كلام أحلام .... كلام أوهام .... مقدرش أقول انه هيتحقق أبداً ( دي كانت أغنية لليلي مراد وتم تحريفها بعد ذلك إلي الأغنية الموجودة )
دا حصل فين الكلام دا يا أمجد ؟ في أي مكان وفي أي زمان ؟!
أنا ممكن أعمل زي باقي الاعضاء ( وزي أغنية ليلي مراد بعد التحريف ) وأقولك كلام جميل ... كلام معقول ... مقدرش أقول حاجة عنه .
لكن يا ريت نسيبنا من شعار ( كل واحد يبدأ بنفسه ويغيرها للأحسن )
يا أمجد كل واحد شايف نفسه هو الصح . يبقي ازاي يغير من نفسه ؟!
أتحدي أي واحدة انها تقول علي نفسها انها بنت قليلة الأدب , مش متربية كويس , معندهاش أخلاق ولا قيم ولا مباديء . أتحدي أي واحدة تقول علي بنتها الكلام دا ! أتحدي أي واحد يقول علي بنته أو أخته أو زوجته الكلام دا !
هل يعني هذا أن كل الفتيات أو حتي الغالبية كويسة ؟! نفس الأمر إلي حد ما ينطبق علي الشباب !
كما قلت , كل واحد شايف نفسه صح !
علشان كلامك يتحقق شوية وتكتر مع الأيام يا أمجد , لابد من ما يردع الناس عن الخروج علي قواعد السلوكيات والأخلاقيات .
ايه اللي بيحكم الناس ويقيد من سلوكياتها ؟ الدين , القانون , الأعراف والتقاليد .
الدين .... كل واحد شايفه علي مزاجه وهواه وفاكر نفسه انه شيخ المشايخ , وهي شايفة نفسها الخضرا الشريفة !
القانون ... يطبق علي البعض ( اللي ملوش ضهر ) لكن ناس تانية فوق القانون . دا غير ان القانون له ثغرات كبيرة وواسعة !
الأعراف والتقاليد .... اتغيرت خلاص واستبدلناها بتقاليد وأعراف الأجانب !
من الأخر يا أمجد المثل بيقول ايه ؟
( إذا كان رب البيت بالدف ضارب , فشيمة ..... كملوا انتوا بقي )
فيه أخلاقيات معينة , لابد من فرضها بالقوة . وهناك أخلاقيات أخري يتم التركيز عليها في المدارس ووسائل الاعلام المختلفة .
من زمااااااااان واحنا بنسمع نفس الشعار ( ابدأ بنفسك أولاً ) فهل حدث هذا ؟! أم أن ما حدث هو تدهور الأمور أكثر وأكثر ؟!
|