[د\ الاء]

السلام عليكم
يا دكتور احمد عدد المواد ف كل سنه بيختلف من جامعه لجامعه
بس لو تحب تعرف المواد بالظبط اسمائها وكده فانا هكلمك علي اساس جامعتي (جامعه المنصورة) ولو فيه اختلاف بينها وبين اي جامعه تانيه اكيد هيبقي بسيط وهيبقي نسبي


السنه الاعداديه:
ودي هكلمك عنها بالتفصيل زي محضرتك عاوز
هي عباره عن ثانويه عامه بس بالانجلش ودي تعتبر سنه تمهيدي ملهاش اي علاقه بالكليه


الحيوان او zoology ........ بينقسم لست فروع وهما
1- فسيولوجي وده زي احياء ثانوي بالظبط بس بالانجلش
2- سيتولوجي وهستولوجي وده فرع بسيط ف السيتولوجي عباره عن دراسه مكونات الخليه ووظائفها ولو انت واخد مستوي رفيع احياء ف الثانويه فده هيساعدك كتير بس هي بسيطه
والهستولوجي بسيط برده بس محتاج شويه حفظ وهو عباره عن دراسه الانسجه اللي ف الجسم معرفه اماكنها ووظيفتها

3- امبريولوجي وده علم الاجنه برده من الحاجات اللي اخدتها ف ثانوي مع اضافات بسيطه بس
4 - كورداتا او الحبليات ودي من اسمها بتدرس الحبليات وتطورها بدايه من ابسط حيوان حبلي اولي اسمه الامفيوكسس الي الانسان
5- بارا parasitology ودي بتدرس دورات حياه الطفليات زي الاسكارس والانكلستوما وسهله اوي
6- اورال كافيتي oral cavity (تجويف الفم) ودي لذيذه برده بتدرس فيها مكونات الفم ووظائفها زي الاسنان واللسان واللثه كده يعني

ده بالنسبه للحيوان كان عليه 100 درجه النظري عليه 50 والعملي 20الشفوي 15 واعمال السنه او الميد تيرم 15
وف العملي بتاعه بيبقي فيه تشريح
ف التيرم الاول كان فيه تشريح الضفدعه ...والباقي بتاخد شرايح لانسجه بتمتحن عليها بانك تتعرف ع الشريحه اللي قدامك
اما التيرم التاني فبنشرح سمكه البلطي والسحليه والارنب والحمامه وبرده فيه شرايح

ودي ماده بسيطه وسهله والكل بيجيب فيها تقديرات كويسه
.................................................. .........................................
تاني ماده الكيميا
بتنقسم لكيميا عضويه organic
هي تقيله شويه ومحتاجه مزاكره باستمرار
وكيميا فيزيائيه وبرده فيها كتير من ثانوي
وكيميا تحليليه برده كلها من ثانوي مع شويه اضافات بسيطه

الكيميا برده عليها 100 درجه بنفس التوزيعه اللي فاتت
عملي الكيميا عباره عن تجارب بتعملها ف المعمل تفاعلات كيميائيه يعني
وف الامتحان بيجيبلك ماده والمطلوب منك انك تتعرف عليها وبيبقي امتحانها سهل اوي ومضمون
وفيه ف التحليليه بتشتغل تجارب بالسحاحه اسمها المعايرة برده سهله اوي


الفيزيا والاحصا
تالت ماده
الاحصا كلها من تالته ثانوي هي سهله بس مشكلتها انك هتاخد وقت عما تفهمها بالنجلش
الفيزيا فيها فروع كتير زي الضوء والكهربيه والحراره و الكهربيه وفيزيا حديثه
وفيها فرع اسمه dental materials او مواد اسنان
دي بتاخد فيها اسماء المواد المستخدمه ف الحشو ومميزاتها وعيوبها
وفرع اسمه bioactive material ده خاص بشرايح العظم وده سهل اوي عباره عن فكره مبدئيه عن تكوين الشريحه ونسبه مكوناتها كده يعني

الفيزيا بتنضاف مع الاحصا وعليهم 150 درجه 70تحريري و30 عملي و25 شفوي و25 اعمال سنه

عملي الفيزيا عباره عن تجارب ف المعمل بتشتغلها بنفسك وتطلع نتايجها و ف الامتحان مش مطلوب منك غير انك تحفظ نظريه التجربه وطريقه العمل وانك تكتبله نتايجها ولو فيه رسم بياني بترسمه
والتجارب معظمها من ثانوي زي ارشميدس والمنشور واللزوجه

وطبعا الاحصا ملهاش عملي

الماده الرابعه بقي وهي النبات والوراثه
ودي تلت فروع الاول
فسيولوجي بتدرس مكونات الخليه النباتيه ووظائفها وده سهل اوي معظمه من معلوماتك اللي من قبل كده

2- الميكروبيولوجي وده تقيل شويه وعايز حفظ وتركيز جامد
وده بتدرس فيه الكائنات الدقيقه بدايه من اصغرها وهو الفيروس
الي اكبرالممالك وهي الاشونات
وفيه بتدرس المملكه و خصائصها العامه وامثله عليها

3 - الوراثه وهي زي ثانوي بس متوسعه عنها بشويه وعايزة فهم وتفكير

هي عليها 80 درجه
30 نظري و20 عملي و15 شفوي و15 اعمال سنه

العملي فيها عباره عن تجارب ف الفسيولوجي بتكتب المشاهده والتعليق وبيبقي من فهمك للتجربه
اما الميكرو عباره عن شرايح بتتعرف عليها وبترسم الشريحه وبيبقي فيه اسئله عليها
اما الوراثه فالعملي بتاعها عباره عن مسائل

كتير كانو بيشتكو من النبات وكتير شالوه بس انا رايي انه كان سهل ولذيذ
وبالمزاكرة الكتير والتركيز هتجيب فيه تقدير وهتحبه


الماده الخامسه بقي وهي اللغه
عليها 80 درجه وطبعا ملهاش عملي او شفوي
كل اللي عليك انك تسلم الشيتات وتجاوب كويس اخر السنه





اعدادي دي سنه سهله جدا وطبعا بالمزاكره كل شئ بيبقي سهل
وربنا يوفق