[نقاء الروح]

الحلقة التاسعة

قال باسم لشريف الجالس بجانبه في السيارة مبتسما:
- انا سعيد جداً انك قبلت دعوتي وسعيد برضه ان نادر معانا.
قال نادرالجالس في الخلف على مضض:
- مش باين.
ضحك باسم قائلاً:
- ياسيدي ما انا قلت انا اسف..... والحمد لله مستعد أتغير ، ونبدأ صفحه جديده.
لم يعلق نادر فأضاف باسم:
- تعرف يا شريف أكتر حاجه اثرت فيا في الرحله.... لما قلتلي انك بتدعيلي.... مش عارف ليه حاسيت احساس غريب كده..... انا كمان يا شريف نفسي نرجع أصحاب زي زمان ، وان شاء الله في الخير.
قال شريف بابتسامة هادئة:
- ان شاء الله.
وصلوا إلي منزل باسم في السادس من أكتوبر وكانت المنطقة كعادتها هادئة تماماً فاقترب نادر من شريف قائلاً:
- انا مش مرتاح للمشوار ده.
وكزه شريف هامساً:
- بس بقى انا مش عارف انت عامل قلق ليه؟!!
قال باسم مصطنعاً عدم الفهم:
- في حاجه يا جماعه؟!!
هز شريف رأسه قائلاُ:
- لا أبداً.... ده بس نادر اول مرة يجي اكتوبر.... وحاسس انها فاضيه.
- آه.... فعلاً اكتوبر...هاديه جداً علشان كده بحبها.
صعدوا درجات السلم وأخرج باسم مفاتيح الشقة وقبل أن يفتح الباب تفاجؤا جميعاً بمن يفتحه من الداخل حتى باسم نفسه الذي إرتد للوراء ليصتطدم بنادر صائحاً:
- إيه ده.... مين؟!!
أطل عليهم مدحت برأسه قائلاً:
- إيه انتو إتخضيتو ولا إيه؟!!
ارتسمت الدهشة على وجه كلاً من شريف ونادر أما باسم فقال في غضب:
- انت إيه إلي خلاك تفتح الباب؟!!
- عادي حبيت أعملكم مفاجأه.
ثم نظر لشريف قائلاً:
- ياه شريف عندنا يا مرحبا.