[هانى شوقى]

صعب جدا نعمل نهضة من غير قائد
احنا تقريبا معندناش عبد االه النديم او على مبارك او نهضة طلعت حرب الاقتصادية او نهضة عبد الناصر التحريرية او غيره من الناس اللى ادت بلدنا تاريخ عريق واصبحت رموز

محتاجين نغير فكرنا وثقافتنا احنا عارفين الصح فين بس مش عارفين نبتدى ازاى تقريبا متعلمناش نكون كدة

اعتقد بدايتنا مش التعليم بس لازم يكون لينا قائد بيحبنا قبل ما يحكمنا ان يكون لينا ناس تعرف تخطط ولو مش عارفين نعمل بعثات للخارج زى ايام محمد على الكبير ونختار افضل معلمين فى مصر ( من غير كوسة طبعا ) ونسفرهم برة ليه منتعلمش من الناس اللى اتقدمت
ليه دايما عاملين اننا احنا عارفين كل حاجة وبنحب نجرب فى بعض وللاسف دايما النتيجة صفر

دايما نقول احنا الحضارة طيب الحضارة دى بناها اجدادانا امال احنا بنينا ايه للاسف احنا تقريبا واقفين او بنرجع للخلف

ممكن النهضة التعليمية عايزة مبالغ فلكية فى دول بتخصص اكتر من 80 % من ميزانيتها للتعليم مش شرط المعلم يكون ليه مرتب ضخم علشان نرجعله كرامته لأ الافضل نخليه محور اهتمام بدل ما نشكر فى الممثل الفلانى او اللاعب العلانى اللى جاب جون او عمل فيلم وكانه بنى هرم نعمل للمعلم توعية اعلامية نرفع من معنوياته نحسسه بقيمته يمكن الحاجة الوحيدة اللى عملها الاعلام فى الفترات الاخيرة الجرى ورا المعلمين للنيل منهم ونجحوا بدرجة كبيؤة فى تشويه المعلم وكانه مسجل خطر

افكار ممكن تخدم التعليم :
1- وزير عملى يكون فاهم مش حافظ ( وياريت يكون معلم وقف فى فصل )
2- بعثات تدريبية للمعلمين فى الخارج ( بعثات للمشاركة فى مؤتمرات عالمية مش للفسح والاكل ولقمة العيش )
3- مناهج قوية تقذف بالتعليم لمراحل متقدمة وتتماشى مع طبيعة التلميذ
4- لو معندناش مناهج او مش عارفين ممكن نتعلم من اى دولة متقدمة تعليميا ( مش عيب )
5- تغيير الكتب المدرسية ان من رايي الناس اللى بتعمل الملخصات الخارجية او اباطرة الدروس الخصوصية عندهم كفاءة عالية فى وضع الكتب بدليل الالاف من التلاميذ بيجروا وراهم ليه منستفدش من الناس دى بدل ما نحاربهم
6- تغيير بعض المواد الدراسية التى عفها عليها الزمن زى خط ومش عارف ايه وبقول نغير منها مش نلغيها نطورها ونحط مواد اقوى زى البحث العلمى
7- المعلم لازم يتطور يتغير اقصد يتبرمج من جديد صدقونى الموجه او المدير بيعلم المدرس الخوف وطول النهار يقولوا زمان كنا بنشتغل مش عارف قد ايه وايامكم احسن من ايامنا كلام كله بتاع قهاوى لكن كله احباط للمعلم
8- كل المعلمين صعب نساويهم ببعض فى ناس فى مدارسنا مش بتشتغل وتاخد مرتبات زى او اكتر من اللى بتطلع عينه صحيح هى مسالة ضمير وحتى تقارير المديرين بتشكر فيهم لكن لازم يكون فى وقفة اللى ميشتغلش يسيبنا ويمشى لا مكان للفاسدين
9- ندعوا الله بان نرى بلدنا من خيرة بلاد العالم ( وياريت نعيش لغاية من نشوف اليوم ده )