[حياتى وقف لله]

* الغسل الشرعي *

- موجباته والتفريق بين ما يوجبه وما لا يوجبه


موجباته:

يعني ايه موجبات الغسل؟
يعني الحالات اللي لو حدثت يلزم لها الغسل لاستعادة حالة الطهارة
وهم كذا حالة.. هنتكلم بس على اللي يهمنا:

1- تغسيل الميت

2- الحيض والنفاس
الغسل بعد رؤية علامة الطهر من الحيض والنفاس

3- الجماع (الجنابة)
الغسل بعد حدوث الجماع سواء حدث انزال للمني أو لم يحدث
لحديث النبي صلى الله عليه وسلم:
" إذا جلس بين شعبها الأربع ، ومس الختان الختان ، فقد وجب الغسل "
صحيح مسلم

وفي حديث آخر:
" إذا التقى الختانان ، و غابت الحشفة ، فقد وجب الغسل ، أنزل أو لم ينزل "
صححه الألباني


3- الاحتلام
الغسل عند رؤية مني أو بلل في الملابس بعد الاستيقاظ من النوم نتيجة رؤية حلم أثار الشهوة
سواء تذكره أو لم يتذكره
لأن العبرة برؤية الماء

4- الاستمناء المحرم
لا يكفي غسل المحل بالماء لكن يجب الغسل




بالنسبة للمني و المذي
للتفريق بين ما يوجب الغسل وما لا يوجبه
ما يوجب الغسل هو حدوث شهوة قوية في حالة اليقظة أو النوم ينتج عنها نزول "المني"

ما لا يوجب الغسل هو حدوث شهوة ضعيفة نتيجة مداعبة أو تذكر موقف مثير ينتج عنها نزول "المذي"




إذن لأجل استعادة الطهارة:

في حالة المني يلزم الغسل الكامل
في حالة المذي يكتفي بغسل العضو وتغيير الثوب أو رشه بالماء ثم الوضوء




******************

- السنة في طريقة الغسل

نوضح الأول أن طريقة الغسل من الحالات السابقة كلها زي بعض
بتفرق في تغسيل الميت وغسل الحيض في حاجات بسيطة هنوضحها مع الشرح

حاجة كمان..
احفظوا الجملة دي كويس وحاولوا تستوعبوها جدا
(كل مشقة وصعوبة أصلها الجهل)
مفيش حاجة صعبت علينا الدين إلا الجهل = أننا مش عارفين
مش عارفين أن الدين يسر
وأن اليسر والسهولة كلها في اتباع السنة
مش عارفين أنه لن يشاد أحد الدين إلا غلبه
اللي هيشد على نفسه ويعقد نفسه في تكاليف ربنا .. بدافع الحرص الزيادة أو الوسوسة.. لازم هيتغلب وهيتعب

بنقول الكلام ده ليه ؟
عشان في ناس بتعتبر أن الغسل ده شئ شاق جدا على النفس
(وده بسبب الكلاكيع الكتير اللي بيعملوها في طريقة الغسل وكلها مش من السنة)

نقول السنة الأول في الغسل.. وهنفهم الفرق وسط الشرح




الغسل بيقوم على حاجة واحدة اسمها:
تعميم الجسم بالماء

- بس خلاص! .. الموضوع خلص -

أنه يكون كل جزء في الجسم وصله ماء

لو اتحقق الموضوع ده بأي كيفية (طبعا مع استحضار نية الغسل قبله) خلاص يبقى كده اغتسلتي بنجاح

تعرفي لو طهرتي من الحيض ورميتي نفسك في بسين مية او ماء بحر مع نية الغسل .. يبقى كده اغتسلتي...لأن المية هتوصل لكل جسمك
# وهو ده المطلوب في الغسل #




طريقة الغسل توصفها لنا أمنا عائشة رضي الله عنها
عن عائشة:
أن النبي صلى الله عليه وسلم : كان إذا اغتسل من الجنابة ، بدأ فغسل يديه ، ثم يتوضأ كما يتوضأ للصلاة ، ثم يدخل أصابعه في الماء ، فيخلل بها أصول شعره ، ثم يصب على رأسه ثلاث غرف بيديه ، ثم يفيض الماء على جلده كله .
صحيح البخاري


وفي رواية:
أن النبي صلى الله عليه وسلم اغتسل من الجنابة ، فغسل فرجه بيده ، ثم دلك بها الحائط ، ثم غسلها ، ثم توضأ وضوءه للصلاة ، فلما فرغ من غسله غسل رجليه .
صحيح البخاري



إذن خطوات الغسل حسب السنة كالآتي وبهذا الترتيب:

1- غسل اليدين

2- غسل الفرج

(في حالة المرأة المتزوجة يزاد في غسل الفرج عن البكر لضمان نظافته جيدا)


بعد غسل الفرج

(في حاجة زيادة للحائض وهي المسح بقطنة ممسكة
يعني تجيب قطنة وعليها مسك -مع ملاحظة يكون مسك خالي من الكحول- وتمسح بها مسح خارجي على منطقة الفرج = تتبع أثر خروج دم الحيض من منطقة الفرج بعد انتهاءه
وده مفيد جدا لتطهير تلك المنطقة و اضفاء رائحة جميلة تزيل رائحة الحيض الكريهة... وده سنة علمها لنا النبي صلى الله عليه وسلم )
الدليل:
ما جاء في الحديث عن النبي صلى الله عليه وسلم، حيث سألته أسماء بنت شكل عن غسل المحيض فقال صلى الله عليه وسلم : " تَأْخُذُ إِحْدَاكُنَّ مَاءَهَا وَسِدْرَتَهَا فَتَطَهَّرُ فَتُحْسِنُ الطُّهُورَ ، ثُمَّ تَصُبُّ عَلَى رَأْسِهَا فَتَدْلُكُهُ دَلْكًا شَدِيدًا ، حَتَّى تَبْلُغَ شُؤُونَ رَأْسِهَا ، ثُمَّ تَصُبُّ عَلَيْهَا الْمَاءَ ، ثُمَّ تَأْخُذُ فِرْصَةً مُمَسَّكَةً - أي : قطعة قماش فيها مسك - فَتَطَهَّرُ بِهَا ، فَقَالَتْ أَسْمَاءُ : وَكَيْفَ تَطَهَّرُ بِهَا ؟ فَقَالَ : سُبْحَانَ اللَّهِ ! تَطَهَّرِينَ بِهَا ! فَقَالَتْ عَائِشَةُ لها : تَتَبَّعِينَ أَثَرَ الدَّمِ .
رواه البخاري ومسلم .

3- الوضوء وضوء كامل كالذي تتوضأي به للصلاة


4- غسل الرأس بالماء 3 مرات (لكن بطريقة معينة)
الطريقة هي:
الأول تبللي أطراف أصابعك وتدخليها بين جذور شعرك تدعكي بها فروة الرأس عشان توصلي الماء لفروة الرأس

ثم تغرفي بايدك كبشة أو (حثية) من الماء تصبيها على شعرك وتكرريها 3 مرات

في سهولة أكتر من كده ؟؟

وهو ده فعل النبي صلى الله عليه وسلم
" ثم يدخل أصابعه في الماء ، فيخلل بها أصول شعره ، ثم يصب على رأسه ثلاث غرف بيديه "




** هام جدا جدا :
لأن في نساء كتير بيقعوا فيه
بالنسبة للعروسة أو المتزوجة حديثا واللي دافعة شئ و شويات في صبغ شعرها وكويه ومش عايزة تغسل شعرها في الغسل من الجماع عشان ماتبلش شعرها كل شوية قدام زوجها
الكلام ده لا يجـــــــوز
لازم تغسل شعرها في الغسل لأنه زي ما قلنا لازم فيه نعمم كل الجسم بالماء ومنها الشعر... وجمال شعرها قدام زوجها مش عذر لها قدام ربنا

** هام :
بالنسبة للنساء اللي شعرهم طويل جدا .. ويصعب عليهم تسريحه وغسله كل شوية للغسل (إن كانت متزوجة وبتغتسل من الجنابة)
فممكن تضفر شعرها ضفيرة طويلة وتغسل رأسها فقط بدون ما تفض ضفيرتها = بدون ما تكمل غسل بقية شعرها
والحكم ده خاص باللي شعرها طويل
XX مش اللي عاملاه سشوار XX

لكن اللي مثلا بتغتسل من حيض
أينعم الحكم واحد في المتزوجة وغير المتزوجة في غسل الشعر
لكن
أكيد هي مش بتستحمي ولا بتغسل شعرها مرة كل الشهر ساعة لما بتغتسل من الدورة الشهرية !!
فالأولى لها أنها تفض شعرها للمرة دي
الأولى من ناحية الاحسان مش الالزام


5- غسل الجسم كله بالماء
(مع ملاحظة أنها توصل الماء للأماكن التي لا يصل لها مثل تحت الابطين و تحت الثديين وغيرها من ثنيات الجسم)

وملاحظة آخرى
أنها تتجنب لمس منطقة العورة حتى لا ينتقض وضوءها الذي توضأته في بداية الغسل لو هتخرج للصلاة بعد الغسل مباشرة

لأنه معروف أن لمس العورة بدون حائل من نواقض الوضوء



هل يجوز تعدد النية في الغسل؟
يعني مثلا واحدة جامعها زوجها (كده بقت جنب) وفوجئت بعد الجماع أنه نزل عليها دم حيض
وقالت خلاص هبقى أغتسل للاتنين مرة واحدة (غسل الجنابة والغسل بعد الطهر من الحيض)
فهل فعلها ده جائز؟؟
نعم يجوز تعدد النيات في الغسل الواحد ده في العموم
وفي الحالة اللي ذكرناها نعم فعلها جائز

لكن العكس لا يجوز

ازاي؟

نوضح بمثال
واحدة كانت حائض وخلاص طهرت من الحيض (لكن لسه ما اغتسلتش) و أراد زوجها أن يجامعها
فهل يجوز أنها تأجل غسل الحيض مع غسل الجنابة مرة واحدة؟
لا يجوز وماينفعش خالص
لازم الزوج عشان يأتيها تكون طهرت ثم اغتسلت الاول من حيضها بعد كده يجامعها وهي على حال طهارة.. ثم تغتسل للجنابة بعد كده براحتها
لكن ماينفعش الزوج يجامعها وهي لسه لم تغتسل





طيب في حالة ان واحدة مثلا كانت حائض واحتلمت وهي نائمة أو باشرها زوجها(يعني نزل منها مني)
ماذا تفعل؟
في حالتين:
- لو هتأجل الغسل من الاتنين بعد ما تطهر بالحيض..فمفيش مشكلة
لكن تاخد بالها انها لا تمس المصحف ولا تقرا القرآن
لأنها كده جمعت مع الحيض اللي بعض العلماء جوزوا قراءة القرآن فيه ..جمعت معاه الجنابة.. والجنابة العلماء قالوا :لا يجوز أن يقرأ شيئا من القرآن ولا حرف يقراه وهو جنب

- لو عايزة تتطهر من الجنابة.. ممكن تغتسل وهي حائض برضو بنية الغسل من الجنابة لرفع الحدث ده.. ثم بعد طهرها من الحيض تغتسل تاني