[هنا الفقي]

السلام عليكم

مرحبتين

ماكنتش ناوية اكتب حاجة النهرده ... لكن كنت بتكلم مع بنانيت ف موضوع زي ده
ووحده حكتلنا قصة حلوة اوي
حبيت اقولها
واعلق عليها


بسم الله الرحمن الرحيم السلام عليكم ورحمة اللة وبركاتوا بجد كلامك جميل ويارب يارب يجعلة في ميزان حسناتك بصي يا ستي انا كنت مش منتظمة خالص في الصلاة يعني بقطع واصلي وكنت اضحك علي نفسياقول هو انا عندي وقت فاضي مع اني ربة منزل واقول انا كل يوم والتاني في المستشفي علشان بنتي الكبيرة رحمة اللة عليها كانت مريضة بالقلب ومشاكل كتير في القلب والصدر والنمو بتاعها كانت هي تسمع الاذان تجري تجيب سجادة الصلاة وتصلي مع ان عمرها صغير جدا وكانت اغاني لا وافلام فيها رقص واغاني يعني الافلام العربية بتاعتنا كانت تقولي وحشة مع انها كان سنها 4سنوات وكنت اقول طفلها لحد ما توفها الله من 3 شهور وسنها 6سنوات توفيت في حضني وهي مسكة في صدري جامد وكنت انا وهي لوحدينا في الشقة وشفت لحظة موتها بعيني والله العظيم من ساعتها مسبتش فرض واسال الله ان يثبتني علي الدين و الاخلاص في القول و العمل والله والله الدنيا دي ما تساوي اي حاجة من ساعتها وانا بمشي بكلامها-اغاني حرام افلام حرام وعلي قد ما اقدر الصلاة في وقتها لاني عايزاها تبقي فخورة بية يوم ما اقابلها تاني

معلش طولت عليكي


ام ......(اسال الله العظيم ان يرزقني الصبر علي وفاة ابنتي .... )




اوقات بنكون على معصية .. وربنا بيحبنا اوي .. وعاوزنا نقرب منو .. بيحبنا لدرجة انو بيرزقنا واحنا بنعصيه ... وقتها ممكن ياخد مننا اي نعمة عشان يقولنا خلو بالكو ... انا موجود .. ما تنسوش ... عطيتكم نعمة .. واقدر اخدها ....
من فضلكم مش عاوزين نستنى ان النعمة تروح عشان نعرف ان لينا رب
بالشكر تدوم النعم
وهي الصلاه ايه غير محاولة لشكر الله على نعمه
وان كان الشكر نعمة تستحق الشكر