[هانى الشرقاوى]

المشاركة الأصلية كتبت بواسطة love ur life

هختار
الاستاذ هاني الشرقاوي..

أشكرك .....
نقطة التحول فى حياتى
بدأت فى سنة 3 ثانوى واستمرت بعدها شوية
اول ما النتيجة ظهرت طلعت نتيجتى 93.7 فى المية وكانت صدمة كبيرة جدا ليا
لكن بعد التظلمات وصلت النتيجة لحد 98.3 تخيلوا
الحكاية بدأت لما عرفت بنت فى الثانوية ... ومش عارف انا فعلا كنت بحبها ولا انا كنت فى حاجة للحب
البنت دى جابت مجموع تدخل بيه كلية الطب ... رحت معاها الجامعة فى أول يوم ...
طول السكة عمالة تحلم بالمرضى اللى هتعالجهم ... والناس اللى هتساعدهم
قدام الجامعة ... عربية خطبتها وماتت ....

بعد كام شهر عمى ( اكبر منى ب 5 سنين ) اتجوز ... وبعد الجواز بكام يوم
مات هو وعروستة فى حادثة

الاحداث دى فى البداية كانت أمر مفجع بالنسبة لى لكن مكسرتنيش
صحيح شوشت على فكرى .. وبقا همى الشاغل فى الحياة هو ( الموت )
فضلت أقرا على الموت فى الفكر الرومانى واليونانى وعند الفراعنة وفلسفة الموت فى الفكر الإسلامى والمسيحى .... إلخ .... وكانه واحد اعرفه


كنت متعود كل يوم جمعة اروح مركز الشباب بعد الفجر وأنا صديق ليا اسمه محمود ونفضل نعلب كورة لحد الساعة 9 او 10 وبعدين نرجع
وفى يوم جمعة .. رجعنا بدرى شوية
وكان فيه شبورة إلى حد ما
ماشيين على الطريق الأسفلت .. بنشوط الكورة لبعضينا .. ولازم كل واحدة يلمسها مرة واحدة بس
انا شطوت الكورة جت فى وسط الطريق ... محمود عايز يجيبها بسرعة ... عربية خطبته ... مات

هنا بقا البداية
فى وقت الحادثة حسيت إنى فقدت البصر والسمع وتقريبا أغمى عليا
بعد شوية بقيت أشوف كل حاجة كبييييييييييييييرة وبعييييييييييدة جدا
أبص لإيدى احس إنها اد الجبل وتقيلة .. تقيلة جدا
أجئ أنام بالليل .. أبص للسرير احس إنه اد الدنيا كلها ...
طبعا مكنتشى بنام أصلا ... ناهيك عن الكوابيس المؤلمة
وكنت فى الوقت دا اى حاجة بتتحرك على الأرض بخاف منها

سيطر عليا إحساس غير عادى من الخوف .. وأحيانا كنت بشعر إننا مش فى الدنيا .. او فى عالم تانى مش عارف إيه هو

مرضت مرض نفسى شديد ... وفضلت فترة اتعالج منه ... وأقسى مراحل العلاج دى
لما كان الدكتور بيعرضنى للكهرباء ... عشان انسى الاحداث القريبة مش البعيدة ... إزاى مش فاهم
ورغم الألم اللى سببتهولى ... لسه فاكر كل حاجة ... وبالمناسبة الشهر اللى مات فيه محمود كان هو الشهر دا .. ربنا يرحمه بقا

اعتقد إنى دى أصعب نقطة مريت بيها فى حياتى ... ولا اتخيل ولا أتمنى إنه فى ظروف تانية مشابهة ممكن أمر بيها

وربنا يبعد عنكم جميعا شرار الاحداث ومصائبها