الرد دا قرأته فى احدى المنتديات و عجبنى جداا
لأنه منطقى بشكل كبير .. دا رد على واحد محتار بين هندسة و حاسبات
.
.
.
انا تقريبا دلوقتى بعانى من نفس الصراع اللى انت فيه .. لكن الحمدلله انا مقتنع جدا بحاسبات و قدرت اقنع اللى حواليا
و حتى اللى مقتنعش .. رميت كلامه ورا ضهرى .. متخليش حد يحقق احلامه فيك
ولا تخلى حد يعيش عليك دور الفاهم .. لأن تلت تربع الناس بيتكلموا و خلاص و هما مش فاهمين ايه حاسبات دى اصلا
و لو هتدخل هندسة لمجرد ارضاء الناس و اهلك و يبقى اسمك مهندس
يبقى عمرك ما هتنجح فيها .. ولو نجحت فيها هتتعب جدا فى حياتك العملية
انا عاوزك متبصش تحت رجليك .. و متبصش لاسم الكلية
بص لسوق العمل .. و تبصلوا كمان خمس سنين مش دلوقتى
المستقبل لحاسبات مش هندسة
هندسة الدفعة بتاعتك اللى هم داخلين السنادى هيتخرج منها 21 الف طالب و قدهم فى الجامعات الخاصة
دا غير 4 دفعات قبلهم .. يعنى قول على الاقل 100 الف مهندس فى خلال الخمس سنين الجاية
يعنى منطقيا هيبقى مستحيل نصهم بس يلاقى شغل مهما كان الاحتياج للمهندسين .. أصل احنا فى مصر مش فى المانيا
و اللى هيلاقى شغل هتبقى مرتبات مش مناسبة و طبيعة عمل مهينة غير اللى هيتفوقوا بقى دا موضوع تانى
و حتى السفر هيبقى صعب
لأن الدول العربية دلوقتى عندها خطط للاستكفاء من العمالة المصرية
بل و ابتدى فعلا الاستغناء و تسريح مصريين كتير
يعنى مش بس مش هتعرف تلاقى وظيفة فى الخارج .. لأ دنتا هيجيلك ناس من بره ينافسوك و يقطعوا عليك فى فرص شغلك
غير كدا
انت فى حاسبات هتقعد 4 سنين بس منغير العقد و حشو المناهج بتاع هندسة .. و الكل اجمع ان حاسبات دراستها بالرغم من صعوبتها اللا انها ممتعة جدا
و هتتخرج بعد 4 سنين هيبقى اسمك مهندس بروجرمر او ديفولوبر .. و بشوية كورسات هتبقى كومبيوتر سينتيست و دول محدش يقدر يكلمهم فى البلد
و الدفعة كلها على مستوى الجمهورية 5 اللاف طالب بالكليات الخاصة
75 % منهم بنات .. قول تلت تربع البنات دول هيتجوزوا و يقعدوا فى البيت
و المنافسة على فرص العمل هتقل
يعنى وش هتلاقى شغل محترم جدا
و كمان شغل حاسبات أشيك و أمتع من هندسة
هتقعد فى تكييفك يا برنس قدام لاب توبك و تبرمج .. ولا فى نزول مواقع .. ولا كل يومين تروح الصحرا تبنى ولا تقف على بريمة بترول او تصلح تكييفات و تلاجات
ولا هتروح تراقب جودة و صيانة فى مصانع العاشر من رمضان و 6 اكتوبر .. ولا تشتغل فى محطة القاهرة لتوليد الكهربا و يبقى اسمك كهربائى بعد خمس سنين دعك
لكن فى حاسبات مش هتتبهدل م الاخر
المشكلة ان الكل ماشى بسياسة القطيع .. و البلد كلها هتبقى مهنسين باين
بالنسية لقسم الحاسبات و الاتصالات
انا واحد أعرفه اتصالات متخرج منه بقاله 3 سنين و ملقاش وظيفة مع ان تقدريه جيد جدا
لف على شركات كتير .. قاولوله روح خد الكورسات الفلانية دى و تعالى بعد سنة نشغلك
يعنى قعد 5 سنين مطحون عشان فى الاخر يطلع يكتشف ان كل اللى درسه دا ملوش علاقة بسوق العمل
خدها من قاصرها و راح خدلوا كورسين ماركيتينج و بيزنيس .. و بقى شغال سيلزمان بمرتب محترم
دا بالنسبة للاتصالات
بالنسبة لهندسة الحاسبات
هى أنضف قسم فى هندسة .. بس سوقها فى مصر مش ماشى
اصلهم بيهتموا اكتر بالهارد وير .. و احنا هنا فى مصر ولا بنصنع ولا بنركب حتى
فيا اما يطلع من ال 10الاوائل و يسافر بره و يبقى كدا عدى .. و دى صعبة
يا اما يشتغل صيانة .. و دى ممكن اى حد ياخد كورسات و ينافسه فيها
يا اما يشتغل الشغل بتاع حاسبات و معلومات .. و طبعا مش هيكون احسن مننا فيه
|