السلام عليكم
انا كنت افتكرت محدش حيرد وتقريبا نسيت الموضوع. شكرا ليكم كلكم فعلا انتوا تقريبا ريحتونى من حاجات كنت بفكر فيها ومش عارف اعمل فيها اية
وربنا يجازيكم بكل حرف كتبتوه كل خير
أسيل رزق :- شكرا قوى على اللينكات فعلا فيها حاجات مهمة جدا خصوصا الرد بتاع dr.saeed فية افكار جميلة وبالنسبة للكتب انا كنت بسئل مدرسين وكدة وفعلا الكتب اللى انتى كاتباهم هما احسن حاجة بس فى الرياضة فية كتاب لامى هو معظم الناس قالولى اجيبه, وحاتكل على الله وحاكمل علم نفس كدة كدة علم النفس بيتاخد من اول السنة والاقتصاد والاحصاء بيتاخدو من نص السنة لو لقيت نفسى مش حابب علم النفس او حاسس انى حانقص فية حاشوف الاقتصاد والاحصاء وان شاء الله خير.
sooomaaa :- هو بالنسبة للاقتصاد والاحصاء انا مفيش حد قابلته قالى عليها انها فيها اى صعوبة بس المشكلة ان الامتحانات بتاعتها هى اللى بيقولو انها بتيجى ساعات تعجيزية وتخليها اسهل مادة واصعب امتحان,
وبالنسبة لمادة المستوى الرفيع انا اصلا بحب الانجليزى بالرغم من انى مش ناوى على اى كلية ادبية يعنى لو لاقدر الله ملحقتش هندسة حادخلها خاصة او حادخل علوم بس الصراحة الانجليزى بالنسبة لى هو المادة الوحيدة اللى مش بخاف منها حتى لو رخم فى الامتحان وجابو صعب,
على فكرة انا مش بنت بس قمر
د/ نـــ غ ـــم :- تانى اقتصاد واحصاء... شكلى حاخدهم ولا اية, فعلا انا حاحتاج وقت عشان احل اكتر على الرياضة والفيزياء عشان كدة حاسس انى فى الاخر بنسبة 90% حاخد المادة دى, بس حاجرب الاول علم النفس لو لقيته مادة لذيذة وحبيتها حاكمل فيها, ولو مش كدة حاخد اقتصاد واحصاء ومش حبقا متأخر فى الدراسة بتاعتهم. وكدة كدة حاعمل استخارة وان شاء الله ربنا حيهدينى للى فية الخير
وعلى فكرة عندك حق فى حكايت المسائل الصعبة انا فعلا مش حابتدى حل المسائل دى الا فى شهر 3 او 4 عشان انا السنة اللى فاتت عقدت نفسى جامد وحليت حاجات صعبة جدا وفى الاخر الامتحانات جت سهلة ولاسف استهترت بالحاجات السهلة, بس قدر الله وما شاء فعل و الحمد لله. وفعلا الفكرة بتاعت تلخيص النقط الصعبة دى جميلة جدا وكنت عاملها السنة اللى فاتت وجابت معايا نتيجة كويسة.
وان شاء الله مادة المستوى الرفيع حاظبطها مع المدرس بتاعى بدرى عشان مانقصش فيها
وربنا يوفقك يادكتورة وتجيبى التقدير اللى نفسك فية
Eng. A'laa Salah :- فعلا انا مش بعرف احفظ الحاجة بالنص, عشان كدة لو كان علم النفس حفظ بالنص يبقا مش حينفع معايا, وفعلا كلامكم كلكم مشجع على الاقتصاد والاحصاء وربنا يهدينى للى فية الخير,
وشكرا قوى على نصايحك وحاخد بيها ان شاء الله, وبالنسبة للانجليزى ان شاء الله حابتدى فية من قبل نص السنة لو حسيت انه تقيل بالنسبة لى.
وربنا يوفقك ان شاء الله ويوفقنا كلنا