بسم الله الرحمن الرحيم
السلام عليكم و رحمة الله و بركاته
الجواب باين من عنوانه
أنهي جامعة أفضل في كلية العلوم من التلات جامعات دول و ضيف عليهم المنصورة كمان أو أي جامعة قريبة من القاهرة؟
خاصة في أقسام الفيزياء و الرياضة البحتة
و أنا قصدي يعني من حيث عقلية الدكاترة مجرد دكتور حافظ كلمتين و بيسمعهم ولا ناس فاهمة المادة كويس جداً و عايزة توصلها لك و تخليك فاهم كل حاجة و تشجعك على التفكير؟
و الدكاترة ذات نفسهم من الناحية العلمية عندهم علم واسع ولا للأسف عشان مالقوش التشجيع الكافي فبطلوا يشوفوا فيه إيه جديد؟
و بالنسبة للمعامل برضو و مدى جهازيتها؟
و بالنسبة للإدارة و المواعيد و يا ترى فيه أي جامعة من دول ماشية بنظام الساعات؟
و نظام الساعات يتيح لي إني أختصر فآخد مواد أكتر في عدد أقل من السنين ( و ده طبعاً تبعاً للفرض الخيالي إني أقدر على كده ) ؟
و ينفع الواحد ياخد مواد زيادة؟ يعني مثلاً رياضة بحتة كلها و فيزياء كلها و كيمياء كلها؟التلاتة مع بعض؟
و يا ترى صوت الطلبة مسموع؟
و فيه تعاون بين الجامعات دي أو مسابقات ما بينها أو تبادل أو أي حاجة في أي حاجة؟
و يا ترى رياضة بحتة أقوى في علوم ولا هندسة؟
و الفيزياء إيه الفروع اللي بتدرسوها فيها؟
أرجو إن الكل يرد عليا أي حد عنده أي معلومة مهما كانت تبدو تافهة هي ممكن تبقى مهمة أوي بالنسبة لي
و يا ريت كمان الطلبة اللي في علوم في الجامعات دي مايبخلوش بخبراتهم و يقولوا لي يا ترى لقى اللي كانوا بيدوروا عليه في كلية علوم؟ و يحكوا عن تجارب شخصية ليهم مع الدكاترة و الطلبة
و ياريت كل طالب في كلية علوم في كل جامعة يقول نظام جامعته إيه من حيث نظام الساعات المعتمدة ولا معرفش اسمه إيه و اختيار الأقسام
آسف إني طولت
السلام عليكم و رحمة الله و بركاته