النهار ده ها احكى لكم حكاية سعيدة
الاسم قديم بس الاحداث جديدة
على بابا كان حطاب غلبان و فقير
فجأة اصبح من الاعيان غنى وكمان امير
عنده دهب كتير وياقوت وبيلبس حرير فى حرير
منين كل ده ياعم على
دا قاسم اخوك بقى غلبان
هاقول لقاسم على الحقيقة
وهااوصف له الزمان و المكان
الحقيقة حزب قريب جدا من الميدان
مليان حديد واسمنت واراضى ومص دم الغلبان
ماالكل معانا داحنا الاغلبية
والنتيجة طبعا دايما مية مية
ما تشغلش بالك ياعم جمال خليها على الله وعليا
بسمارك حكم بالحديد والنار
وانا هاحكمها بالرشاوى والبلطجية
وطول ماالشعب غلبان سلطة المال عفية وقوية
والكل هنا وبارك وانتشرت الفرحة
والتلفزيون بقى عروسة للحزب ولبسوها الطرحة
قول ياعم عز كمان وكمان
ماانت رجل الزمن ده بس مش كل الازمان
مانت بقيت رئيس الفرقة الماسية
بعد ايام الغلب وسلم لى على الصحبجية
وانتشر يافساد
انتشر يافساد وحطم احلام الشباب
خير البلد ليكو وهم لهم الفقر والعذاب
حتى الاراضى استوليتوا عليها واسالوا الكلاب
غاز بلدى بيدفى اليهودى وانا عودى بينطفى
خالتى عزيزة بتقول لكوا مش هااسامح على اد فهمى
ولا ايه رايك ياوزير يارياضى يامرتشى
وفى يوم التلات اتولد فجر جديد
زى كل يوم ماحدش كان فرحان وسعيد
قالو قلة قليلة وشوية عيال وماتخافش ياعم مفيد
هانلمهم فى بوكسين ونرميهم فى مكان بعيد
وهناك يمر عليهم عيد ورا عيد
واهاليهم يشربوا الذل ويدوقوا العذاب الشديد
ويقولوا ياريت ماخلفناهم وياريت ماكان جيل جديد
ماالعادلى بيحمى الظالم وبينصر الجبار العنيد
بس الاحرار اتحملوا مرفوعين الروس والجباه
ذخيرة حيةورصاص مطاطى وقنابل حرمها حتى الطغاة
ويوم ورا يوم وشهيد ورا شهيد انهزم الظلم وسجد الكل لله
الله اكبر عليكم ياثوار خمسة وعشرين
علمتوا العالم ازاى تحافظ على الوطن وعلى الشرف والدين
دى ثورتكم هايدرسوها للعالم فى كتاب مبين
واسالو اوباما وكاميرون عن الخبر اليقين
اليقين ان ثورتكم احترمها العالم حتى المعارضين