فعلا احنا مسألناش نفسنا احنا متأخرين ليه
هو احنا ينفع نبعت لحد نسأله احنا متأخرين ليه
مفيش حروب امريكا بتساعدنا و الخير كتير و الناس اللى تشتغل موجودة
انا حاسس ان الحكومة والشعب اتنين متخاصمين
عارفين الاحساس اللى الواحد بيحسه لما يخش مصلحة حكومية
تحس ان انت داخل بيت عدوك او فيه حد جوه هيضربك لو اتكلمت
مع ان الناس اللى هم الشعب والحكومة كلهم مصريين
و ممكن يبقى قريبى عمى اخويا ابويا ابن خالتى
امال فى ايه ؟
كل يوم فى التلفزيون يجيبوا المشاكل اللى فى مصر
و انا مش فاهم ازاى المشكلة بتطلع عالتلفزيون قبل ما الحكومة
تتحرك عشان تحلها و كأن التلفزيون هو العين للحكومة العمية
او اللى بتلف وشها لما تشوف حاجة مش عجباها
طيب بذمتكو مبقيتوش تزهقوا لما تلاقوا البرنامج جايب مشكلة
و تحسس ان انت بتجرى ورا الحاجة التافهة عشان تطلع من المود
هو اساسا التلفزيون تلات ترباعه تفاهة بس تلاقى نفسك بتدور على
اتفه حاجة
حتى الناس اللى فى التلفزيون فهموا تلاقى فيه سؤال
عالتلفزيون بيقولك مين بطل فيلم اسماعيل يس فى الجيش
استهتار و استخفاف بعقول الناس بطريقة غريبة
و انا ليا تفسير واحد للى بيحصل فى التلفزيون ده
ان كل ده معمول عشان يخلق التبلد عند الناس
و فعلا ده اللى حاصل
لو جيت سمعت ان فيه 10 مليار جنيه مش عارفين راحو فين
هتلاقى نفسك عادى ولا عندك اى مشكلة
لو جه فى التلفزيون ان فيه سبع حيوانات اغتصبوا بنت فى طريق عام
تلاقى نفسك عادى بس لو جيت تفكر ان دى كان ممكن تكون اختك او
امك او حد قريبك
برده هتلاقى نفسك عادى وتلاقيك بتطرد التفكير
كل يوم مات مش عارف كام فى فلسطين او العراق
اسرائيل تطرد ناس من بيوتها و تبنى مستوطنات جديدة
وبرده عادى مفيش اى مشاكل
انا حاسس ان التلفزيون او الاعلام ده معمول عشان
عدوى يطلعلى لسانه
مش شرط يكون اسرائيل لا وولاد بلدى
و مش شرط الحكومة لا و الناس العادية برده
بحس ان هم مثلا بيشتمونى او بيضربونى على قفايا
وانا عامل فيها مش واخد بالى
ويجيلى فى التلفزيون يقولى انت مخدتش بالك ولا ايه
انا شتمتك والله يا عم شتمتك و بيطلع لسانه
ربنا يستر