إلي معلمي مصر المتعاقدين
بداية أحب أن أعرفكم بنفسي فأنا مدرسة حاسب آلي للمرحلة الإعدادية بنات بكاملها يعني من أولي إعدادي و حتى الثالث الإعدادي مرورا بالثاني طبعا آخذ من الحصص أكثر من النصاب القانوني و متعاقدة بالأجر منذ 15/10/2002 - لما كان المتعاقد مرتبه 90 جنيه - و منذ سنتين تقريبا و بالتحديد في 1/4/2008 تم عمل العقد الجديد (العقد المتميز) للمعلم المساعد و مدته سنتين قابلة للزيادة من قبل الوزير و المحافظ ... و بالتأكيد تعرفوا حضرتكم مدي أهمية الكمبيوتر في الحياة بالكامل و تعرفوا أيضا العجز الشديد في مدرسي هذه المادة و لكنهم لم يتذكروني إلا بعد 7 سنوات من العمل بعمل العقد المتميز و طبعا كل السنين دي كان يتخصم مني تأمينات اجتماعية و تأمين صحي و سألت في التأمينات الاجتماعية عن رصيدي وجدت انه صفر خالي الوفاض يعني لو فكرت اني اترك العمل يبقا كل السنين دي راحت عليا ده حتى النقابة مش اعترفت بيا و انا خريجة كلية التربية و حاصلة علي بكالوريوس في التربية بالإضافة لتمهيدي ماجستير في التربية و مع ذلك قالت لي النقابة انتي متعاقدة مع الحكومة مش ليكي نقابة لو كنتي متعاقدة مع مدرسة خاصة كان حيبقا ليكي نقابة بالله عليكم ده كلام يعقل و راحت كمان فرصة دخول النقابة و ادفعي بقا كل اللي متراكم عليكي من يوم ما اتخرجتي لحد تاريخه بس لما نبقا نعترف بيكي علي أساس مني قاعدة علي كنز و حدفع 10 سنين علي الأقل.
و كل ما تسأل في الإدارة التعليمية أو المديرية عن التعيين لأن العقد مدته سنتين فقط يكون الرد مش تحمدوا ربكم أنهم عملوا ليكم العقد ده غيركم مش لاقي شغل ... رد غريب زي ما يكون إحنا بنسرق منهم أو بنقاسهم في مرتباتهم ليه مش عارفه محدش فيهم فكر إن ممكن ابنته أو ابنه يكون في نفس الوضع ده و يترد عليه نفس الرد الجارح ده - فكما تدين تدان – ربنا المعين
آسفة إن كنت أطلت عليكم لكن الإطالة يمكن تنفع في أي جزء من الشكاوي المأمول قراءتها من المسئولين و كان هناك بصيص من الأمل ففي أول شهر 7/2009 تقدم الوزير بتصريح بأنه سوف يعين المعلمين المتعاقدين من ينطبق عليهم شروط التعين و ظهرت النشرة في يوم 5/8/2009 و لم نخطر بها و علمنا بها بالصدفة – و كان رد الموظفة المسئولة بالإدارة أن مكان المدرسة التي اعمل بها بعيدة عن مقر الإدارة مع العلم أنه بنص جنيه حتوصل لحد باب مدرستنا في اقل من نصف ساعة ما علينا- و كانت النشرة تنص علي أن يتوجه المعلمين المساعدين بكافة أوراقهم للمديرية التعليمية التابعة لمحافظتهم في موعد أقصاه 15/8/2009 و من لم يلحق التقديم يتجه إلي الأكاديمية المهنية للمعلمين الموجود لها فروع في كافة المحافظات في موعد أقصاه 30/8/2009 حتى يستطيع دخول امتحان الكادر للحصول علي شهادة مزاولة المهنة و الترقية لدرجة معلم – بعد 7 سنين سوف احصل علي شهادة مزاولة المهنة اللي قعدوا المدة دي كلها زمانهم بقوا معلم أوووول مش معلم بس – ما علينا قدمنا الورق المطلوب و هو :
3 صور شخصية
صورة من شهادة التخرج مختومة بختم النسر من المدرسة و مكتوب عليه صورة طبق الأصل
صورة من شهادة التأهيل التربوي (الدبلوم العام في التربية لغير خريجي التربية) مختومة بختم النسر من المدرسة و مكتوب عليه صورة طبق الأصل
صورة الرقم القومي
تقرير التوجيه و مختوم بختم التوجيه أو ختم النسر
تقرير مدير المدرسة و مختوم بختم النسر للمدرسة
خطاب ترشيح من مدير المدرسة لترشيح المعلم المساعد لدخول أول اختبار للأكاديمية مختوم بختم النسر و المدرسة
صورة شهادة الرخصة الدولية للكمبيوتر icdl مختومة بختم النسر و مكتوب عليها صورة طبق الأصل و من لم يحصل عليها يكتب إقرار باجتياز كافة اختباراتها في خلال سنة من تاريخه
و أخدنا الوصل بالورق الذي تم تسليمه و سألنا حنعمل ايه بعد كده قالوا استنوا حنبعت لكم طيب حيبعتوا امتي و أنا عقدي مدته سنتين يعني حيخلص 1/4/2010 تفتكروا حيلحقوا يمتحنوني و يدوني الشهادة المزعومة طيب لحقت و امتحنت و نجحت إن شاء الله ايه اللي حيحصل بالنسبة للسبع سنين اللي فاتوا من ناحية التأمينات الاجتماعية و النقابة امتي حيعترفوووووووا بياااااااااا ولا خلاص راحوا عليا
بالله عليكم أغيثونا من الظلم في هذه الأيام الكريمة
يا حي يا قيوم برحمتك نستغيث فأغثنا
يا حي يا قيوم برحمتك نستغيث فأغثنا
يا حي يا قيوم برحمتك نستغيث فأغثنا