اجمل حاجه انك بتقرأ أراء وتشوف حوارات بس معظمها مجرد أفكار بدون حقايق ممكن تلاقي واحد او اتنين بيتكلم عن تجربة وعن ادراك لحدود الموقف وتفاصيله لكن محدش بيحاول يفكر ان رأي الانسان التاني ده صح وتقولي يا سيدي انا بكلمك عن تجربة لكن انت بتتكلم عن منطق رسمه ليك عقلك ومش دايما منطق العقل صح لكن هو لا طبعا مش هقتنع انت اللي كنت تجربة مش صح ...
ما علينا
المهم بقي يا سيدي انا هقولك علي رأيي في الموضوع ده
اللي بيقول ان الحب من خلال الانترنت وهم
بقوله انت غلطان لان في تجارب كتير تثبت انه موجود فعلا مش وهم وهتلاقي معظمنا يعرف حد وقع في تجربة من النوع ده وبعضنا وقع شخصيا فيها وانا عن نفسي أعرف قصة بدأت من النت وانتهت بجواز وحتي الآن الحمد لله سعداء وعايشين حياة كويسة وربنا رزقهم ببنت زي القمر ربنا يخليها ليهم .
واللي بيقول بقي حكاية انهم بيقعدوا يكلموا بعض سنة مثلا ويرسموا لبعض صورة وبيقعدوا يتخيلوا بعض هو يتخيل فتاة احلامه وهي تتخيل فارس احلامها
معتقدش ان لسه في حد بالسذاجه دي ويعمل فيها احمد حلمي في فيلم ميدو مشاكل بيكلم مديحة في التليفون ويروح يقابلها في سينما وبعدين تطلع مسجلة خطر . دلوقتي لما يوصلوا لمرحلة انهم يتقابلوا بقي في اختراع اسمه صور بيقدروا يشوفوا بعض وتنتهي مرحلة التخيلات " عارف هتقولي ممكن توريني صورة بنت اختها ولا حتي صورة اليسا هقولك طيب ليه اذا كنت هتقابلها وتعرف الحكاية " ما علينا المهم انا عايز اوصل انه الموضوع لما بيوصل للمقابلة والاحراج اللي ممكن يحصل في المواقف اللي ذكرتوها اصبحت حاجه نادرا ما بتحصل "
طبعا اللي قال انه حرام انا مقدرش افتي في حاجه انا معرفش حكمها لاني للاسف واكرر للاسف لست متفقها في الدين بالقدر الذي يعطيني الحق لاصدر فتوي .
بس سيبك بقي يا عم من اراء الناس وقلنا انت رأيك
حاضر هقولك
بص يا سيدي الحب عن طريق النت بيجي كالأتي بنت عرفتها بأي طريقة كانت من منتدي مثلا او شات عام المهم عرفتها وخلاص وبقيتوا تتكلموا بصفة شبه مستمرة ممكن في البداية يبدأ الموضوع بتزييف حقايق وكلام هو اقرب للمثالية منه للواقع لان كل انسان بيحاول يرسم في نفسه الصورة المثالية من وجهة نظره قدام الشخص التاني وبيحاول يظهر بيها دايما بس الموضوع بيتكشف بعد كده بسرعه لان القناع لازم بيقع في بعض المواقف والقصة هنا مش بتبان من عنوانها زي الروايات اللي بنقراها لكن القصة بتبان من المواقف اللي بيتحط فيها البطل وبينفعل بكامل انفعاله وبيظهر علطول الوجه الحقيقي للبطل " سيبك بقي من ادهم صبري والرائد نور والناس دي "
بيبدأ الحوار عادي مش بنفكر في حب وكده عادي جدا بتتكلم معاها زي اي بنت ممكن تكلمها وبعدين بتبدأ تعجب بأفكارها واسلوبها وطريقتها ومع الوقت زي ما قلت كل واحد بيبقي علي طبيعته اكتر ايا كان الانسان بيزهق من التمثيل وهنا بقي مرحلة الاعجاب تبدأ تطور وتلاقوا نفسكوا ااتعودتوا علي بعض وتبدأوا تتكلموا بانتظام ولو حصل مره ومش اتكلمتوا في الميعاد يركبك ميت عفريت وتحس ان في حاجه ناقصه منك ...
هتبدأ تفكر طيب انا ليه مخنوق اوي كده اني مكلمتهاش هي ايه بالظبط بالنسبه لي ؟؟ 
لو سألت نفسك السؤال ده اعرف انك كنت ماشي بالعربية بتاعتك في طريق زراعي وماسك الحارة اللي في الوسط ومش هامك اي حد ومنطلق بسرعة الصاروخ بس فجأة لقيت قدامك يافته بتقول انتبه ده اخر دوران هتقابله في الطريق ده بعد كده مفيش طريق للعودة وتروح ضارب فرامل مره واحده وواقف في وسط الطريق ولا كأنك سامع الكلاكسات اللي حواليك ولا حاسس بأي حاجه اصلا انت مجرد وقفت وبتفكر في حاجه من تلاته
ناس هبله زي حالاتي</span> وهتعمله
دور عربيتك وخد يمينك بردوه وبردوه هتروح عن الدوران بس مش هتلف وترجع تاني لأ انت هتحاول تثبت لنفسك انك سواق ميه ميه وهتمشي في المخالف وتقول لنفسك اهو انا كده بقيت في الأمان ممكن في اي لحظة اضرب فرامل وارجع تاني</span>
" وده معناه انك بتقول لنفسك لا لا عادي جدا دي واحده زي اي واحده وده مش حب ولا حاجه دي مجرد مسألة تعود بس ممكن ابطل اكلمها في اي لحظة وانسي الموضوع من اساسه وخلاص علي كده "
بس للاسف انت ملحقتش تقرأ اللي مكتوب بخط صغير علي اليافته اللي فاتت لانك علي ما اتخضيت من الكلام وضربت فرامل مره واحده كنت عديت اليافته خلاص
اقولك انا كان ايه اللي مكتوب " لاحظ انك بعد الدوران لازم تنسي ان في حاجه في عربيتك اسمها تجيب ورا وتمشي بضهرك ولا حتي في فرامل توقفك في مكانك وتكتفي حتي هذا القدر "
فهمت بقي قلتلك ليه ما تعملش اهبل زي حالاتي في الاول وتاخد الحل التالت لانك كده يبقي هتكمل هتكمل ومشيت في الطريق مظبوط او مشيت في المخالف كل الطرق تؤدي إلي مالطة في النهاية
اشمعنه مالطه ؟؟
هم بيقولوا كده انا مالي خليك معايا
هقولك علي حاجه تانيه الحل التالت معناه انك ماشي في المخالف يعني زي ما قلت هتكمل هتكمل بس تعبت نفسك علي الفاضي عمال تفادي ده وتفادي وممكن تلبس في ده
" اللي هو معناه يعني انك كل شويه قاعد تقول لنفسك انا لازم ارجع عايز ارجع بس مش هتقدر يعني لا رضيت باللي انت بتعمله ولا عارف ما تعملوش يعني حبيت يا باشا بس معذب نفسك لانك مش راضي بحبك ده"
<span style="color:#3333FF">بس يا سيدي دي الحكاية
اما نهاية الطريق بقي تختلف حسب العربية اللي انت راكبها
انا رغاااااااااااااااااااااااي جدا جدا جدا وصراحه انا مش عارف كتبت الكلام ده كله ازاي بس يلا بقي ربنا معاكم وتقرأوا
بس لو قرأتوه ياريت حد يعبرني ويقولي يا عم ايه الهبل اللي انت كاتبه ده
.
.