[د.عبدالرحمن المنياوي]

يا جماعة ده آخر كلام في تعيينات المعلمين المساعدين وبالأجر في المنيا وباقي المحافظات بإذن الله :

ولو اني عاوز أقولكم مع احترامي الناس في إدارة المنيا والله مش عارفين حاجة ومش فاهمين وفي المديرية أجارك الله بس ده وارد في حالة التخبط اللي احنا فيه ده بس مشكلتهم إنهم كلهم عاملين فاهمين يا خويا وكله تمام

الاستاذ محمود والجماعة بتوع التعيينات في المديرية يقولولك إن المعلم المساعد اللي هيكمل الـ3 سنين وامتحن الكادر هنعينه في شهر 7 وده كلام أكيد ..

أنا بأقول لهم بقى إن ده كلام فااااااااضي اللي يقول كده مش فاهم وبيفتي

خد الصح بقى ..

لازم نفصل بين القرارات ومنعملش الملوخية بالمهلبية دي طبخة وده حلو

صدر قرار بتثبيت المعلمين المتعاقدين وبالأجر من مضى عليه 3 سنوات .. خد بالك (متعاقد) يعني بالمكافأة الشاملة علشان الناس بتفهم هندي .. قالك المتعاقد هو المعلم المساعد .. يعني إيه تثبيت يعني يعين في وظيفة معلم مساعد على الثالثة التخصصية .. ودول صدر لهم قرار خلاص وأسماء الناس راحت التنظيم والإدارة وأخدت موافقة وأنا شفت الكشف اللي كان طالع بأسماؤهم من الإدارة في مركز المعلومات ..

أمال فين المعلمين المساعدين تعيينات 2008 و 2009 دول بقى مقسومين 3 فئات :

1- المعلمين المساعدين اللي امتحنوا الكادر من سنة ونص وتخلفوا في مادة وكانوا بيعيدوها ودول صدر لهم قرار تعيينهم في شهر 5 اللي فات على وظيفة معلم وكلنا فكرنا إن القرار ده خاص بالناجحين في اختبار 1/4/2011 ياراجل هي النتيجة كانت أعلنت أساسا علشان يثبتوا الناس ؟!!!

2- المعلمين المساعدين اللي امتحنوا كادر 1/4/2011 ونحجوا .. ألف مبرووووك الوزير قال إن قرار تعيينهم هيكون بعد انتهاء أعمال امتحانات الثانوية العامة .. وده كلام أكيد ومش لوع ولا مماطلة لأن القانون واضح وفي صفك وإوعى بقى تصدق اللي يقولك استنى لما تكمل الـ3 سنين والكلام الأههطل ده .. نجحت هتتعين معلم كمان اسبوعين ..

3- المعلمين المساعدين اللي لسه مادخلوش الكادر لأنهم لسه في الدبلومة أو لأي سبب آخر .. دول هيتعاملوا معاملة المعلم المساعد عادي ومش هيينتقلوا لمعلم إلا لما يجتازوا الكادر حتى لو عدى عليهم 10 سنين مش 3 بس ..

السؤال بقى هنا مين هيتثبت ومين هيتعين ؟!!!!!

الإجابة : أولا لازم الكل يتثبت يعني الفئة بتاعت العقد الشامل والحصة هيتثبتوا درجة ثالثة تخصصية ويتعينوا على معلم مساعد ..

طيب والمعلمين المساعدين ؟!!!!

الفئة 1 و الفئة 2 تعين معلم .. الفئة 3 تعين معلم مساعد زي الجداد بس هتفرق عن الجداد بالخبرة فقط ..

وده الكلام اللي من الآخر علشان ما يبقاش عند الناس لبس ..