[عاشقـــ الانمى ـــة]

المشاركة الأصلية كتبت بواسطة Rymonda

ســــــوري يا جماعه على التأخير ..بس ظروف النت عندي الحمد لله زي الـ ( ــــ )

نأسف لقطع الارسال !!

نكمل بقى الجزء الاخير .. عشان حاسه ان اختكم مرموره هتولع فيا خلاص ..

انا كان المفروض اخلص امبارح .. بس منتداكو هو اللي باظ بقى ,,اعمللكم ايه ؟

نكمـــــــــــل ..

* لما جيت مصر بقى ..قالوا يودوني لشيخ عشان افضل احفظ قرآن يعني وكده ..روحت للشيخ كان جارنا ..وبدأت الحمد لله احفظ معاه وكده..بس لما المدارس جت بدأت استهبل ومروحش وساعات اروح متأخره ومش حافظه كمان ..لحد ما في يوم روحت ومسمعتش ولا كلمه ..قاللي قومي روحي يا اميره ..قولتله هو مفيش درس النهارده؟

قاللي لا النهارده ولا اي يوم ..فهمت بقى اني بتطرد بس بزوق ..قولتله وانا اساسا كنت هسيبك واروح لشيخ تاني ..وقومت جري احسن يضربني ..

ومن ساعتها كل ما اشوفه ماشي امشي من حته تانيه ..حتى جابوه البيت يحفظ اخواتي ..فدخلت عليهم مره ..فبيقوللي انتي تاني ..قولتله يا عم انا جايه اخد حاجه من الاوضه..

هههههههههههه

*ولما جيت مصر برضو مكنتش اعرف حد هنا ..كان الواد احمد ابن الجيران هو الجايد بتاعي هنا ..احم احم

هو اللي عرفني بقى على بنات وكده ..وعرفني على المدرسين اللي روحتلهم دروس بعد كده ..ربنا يكرمه ..كنت بشغله سيرفانت ..هههههه

(كنا اطفال على فكره)

*مره في واحد صاحب بابايا كان كل يوم يتصل بينا ..شغل بقى وبتاع ..وسبحان الله كل يوم انا اللي برد..كل ما ارد عليه يقوللي ازيك يا احمد . الكلمه دي كانت بتموتني ..بس طبعا صوت الاطفال بيقى شبه بعضو الولاد والبنات وكده ..فكونت اقوله انا اميره يا عمو مش احمد ..وكل يوم يتكرر الموقف ده..
لحد ما في يوم بيقوللي ازيك يا احمد ..قولتله يخرب بيتك يا عمو هو حضرتك مبتفهمش ..كل يوم اقوللك انا مش احمد..ايه ده..
ولحسن الحظ مامتي راحت واخده مني السماعه مني بسرعه وقالتله معلش اطفال بقى ..المهم الحج مش موجود ..
(خلي بالكم وانا بشتمه بقوله حضرتك ..اخر احترام والله..زوق من يومي)

ههههههههههه

*طبعا بقى في الاعدادي ..كنت انا الليدر بتاع فريق الموسيقى ..كنت بعزف اكسليفون..وكنت انا الـ singer برضو
احم احم
كنت علطول لما اجي اغني ..الفرقه تعزف حواليا بحيث اني مبقاش باينه وانا بغني ..يبقى الصوت بس هو اللي واصل للجمهور ..هههههههه..(كنت بتكسف انا)

ويومها اتفقوا عليا الخونه ..كنت بغني ست الحبايب لسه فاكره ..وخلوني بغني واندمجت وراحوا قايمين فجأه ..كل المدرسه شافتني ..احمريت بقى واخضريت طبعا..بس كملت الاغنيه ..ومن ساعتها حلفت عليهم مش هغني تاني ..هعزف بس ..

*كانت مامتي بتدرسني في المرسه ..كانت مدرسة الرياضه ..ومره وفي حصة هندسه ..اديتنا تمرين وقالت اللي هيحلوا يبقى جدع ..وتقريبا في جايزه وكده ..فطبعاً كل فراودة الفصل وعلى رأسهم انا استعدينا ..فحطت التمرين على السبوره وبتدينا نفكر طبعاً..والفصل كله كان ســـــــــــــاكت ..مفيش صوت خالص ..
وانا حسيت ان في معطى ناقص ..قومت بأعلى صوتي قولتها (ماما)..خلي بالكم ماما دي واحنا في الفصل ..يالهوي الفصل كله انفجر في الضحك ..حتى هي ..وانا اتكسفت جداً..بتقوللي عاوزه ايه بقى ..قولتلها لا مفيش خلاص ..كمان شويه لقيت واحده سألت السؤال اللي كنت هسأله قولت الحمد لله..ويومها برضو محدش حل التمرين خالص ..عالم فشله !!

اخــــــــر حاجه بقى عشان حاسه انكم خلاص هتولعوا فيا ..

* كان المدير بتاعنا في اعدادي راجل رخم جدا ..كل ما حد يطلع اذاعه ..يقول ستوب ..ويجيب الطالب اللي بيقول الـ(هل تعلم )مثلاً .ويسأله في اللي كان بيقوله لحد ما يدوخه ..عشان كده محدش كان بيحب يطع الـ(هل تعلم )خالص ..انا كنت بطلع كل يوم والحمد لله..
بس احياناً مقدمه واحياناً كلمه واحياناً هل تعلم ..وسبحان الله في يوم اذاعة الرياضه كنت طالعه هل تعلم في الهندسه وكده ..راح مناديني ..وراح راسملي بالعصايه بتاعته تمرين ع الارض كده ..وقاللي اثبتي كذا كذا ..روحت انا باصه لمامتي ..

قاللي ملكيش دعوه بماما ..وماسكلي العصايه كده ..وموترني خالص ..وانا مبعرفش افكر تحت ضغط .. بس الحمد لله اثبتها وعدت ..ولحد النهارده انا معرفش الفكره جت في دماغي ازاي لاني كنت متوتره جدا ..بس عدت الحمد لله !!

خـــــــــــــــــلاص ..
خلصت

دي يعني اهم المواقف كده اللي ينفع تتقال ..من الولاده وحتى مرحلة الاعدادي ..الثانوي بقى عاوزله برناج لوحده ..

اتمنى اني ما اكونش وجعت دماغكم وتكونوا ضحكتولكم شويه ..(ما هو ضحك ببلاش بقى )

في انتظار التريقات ..احم ..اقصد التعليقات

دمتم في رعاية الله

يخراشى على الذاكرة بتاعتكوا
انتوا فاكرين كل دا
دا انا لو سالونى اسم اصحابك ايه مش هفتكر اساسا