[اميمة طه]

هاقولكم بقا على موقف محصليش انا بس حصل مع زميل
اللى حصل ان كانت الحصة شغالة وبعدين عندنا امن على البوابة وبعد فشل فكرة ان الطالب يقعد امن يعنى عشان الزوار بيستخفوا بالعيال وخصوصا لما يقولوا لهم امضوا فى دفتر الزيارة.....المهم الاستاذ اللى فاضى يقعد على البوابة وبرده اهو بياخد باله من العيال عشان ميطلعوش برده ويعملوا مشاكل....وبعدين ولد نازل من المدرسة وماشى يتنطط وفجاة نط على البوابة عشان يعدى من فوقها .....قام الاستاذ اللى كان قاعد جنب اللى عليه البوابة قام جاب الولد وضربه عشان ميعملهاش تانى وخصوصا ان البوابة عالية ولو كان وقع كان عمل مشكلة للمدرسة كلها ......على العموم الولد انضرب من هنا وجرى فى الشارع وراح جاب عيلته اخواته واعمامه....نسيت اقولكم ان الولد شتم المدرس بكلام اقل حاجة تتقال عليه انه اكثر الكلام اللى ممكن تسمعه متدنى..... اهله جم المدرسة وملوا الحوش وشتائم وعاوزين المدرس يطلع عاوزينه .....المدير طلب الشرطة .....واحد من الاهالى اتدخل عشان البلاغ بتاع المدير ميمشيش....... الموضوع اتلم يوميها بس اهل الولد كتبوا في المدرس بلاغ والمدرس بات فى الحبس وكان مع ناس انتوا عارفين الحبس بقا المهم لما جه كان بيقول ان فى الحبس بيندهوا عليه ويقولوا المدرس يجى؟.............الموضوع خلص واتحل بالتنازل عشان المدرسين ضغطوا على اهل الولد............حد قال عشان مصلحته ؟ لا.......... المهم كله مسك ان الضرب ممنوع