[الاسطورة]

بسم الله الرحمن الرحيم
باذن الله ها نبدأ مع بعض يا جماعة وربنا يعديها على خير ان شاء الله
شوفوا انا ها اقسم الطفولة مراحل عشان ما نتعبش
بس الاول احب انبهكم انى عندى زهايمر وده معروف يعنى
------------------------------------
انا ترتيبى اللى ف النص بين اخواتى عندى اختى اكبر منى ب3 سنين_هندسة اتصالات_ واخويا اصغر منى بسنتين_2 ثانوى_
_نبدأ بقى باول يوم ما انا اتولدت بابا جاب كيس مليان شيكولاتة وبسكوت ومصاصة وشيبسى لاختى وولاد عمتى وقالهم النونو اللى جايبه علشان يحبونى يعنى
_ف السبوع بتاعى بنت عمتى اللى هى اكبر منى بحوالى 6 سنين كانت بتقول لاختى انا يا ها احرقك يا احرق اخوكى ...اختى قالتلها احرقى اخويا طبعآ

_فى رمضان بقى لما كان بابا بيجيبلى الفانوس كنت باجرى اقابله ع الباب واخد الفانوس واجرى وف مكان معين ف الصالة اقع والفانوس يتكسر
بيقولوا الحكاية اتكررت كتير وف نفس المكان (قال يعنى مثلث برمودا)
_وانا صغير كنت باحب قوى العب استغماية ف البيت مع اختى بس غالبآ كنت باتقفش لانه مش كان عندى فن ازاى تستخبى
_وانا باستحمى دايمآ كنت باقعد اعيط لان الصابون كان بيدخل ف عينى لكن ها نعمل ايه بقى
انا قديم على ايامى مش كان فى شامبو جونسون ل الاطفال
_طول عمرى وانا جنتل كنت بالبس ف البيت جلاليب صغنططة كده جميلة قوى كنت باحبها جدآ كنت مخططة بالطول ومنها الوان كتيرة قوى _مش لاقى ولا واحدة منهم دلوقتى اجيبلكم صورتها _
_وانا صغير روحت مرة مع ماما المدرسة نجيب اختى بيقولوا انى بقى نزلت الحوش وقعدت اجرى وهما يجروا ورايا وانا ابدآ مش راجع
حتى الان ماما مش ناسيالى اليوم ده لان الساعة كانت 2 والجو كان حر بقى
_فى يوم من ايام الحضانة تانى او تالت يوم يعنى كنت رايح بشنطتى كانت جديدة وجميلة بقى ..المهم اتبدلت مع شنطة بنت كان اسمها مروة انا فاكر ..المهم شنطتها كانت قديمة ومتشخبط عليها بالجاف كتييير قوى ...لما روحت البيت ماما كانت ها تقتلنى تقولى من اول يوم عملت ف الشنطة كده المهم فتحتها لقت جواها سندوتشات بطاطس وانا مش كنت واخد بطاطس فا ده كان دليل البراءة

دى المواقف اللى انا فاكرها ف الطفولة قوى يعنى
انتظروا المرحلة الجاية مرحلة ابتدائى ودى انا فاكر فيها كتير
مش ها اتأخر عليكم ها استريح شوية بس