عارف معاليك لو عملت تصويت على مين أكتر واحد قدر يجاوب كويس على السؤال ده هتاخد المركز ال11 
عندك حق وربنا انا اصلا مخنوق من السؤال ده
اصل محدش هنا ينفع رئيس مراجيح مولد النبى حتى
ما علينا
نكمل أسئلتنا
إيه رأى معاليك فى مشكلة البطالة ؟؟
مشكلة البطالة مشكلة ازلية فى بلدنا المحروسة سببها الفساد الحكومى
وعدم توفير فرص عمل للشباب لان معروف ابن القاضى يبقا ظابط وابن الوزير يبقا وزير وابن ال... يبقا ابن ...
لو هنتكلم عنها كأرقام وزيرة القوى العاملة طلعت فى تسعين دقيقة من كام يوم
بتقول نسبة البطالة فى مصر 7.4 % تقريبا
مع ان الواضح اننا هنحط جمب السبعة دى صفر على اليمين علشان تبقا النسبة مظبوطة معروف ان الشغل كله ماشى بالرشوة والكوسة والمحسوبية
فى ظل انعدام الطبقة الوسطى يبقا كل اللى هيشتغلو الطبقة اللى فى السما وبس
حتى اساسا لو فى شغل المرتبات الحكومية مبتنفعش 200 جنيه واللا تلتوميت جنيه هيعملو ايه
انتى تعرفى دوا الكحة بقا بكام دلوقت؟!!
المشكلة الاكبر ان الشباب بتدخل كلية مع امل انها لما تخلص هتلاقى الوظيفة مستنياهم بس فى النهاية بتقابل واقع مر اللى هو تعليق الشهادة على الحيطة بواسطة مسمار صلب 10سم من انتاج مصانع عز
وبعدها يبدأ المشوار من قهوة للتانية ومن ادمان لادمان ومن صنعة لاخرى وسبع صنايع والبخت ضايع
ويبقا الحال فى انتيكا كما هو زيادة نسبة البطالة مع زيادة نسبة الفساد
و من وجهة نظر معاليك إيه الطرق المناسبة لحل مشكلة البطالة و تزويد الإجور من خلال حكومة حضرتك ؟؟
الحل الوحيد انى كشاب وزير حاليا معتمدش على الشغل الحكومى
وادور على اى وظيفة خالية مع ان الواضح ان الانثات بس هما اللى هيشتغلو
عملا باليافطة الشهيرة ( مطلوب انثات للعمل )
القطاع الخاص فيه وظايف كتير محتاجين بس من الشباب انه يدور على الوظيفة
وميعتمدش على التكاسل وانتظار قطار العمل الحكومى اللى مش هيوصل
مع ان المشكلة الاساسية فى حكومة انتيكا مبتوفرش فرص عمل ولو وفرت لازم ندفع الابيج علشان نشتغل
اما بالنسبة للاجور والمرتبات
المرتبات مش هيا المشكلة المشكلة نفسها فى زيادة الاسعار
لان السياسة الحاليةبتزودالمرتبات 20% وبتعلى الاسعار60% وهو كله فى الاخر لخزنة انتيكا
لو لا قدر الله وبقيت رئيس وزراء بجد وحقيقى هزود المرتبات بما يتناسب مع غلو الاسعار
نفسى والله الموظفين ياخدو حقهم فى المرتبات ويشتغلو ويعيشو حياتهم زى باقى الشعوب انما نقول ايه بقا ربنا ع الظالم
يا ترى إيه أكتر موضوعين دكتور محمود طه بيحبهم لمحمود طه ؟؟