سبب المشكلة هو المال اللي الناس بقت بتهتم به فقط . والدة الفتاة أو والدها كل همهم الشقة والشبكة بكام والمؤخر كام والقايمة حتبقي بكام والرصيد اللي في البنك ولما يلاقي كل ده تمام يقولك " احنا نشورهالك ونجيبهالك لحد باب البيت , احنا بنشتري راجل !! " الحكاية بيع وشراء . معاك اللي انا عايزه , أهلاً وسهلاً بيك . ممعكش ما يلزمكش . أما مسألة الدين والأخلاق بقت مجرد كلام " سد خانة يعني " . والحجة بتاعت أهل الفتاة انهم بيأمنوا مستقبل بنتهم !!! طيب ومين يأمن مستقبل الشاب؟!!! ايه اللي يضمن للشاب ان الفتاة مش حتطلع عينه وتندمه علي اليوم اللي فكر انه يتقدم ليها؟!!! وطبعاً لو طلقها حتاخد اللي وراه واللي قدامه !! ويبقي الشاب بين نارين , اما يطلق ويبقي علي الحديدة " ده لو الحديدة لسه موجودة " , أو يعيش في نكد وحسرة .
قال رسول الله صلي الله عليه وسلم " إذا جاءكم من ترضون خلقه ودينه فزوجوه , إلا تفعلوا تكن فتنة في الأرض وفساد كبير " صدق رسول الله صلي الله عليه وسلم. واحنا عايشين الفتنة والفساد الكبير . أمان كل فتاة يتقدم لها شاب هو الدين والأخلاق .
|