[نقاء الروح]

المشاركة الأصلية كتبت بواسطة nour eleman

و الان معكم الفقرة الثانية و هى

اختيار العضوة و تجيب على الاسئلة
و العضوة هى

" نقــــاء الـــــروح "

و الاسئلة

ايه اكتر مادة بتحبيها و ليه ؟
بحب المواد العلمية عموما وخصوصا كيميا ورياضة واحياء
عشان بحس بمتعة فمذاكراتها خاصة الكيميا
وهي بتعتمد عالفهم اكتر من الحفظ

ايه اكتر مادة بتكرهيها و ليه ؟
بكره الانجليزي ..و مش عارفة ليه
بس من وانا صغيرة وانا مش بطيقه
بس دلوقتي خلاص عشان دراستي بقت انجلش

نفسك تطلعى ايه و ليه ؟
خلاص اتدبسنا
طبيبة ان شاء الله

بتأيدى موضوع السهر ؟
ابدا ..
السهر مش كويس لانك بتلخبطي ساعتك البيولوجية
وساعة نوم بالليل احسن من 10 بالنهار
وانا من النوعية ال كنت الساعة 10 بالكتير وتلاقيني في احضان سريري

بتذاكرى على حوالى كام ساعة " ماتخافيش احنا هنا اخواتك مش هانحسدك " ؟
ههههه اخاف عينكو سخنة بس
بصي انا ماكنتش بهتم بعدد الساعات على اد من اهتمامي
الانجاز ال عملته
يعني ممكن اقعد 10 ساعات وماطلعش غير بحاجات بسيطة
وممكن ساعة اعمل فيها كتير
ونصيحة فاليوم ال تلاقيك فيه نشيط وعاوز تذاكر
ذاكر على اد ماتقدر ..ماضيعش الفرصة من ايدك

ايه اكتر وقت بتحبى تذاكرى فيه ؟
بعد الفجر .. وقت رائع المخ فاضي بيتقبل اكبر قدر من المعلومات والدنيا هادية لا برد ولا حر
كله متوفر ..

ايه اكتر مشكلة بتواجهك اثناء المذاكرة ؟
السرحان و النسيان السريع
افتكر فعلم النفس والاحياء كنت اقلب الصفحة
الاقي المعلومات طارت
وارجع كانوا مبهدلني والله

مكان الامذاكرة عندك مناسب ؟
انا مش عندي مكان محدد
بذاكر فكافة الظروف فكل مكان
عندي تأقلم كويس الحمدلله

ايه اخبار اصحابك بيشجعوكى و لا ايه ؟
ظروفي كانت مختلفة شوية
فماكنش ليا اصحاب ..
وانا بطبعي بحب اكون مستقلة
يعني اعمل كل حاجة على مزاجي

اكتبيلنا نصيحة ...b)
نصيحة : خليك فنفسك
مش تسمح لأي حد يشتتك او يحسسك انك ضايع
احنا المصريين او معظمنا مخلي الثانوية العامة حرب
ومش ينفع انا وزميلي نجيب كويس
لازم انا وانا بس
فالمعظم بيلجئ لاساليب ملتوية
لا تلتفت لهم خليك واثق من نفسك
وتذكر : ان الله لا يضيع اجر من احسن عملا
والصلاة ورضا الله وطاعة الوالدين
وعمل جاد
هتطلع النتائج مبهرة ..
وربنا يوفقكم يارب

يا ترى استفدتى من المنتدى هنا فى ايام ثانوى؟
استفدت اخر تانية وفتالتة .. الاسئلة ال كانت
بتنزل من االاساتذة الافاضل
وحتى اسئلتي .. ال مش كنت اعرف احلها

يلا مش عايزين نعطلك

كونتى بتقعدى عالنت ايام ثانوى ؟
اه .. بس كان قليل
بس كنت دايما اخد محاضرة من ماما عليه

شكرا للاستضافة الجميلة
والبرنامج الاجمل ..
وربنا يوفقكم يارب وشدو حيلكم ..

واعتذر عن التأخير ولكن نظرا للظروف التي نمر بها ..
فرج الله كربنا وهمنا ..