة انجلش يدخل يقولى
اول سنه الكلية بتبقي عاملة ازاى والمناهج سهلة ولا صعبة عشان انا خايفة اوى والدراسة بالانجليزى سهلة ولا اية عشان انا مش قوية اوى فى الانجليزى وازاى هاخد على الكلية
|
]
دة اقتباس من موضوع انا كنت كتبتة زمان
بالنسبة للدراسة هتبقى كلها بالانجلش فا محدش يتخض لما الدكاترة يدخلوا اول محاضرة ومينطقوش ولا كلمة عربى والموضوع دة مش صعب لانك بعد فترة قصيرة هتتعود علية
بالنسبة للمواد هيبقى عندنا خمس مواد ترم اول وخمس ترم تانى وهى اغلبها مواد نظرية باستثناء الرياضة(Math) والمحاسبة (Accounting) فيما عادا ذلك مواد نظرية زى الادراة (Managment) او الاقتصاد (Economic) وغيرهم طبعا
نظام الامتحانات عندنا حاجة اسمها امتحانات الميد تيرم ودى بتبقى بعد الدراسة بحوالى شهر ونص وبيبقى عليها ثلاث درجات فى المادة الواحدة كمان عندنا اعمال سنة ثلاث درجات لكل مادة ودى الدكتور بيديها على الحضور والمشاركة وامتحانات الكويز واحيانا الواجب (Assignment) واحيانا بمزاج الدكتور وفى اخر الترم بيبقى امتحان الفاينال وعلية 14 درجة عشان يبقى المجموع فى كل مادة من عشرين
بالنسبة للكتب هتبقى كلها جاية من امريكا والمؤلفين كلهم اجانب وعلى الرغم من ان الكتب تقيلة قوى و هتتعبكو وانتو مروحين بيها بس بجد كتب نضيفة واسلوبها جميل
اتمنى انى اكون افدتكم وادتكم خلفية عن الكلية ولو بسيطة
طبعا الكلام دة كلة يخص تجارة انجلش القاهرة بس
الكلية مش صعبة ولا حاجة وانا عن نفسى مكنتش شاطر فى الانجليزى وكنت فى مدارس عربى واغلب زمايلى زيي والموضوع مكنش صعب ولا حاجة وبعد فترة قصيرة اتعودنا على اللغة وعلى فكرة مش كل الدكاترة بيتكلمو انجليزى فى المحاضرات يعنى فى كدة وفى كدة
فا محدش يقلق وبالتوفيق للجميع