[هانى الشرقاوى]

المشاركة الأصلية كتبت بواسطة ostazmath4m

أحكي لكم موقف مضحك حدث معي
كنت وقتها في المرحله الاعدادية يعني من زمااان الموقف ده
المهم كنت انا واصدقائي بنتسابق بالعجل
وتسارعت العجلات من تحت اقدامنا وكنا نقبض علي بعضنا
البعض اللي يحصل التاني كأنه قبض عليه
انا حبيت اعمل فيها زكي وقلت هدخل اول شارع يقابلني
خصوصا احنا في شارع رئيسي وبنجري بسرعه ولو دخلت
الشارع الفرعي اللي جاي مش هياخدوا بالهم وافلت منهم
المهم اول ما لمحت الشارع اسرعت ودخلت في الشارع
علطول وعينكم بقي ماتشوف اللي النور اتاري الشارع
ملغم بالكلاب وانا داخل بقي بسرعه عليهم تخيلوا انتوا بقي
ولقيت نفسي تقمصت دور سوبر مان من علي العجله وقفذت
منها كالطائرة وجريت خارج الشارع الي الشارع الرئيسي
ومن يومها حرمت العب سباق بالعجل تاني كفايا اللي حصلي وقلبي
وقف وقتها
تحياتي للجميع ويلا ماحدش يكسل ويكتب موقف من المواقف بتاعته
عايزين موقف نكد بقي بعد الضحك ده ها مين هينكد علينا

هههههههههههههههههههههه
الموقف دا فكرنى بموقف مشابه
وأنا صغير .. كنت بقضى الأجازة مع أهلى فى ريف الزقازيق دايما
والعيال هناك .. كانوا بيعاملونى على إنى إنسان جئ من كوكب أخر ... مش عارف ليه
المهم قالولى احنا لازم ندخل فى سباق بالعجل على طريق السكة الزراعية .. ووخدوا منى جنيه ومن كل واحد جنيه ... وقالوا اللى هيكسب .. هياخد الفلوس كلها
انا كان معايا عجلة وكويسة وسريعة وكمان شكها حلو وكمان صغنونة وعلى أدى
جه واد من ابن الجيران .. ضحك عليا .. وخدها منى .. واخدت مكانها عجلته ال 28 .. الفسكونيا
هههههههههه المهم دخلنا فى مرحلة السباق .. والعيال طارت بالعجل .. وأنا راكب على العجلة .. وكبيرة أوى عليا .. وبجاهد عشان أطول البدال ..
المهم بدأت أبدل نص تبديلة .. وجريت وسبقتهم كمان ... بس جه نفس الواد دخل فيا بالعجلة من وراء
مرة واحدة لقيت فردة العجلة الأمامية اتخلعت مش عارف ازاى .. ولقيت نفسى .. فى الترعة
واللى باقى من العجلة فوق منى ...
بس الحمد لله ربنا سترها .. ولانى كنت بعرف اعوم كويس .. ربنا نجانى

بس المشكلة مش هنا
الواد اللى ضحك عليا دا
راح قال ل تيته هانى خد منى العجلة ووقع بيها فى الترعة .. وانا عايز العجلة بتاعتى .. وفضل يعيط ويعمل زيطة
قامت نينه ..ادته العجلة بتاعتى .. عشان أنا بوظت العجلة بتاعته .. وكمان عشان خافت عليا .. انى أقع فى الترعة تانى
هههههههههههههههههههه .. ولحد النهاردة .. انا والواد دا الأصدقاء الأعداء
ولما بشوفه ببقى عايز أ***ه .. لانه أخد منى عجلتى