السلام عليكم يا جماعه
اسمحولى اقول حاجه بسيطه كده
انا طبعا عذركم وعاذر عصبيتكم وتوتركم
بس انتم معذورين لان فعلا عامل المدرس واللى بيشرح عامل كبير فعلا واسمحولى اقول ان اكتر من تسعين فى الميه من مدرسى الاحياء للاسف حافظين وبيخلوا الطلبه يحفظوا اسطنبات
صدقونى نظام تقسيم المنهج قوالب ده مش صح
يعنى مثلا لو اتشرحلكم البنكرياس ووظيفته وعلى جنب كده اتشرح ارتباط البنكرياس بمرض السكر والضغط ده اكيد هيشغل دماغتكم اكتر ويعيشكم الواقع الطبى اللى اكتركم بيحلم يخشه
انما ادى الطلبه قوالب طوب احفظ يا بنى وظائف البنكرياس
احفظ مضخه الصوديوم والبوتاسيوم الى اخره
انا فى نهائى طب يا جماعه وصدقونى صدقا واسمحولى اختلف مع كل الطلبه والمدرسين
امتحان الانجليزى انا شايفه كويس جدا وفعلا ده الامتحان اللى المفروض تكون عليه كل امتحانات الانجليزى
واحد مكن يوقلى انت عبيط ده جالنا فحط
هقوله ايوه جالكم فحط لانكم بتذكروا الانجليزى والرياضه والفيزيا باسلوب الدرسات الاجتماعيه والجغرافيا حفظ حفظ حفظ صم صم صم مافيش تشغيل دماغ
لو جيت قلت لك بتاكل ايه على العشا هتجاوبنى لو قلت لك على العشا بتاكل ايه هتتخشب ومش هتعرف ترد وده ليه لان مدرسينك ومنظومه التعليم الفشله سستمتكم على موضوع لن يخرج عن كتاب الوزاره وعن النماذج
يا جماعه فيه حاجه اسمها قطعه تيجى من المنهج
قطعه فى امتحان لغة انجليزيه تيجى من المنهج طب سبنا ايه للجيولوجيا والتاريخ
لا يا جماعه بصراحه دماغ الوزير عجبناى
لان مقياس دخول الطالب للطب او الهندسه هيا المجموع الكبير ومقياس المجموع الكبير هو الدش والحفظ والحشو والصم ده اكبر وافشل مقياس
لانى مكن اكون موهوب وكويس فى مجال علم وتحت ضغط الاهل وتحت ضغط عقدة النقص المتملكه من الشعب المصرى الا وهى كليات القمه وكليا القاع ممكن احول تفكيرى عن موهبتى اللى ممكن تكون كمبيوتر ممكن تكون رياضه مكن تكون اهتمام بالالات الكهربيه وبدل اما انميها يستلمنى ابويا او امى وهاتك يا خناق بينهم الواد يخش طب لا الواد يخش هندسه وكان ابنهم حته خشبه
الشاهد يا جماعه
اقسم لكم بالله انا فى كلية الطب اللى كتير يمكن بيحسدونى عليها ويوسفنى اقولكم انى فعلا ما كنتش اتمنى انى اخشها
لانى المجال اللى بحبه هو الرياضيات ولم اكتشف ذلك الا متاخر وانا للاسف كنت كويس فى الاتنين وطبعا عملت مبدا استخسار المجموع ودورت ايه احلى كليه وليها بريسجتيج قالولى الطب قلت اما اخشها
ودخلتها وانا للاسف غير متوافق معاها نهائى وعلى فكره انا مش حاله فريده اكتر من تمانين فى الميه من طلاب الطب غير متوافقين معاها
ودلوقتى صدقونى باقدم على كلية علوم قسم رياضه بعد اما اخلص الكليه لانى قررت انمى موهبتى اللى عندى ولن ارضخ لتحطيمها اكتر من كده
اللى عاوز اقوله من كل القصه دى بلاش نغمه كليات قمه وكليات قاع
اديكوا شايفين حال الدكاتره وحمدى السيد بيلطم على وشه من مرتبات الدكاتره واده ايه حال الطب منهار والدكاتره فعلا على شفا انهيار صدقونى لو دخلتوا على موقع egymedecineهتعرفوا اد ايه حال الطب فى قمة السوء بل هو السوء ذاته
اوعى تزعل علشان الخمسين نمره راحت
صدقونى يا جماعه بلدنا عمرها ما هتنهض لو حطيت فى الطب واحد موهبته فى الميكانيكا وعلشان خاطر ابوه حفظ وصم ودخل طب وحطيت فى هندسه واحد موهبته فى الطب
وهكذا كل واحد داخل كليه دماغه وموهبته الحقيقه الدفينه فى حتة تانيه خالص وده يقع تحت طائلو الشخص الغير المناسب فى المكان الغير المناسب بالفكر الغير المناسب
اوعوا تزعلوا علشان ماجبتش 98 فى الميه او 99
والله انا اول منطقتى عام 2000 وجايب 98 فى الميه
بس لو يرجع بيا الزمن لورا عمرى ما كنت هخش طب وده ليه لانى مش متوافق معاها نهائى واكتشفت انها مش ميولى متاخر بعد ما ضيعت من عمرى كتير
بس الفرق بينى وبين غيرى انى ماغنتش ظلموه وقلت بعد ما شاب ودوه الكتاب
لا عندى العزيمه والاصرار انى ابتدى فى المجال اللى بحبه من الصفر وعندى العزيمه والاراده انى اكون حاجه فى المجال وهيبقى تحدى لنفسى ولكل الناس اللى هتقول عليا معتوه اللى ساب الطب ورايح يدرس علوم رياضه بحته
ده يا جماعه فعلا اللى مصر عاوزاه الشخص المناسب فى المكان المناسب بالفكر المناسب
اوعوا تزعلوا على اللى راح انا اسف طولت عليكم بس حبيت احكيلكم قصتى علكم تاخدوا عبره وعظه وماتزعلوش من شىء قد تكتشوفه وحش وهو فى الحقيقه كل الخير ليكم
وربنا يوفقكم وينجحكم ان شاء وتقبلوا مرورى
|