أنا لسا طالبة ..
بس فيها ايهـ لما يكون الاتنين مع بعض ؟ الموضوع مش أضداد ..
بس لو حصل واتحطيت في موقف زي دهـ .. بقناعاتي الحالية هختار الشغل ..
أنا بصراحة مش متخيلة نفسي من غير شغل .. وبعدين أنا مش مطحونة الـ 12 سنة دول وان شاء الله لسا كمان 7 سنين لو دخلت طب غير الدراسات العليا علشان في الآخر أقعد في البيت .. أي عقل سليم مستحيل يرضى بدهـ ..
نفسي أفهم المعترضين على عمل المرأة معترضين ليهـ ؟ .. ولا هي أفكار وغير قابلة للتغيير وبس ..
أكتر حاجة بتغيظني بجد لما اتكلم مع حد في الموضوع دهـ ويقولي عائشة وحفصة.. طيب مين في الأيام دي كان بيشتغل ؟ الموضوع مش يوم ولا يومين دول 14 قرن .. اذا كان علي بن أبي طالب رضي الله عنه قال : " ربوا أولادكم غير تربيتكم فإنهم قد خلقوا لزمان غير زمانكم " فدهـ مش عالتربية بس .. أي حاجة في الدنيا ممكن تتغير بتغير الزمن .. حتى الأحكام الفقهية ممكن أحيانا تتغير تبع عرف المجتمع .. بقى كل دهـ يتغير .. والمرأة تفضل عايشة في القرن السابع و الثامن !!!!!..
وبعدين حتى عائشة رضي الله عنها خرجت مع الرسول في غزوات كتير .. وطبعا مكانتش متفرجة .. كانت بتسقي الجند وتعالج الجرحى .. مش دي ممكن نسميها حاليا وظيفة ! .. رفيدة الأسلمية رضي الله عنها برده كانت ممرضة .. دي مكانتش وظيفة !! ..
وكمان المرأة انسانة من حقها تثبت ذاتها وتستغل مواهبها .. وياريت اللي هيقولي تثبت ذاتها في تربية أبناءها يقولي كمان مين أم صلاح الدين ومين أم الخوارزمي ؟
واللي هيقولي وراء كل رجل عظيم امرأة عظيمة يقولي برده مين زوجاتهم ؟ ولا احنا لازم نفضل طوووول عمرنا مستخبيين وراء وعلى الهامش ؟
مش كفاية ان المجتمع قتل مواهب الطفلة ( وحتى الطفل ) وهي لسا في اللفة .. هيقتل طموحها كمان بعد ما تكبر .. ومن غير سبب معقول ..
وكلامي كلهـ مش معناه ان يكون الشغل على حساب الزوج والأولاد أبدا .. اللي عايزة تجمع بين الاتنين هتقدر ..
آسفة اني طولت بس بجد كنت متنرفزة جدا ..
__________________
|