[حووور الجنة]

السلام عليكم و رحمة الله و بركاااااااااااااااااتة


الحــــــــــــــــلقة دي يا جماعة تحفة

الحـــــــــــــــــــــلـــــــــــــقة العــــــــــــــــــاشـــــــــــــــرة



أَحَسِبَ النَّاسُ أَنْ يُتْرَكُوا أَنْ يَقُولُوا آَمَنَّا وَهُمْ لَا يُفْتَنُونَ * وَلَقَدْ فَتَنَّا الَّذِينَ مِنْ قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ ]
افتكرت الآية اللي كنت قرأتها الصبح من مصحف نديم... حاولت أفكر فيها .. بس هربت بكل قوتي ، مش عارف ، أنا مصدقت أماني بتحبني.. ده كان حلم حياتي.. بقى أول معرف إنها بتحبني أسيبها...
أماني: نديم ، سرحان في ايه؟
أنا:يعني انتي كنتي حاسة بيا كل ده، و كمان بتحبيني.. أنا أكيد بحلم
أماني: ولا بتحلم ولا حاجة، أنا بجد آسفة بس أنا لما اتعصبت يوم الاربع بعد مانت مردتش عليا مفكرتش أنا بعمل ايه..
أنا: بس كفاية اللي أنا سمعته دلوقتي،، أنت اتعصبي براحتك.. مش مهم أنا..
:D
أماني: يعني مش زعلان خلاص..
أنا: حتى لو حاولت أمثل إني زعلان مش هعرف.. أنا انهاردة حاسس إني اتولدت من جديد... أماني انتي أماني بجد؟
أماني: هرجع في كلامي على فكرة أيوا أنا ، اهو قدامك
\\ ساعتها حاولت أنسى قراري بصعوبة آه أنا مش عايز أزعلك مني يا رب بس مش عارف.. حاسس إني ضعيف ... حسيت بفرحة، بس فرحة بتوجع.. فرحان إن أماني خلاص بتحبني، بس قلبي مقبوض.. مكنتش أحب أني أقع في الإختبار ده.. مكنتش أحب أغضبك يا رب..
أنا: متيجي نخرج .. يا ترى تسمحيلي بشرف إني اتغدى مع سموك
أماني: مممممم، ماشي


******************************


حاولت أنسى نفسي طول اليوم و أنا معاها.. بس إحساس رهيب بالذنب كان مخليني معاها زي الغائب الحاضر... معاها و مش معاها.. المفترض إني فرحان.. بس حاسس إني بمثل على نفسي.. حسيت إن رجوعي لها مكانش سهل زي مانا كنت متخيل.. معقولة أنا بحب ربنا أوي لدرجة إني مش عارف أفرح و هو غضبان عليا.. يا رب سامحني


*******************************
في البيت

جميلة: ممكن يا ماما تعملي سمك ، أشرف بيحب السمك..
أنا: طب ما يحبه هو ماله احنا ناكل ايه
جميلة: لأ يا نديم ده جاي يتغدى معانا انهاردة
نديم: ليه؟
جميلة: عادي
نديم: عادي ده اللي هو ايه، دانتو لسه حتى مقريتوش فاتحة.. يجي يتغدى هنا بصفته ايه؟؟
جميلة: بصفته إنه هيبقى خطيبي
أنا: ده لما يبقى..
ماما: نديم متكلمش أختك كده
أنا: يا ماما.. انتى موافقة إنها تعزم أشرف في البيت؟
ماما: ايه المشكلة يا حبيبي مفيهاش حاجة .. قلي بقى تاخد سمك مشوي ولا مقلي
أنا : :| أنا اتغديت بره، و نازل اتمشى
جميلة : متتأخرش عشان تسلم على أشرف طيب
أنا: لما أشرف يمشي ابقو كلموني عشان أجي


********************************


نزلت اتمشى و قعدت أفكر..
أنا:معقولة كل حاجة بترجع تبوظ تاني.. أشرف ده هعمل معاه ايه.. و الله ما مستريحله.. نفسي جميلة تفهمني.. أنا خايف عليها بجد.. أنا لازم أفكر ازاي أخلص منه..

أنا بردو: كما تدين تدان يا عم نديم
..

أنا: تقصد ايه

أنا بردو: شوف انت اتغديت انهاردة و قضيت اليوم مع مين، و عملت ايه

أنا: أنا ... أنا.. بحب أماني و ماصدقت
أنابردو: لا يا راجل.. المفروض إني اقتنع يعني؟ طب حيث كده أحب أقولك إن أشرف بيحب جميلة و ما صدق
:D
أنا: انت هتهزر
أنا بردو: طب متقول كلام معقول يعني..
أنا: أنا اقصد ، إن أشرف أنا متأكد إنه مبيحبهاش.. و إلا...
..
أنا بردو: متكمل، قول .. قول و إلا كان حافظ عليها و احترمها و قدرها من بدري..
أنا: أنا أقصد
أنا بردو : أنا عارف قصدك.. متحاولش تهرب مني بقى، متحاولش تهرب من نفسك
أنا: أنا مش هسيب أماني أنا بحبها
أنا بردو : لو بتحبها ترميها في النار؟؟
أنا: نار! لأ طبعاً مين قال كده
أنا بردو: انت مش كده بتعصى ربنا و بتساعدها على معصية ربنا.. يا عم لو بتحبها اتمنالها الجنة
أنا:أكيد نفسي تدخل الجنة
أنا بردو : كلام، فكر شوية.. شوف لو انت بتحبها فعلاً هترضالها الوضع اللي مرضيتلهوش لأختك
أنا: أنا
...
أنا بردو: انت كده تبقى أناني أوي، و بتحب نفسك، و عايز ترضي نفسك ، تفضل مع أماني، و تطمن على جميلة.. بس خد بالك انت كده بتأذي نفسك و انت مش حاسس.. ربنا غفور رحيم، بس عذابه أليم ..
أنا: أنا هتوب
أنا بردو: و ده المسكن اللي انت بتستخدمه مع ضميرك؟؟ كفاية إني أقولك إنك متعرفش امتى هتموت.. ممكن ملك الموت دلوقتي يكون هيقبض روحك.. مستعد؟؟

~الآذان~

أنا بردو: يلا عم نديم نصلي ربنا يهديك
أنا: لا يا عم أنا لو شفت أنس مش عارف هقوله ايه
أنابردو : مكسوف من أنس و مش مكسوف من ربنا؟ يلا نصلي يا عم..

أماني بتتصل
أنا : أنا هرد بقى
أنا بردو: تصدق انت معندكش دم ، شوف أنا بقولك ايه من الصبح
أنا: عشان خاطري بقى بص أنا هرد بقى
~الإقامة~
أنا بردو: يا عم اقفل الموبايل عايزين نصلي بقى هقوم اضربك
أنا: طب حاضر
*********************************
في الصلاة، أنس قرأ الآية اللي قرأتها من مصحفه الصبح

[ أَحَسِبَ النَّاسُ أَنْ يُتْرَكُوا أَنْ يَقُولُوا آَمَنَّا وَهُمْ لَا يُفْتَنُونَ * وَلَقَدْ فَتَنَّا الَّذِينَ مِنْ قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ ]

أول مسمعت الآية دموعي غلبتني.. أنا، كنت كداب؟؟ أنا بحب ربنا فعلاً و مش عايز أغضبه؟ أنا قررت أسيب أماني الصبح عشان ربنا بجد ولا كنت كداب؟؟

و خلصت الصلاة و فكرت أمشي بسرعة عشان أنس ميشوفنيش، بس بعد ما سمعت الآية للمرة التانية انهاردة، حاسس إني عايز أكلمه ..
أنا: أنس
أنس: السلام عليكم أهلااااا ، نديم باشا
أنا: و عليكم السلام .ازيك يا أنس
أنس: تمام، مالك يا عم شكلك مضايق
أنا: قلي يا أنس، هو ربنا بيختبر الناس ؟
أنس: طبعاً، انت سمعت الآية اللي قرأتها في الركعة الأولى؟ ربنا سبحانه و تعالى بيعمل للناس اختبارات.. مواقف بيعدوا فيها.. المواقف دي بتبقى عاملة زي الغربال، يقع منه الحاجات الوحشة، و يفضل الحلو
أنا:أنس أنا الآية دي قرأتها الصبح من مصحفك و لسه سامعها منك دلوقتي.. و بصراحة أنا حاسس إنها ممكن تكون ،، مش عارف أقول ايه
أنس: تقصد رسالة من ربنا ليك؟؟
أنا: آه تقريباً كده
أنس: و ليه لأ.. ربنا بيرسلنا حاجات تساعدنا في طريقنا، و تنبهنا.. و ده من كرمه و رحمته بينا.بس قلي انت ليه حاسس بكده
أنا: أصل..أنا كنت قررت أتوب و رجعت في قراري، و حاسس إني خلاص سقطت في الاختبار
أنس: بس في إعادة
أنا: يعني ايه
أنس: يعني مش هي دي النهاية، إن الله لا يمل من استغفارنا حتى نمل.. يعني لسه ممكن ترجع تاني.. متستناش يا نديم.. محدش يعرف امتى هيموت..
***********************************
خلاص أنا قررت.. من بكرة مفيش أماني إن شاء الله، يا رب ثبتني.. انت عارف يا رب ضعفي.. و عارف اللي جوايا و اللي قلبي حاسس بيه.. يا رب مليش غيرك يا رب.. يا رب اجعلني من الذين صدقوا..
****************************
الصبح في الكلية

دخلت الكلية بقدم رجل و بأخر رجل.. نفسي مشوفش أماني.. بس لأ أنا لازم أبقى قوي.. مش قلت إني بحب ربنا، انهاردة إن شاء الله أثبتها بالفعل... أماني اهي جاية من بعيد،، هعمل ايه معاكي يا أماني و هقولك ايه؟؟

اشوفكو في الحلقة الجاية.........