[vampire1188]

ياريت ياغالى اعرف رايك وانا خلاص قبلت اداره اعمال فى الاكاديميه فى ايه رايك فى المجال

المجال التجارى دا من أوسع المجالات اللى ليها شغل فى مصر

طبعاً العملية مش وردية زى مانتا متخيل يعنى .. الموضوع محتاج تعب وشغل

يعنى ايه تعب وشغل ؟ .. يعنى مذاكرة عشان تجيب تقدير ..

وفى نفس الوقت تمنى نفسك من خلال الكورسات والتدريب

واذاى اقدر اتميز فيه عن غيرى

تقدر تتميز عن غيرك من خلال حاجتين زى ماقولتلك .. التقدير الدراسى - الكورسات

1- التقدير الدراسى :

دا مهم جدا .. وماتسمعش كلام الناس اللى بتقولك تقدير ايه ياعم صلى ع النبى المهم الخبرة

اهو دا كلام احباط ومالوش أى اساس من الصحة ..

التقدير بيفيدك فى انك لما بتيجى تقدم لشغل على الاقل بيبقى منظرك حلو

ضيف لدا ان فى بعض الجهات مابتقبلش اقل من تقدير معين

يعنى عندك مثلا البنك المركزى مابيبقبلش اقل من امتياز زائد انه لازم يعدى من الاختبارات

عندك 90% من البنوك فى مصر مابتقبلش اقل من تقدير جيد ..

والافضلية للجيد جدا طبعا (الا اذا كان ليك واسطة)

بمعنى اصح .. التقدير بيميزك عن زميلك اللى لسه متخرج معاك

فى الحصول على وظيفة محترمة فى مكان محترم بمرتب محترم

بعد مابتشتغل بتبتدى تاخد خبرة .. فلما بتتنقل من مكان لمكان

ساعتها مابيبتبصش للتقدير على قد مابيبتيص انتا اشتغلت فين قبل كدا

وطبيعة شغلك كانت ايه وقد ايه ومن امتى لامتى والتقرير السنوى بتاعك تقديره ايه .. وهكذا

فالخلاصة ان التقدير الدراسى فى الجامعة بيخليك تحط رجلك فى شغلانه كويسة

ومن خلال الشغلانه تبتدى تاخد خبرة وتتنقل لمكان احسن

لان طبعا انتا عمرك ماهاتستمر فى مكان واحد طول عمرك .. خاصة فى ظل القطاع الخاص

2- الكورسات :

الكورسات دى من أهم الحاجات اللى لازم لازم لازم تعتمد عليها

الكورسات عموما فى مجال ادارة الاعمال بتتلخص فى حاجتين او تلات حاجات

كورسات لغة - كورسات متخصصة (بنوك-استثمار-بورصة .. الخ) - كورسات دولية

بالنسبة لكورسات اللغة دى أكيد مافيش اختلاف عليها انك لازم يبقى معاك لغة

واللغة مش مجرد كتابة وشوية جرامر على امتحان تويفل .. لا اللغة يعنى انك تتكلم وتمارس اللغة

هاتقولي ياعم مش مهم ماهو لما باجي اقدم فى شغل بيعملوا امتحان انجليش واي كيو فى السريع كدا

هاقولك انتا نسيت محطة الانترفيو .. بيبقى بالانجليش وساعاتها بتتكشف انتا بتعرف تتكلم ولا لاء

بالنسبة للكورسات المتخصصة .. دى بقى على حسب مانتا دماغك مودياك فين

اذا كان مثلا دماغك فى البورصة ووجع الدماغ وحرق الدم والضغط والسكر

يبقى عليك وعلى البورصة نفسها .. بيقدموا هناك كورسات فيها بس غالية شويتين

اذا كان دماغك فى الاتصالات وخدمة العملا يبقى عليك وعلى كورسات الداتا بيز والاوراكل .. الخ

اذا كان دماغك فى البنوك يبقى عليك وعلى التدريب فى البنوك او المعهد المصرفى

وهكذاااااا ..

مع العلم انى مش بميل للمجال ده

عشان تبقى عارف .. عمر مافيه حد بيخش المجال التجارى وهوا بيموت فيه وبيتمناه

كله بيخش عشان مجموعه زنقه ودخله الكلية دى

ودا مش بيقلل من قيمة الكلية طبعا .. بس المشكلة انها محطوطة فى النص ..

بين كليات القمة العالية (طب - هندسة - السن - اعلام .. الخ) والكليات اللى تحت (حقوق وآداب .. الخ)

عشان كدا بيسموها كلية الشعب .. فدا مش تقليل من قيمتها ..

الكلية والمجال ذات نفسه حلو ومفتوح جدا

بس للى يعرف يسلك طريقه بنفسه ويتميز فيه