[Moky]

الفقهاء اختلفوا اذا كان النقاب فرض وله سنة
واخذت بالرأي اللي بيقول انه سنة انا الحمد لله محجبة
لكن مش منقبة ومش بفكر اني اتنقب في الوقت الحالي
اما بقى على حتة انه لو كان فرض يبقى اللي اعتبرته سنة تبقى عملت معصية
فبصراحة انا من اسرة بتحاول تتقرب الى الله وتتفقه في الدين
وتحضر دروس العلم وكل الشيوخ اللي سمعتهم على اختلافهم واختلاف مذاهبهم
قالوا ان الامور الي اختلف الفقهاء فيها لك ان تأخذ باي من الرايين طالما ان من قال هذا الرايي عالم موثوق في علمه

قال الامام الشافعي : أجمع العلماء على أن الله لا يعذب فيما اختلف فيه العلماء.

يقول الدكتور يوسف القرضاوي :

إذا وُجد من بنات المسلمين من تَقتنِعُ بهذا الرأي، وترى أن كشف الوجه حرام، وأن تغطيته فريضة، فكيف نَفرِضُ عليها الرأي الآخر، الذي تراه هي خطأً، ومخالفًا للنص؟

إنما نُنكِر عليها حقًّا إذا رأتْ أن تَفرِضَ هي رأيها على الآخرين أو الأخريات، وأن تَحكُمَ بالإثم أو الفِسْقِِ على كل من عمل بالرأي الآخر، وتَعتبِر هذا منكرًا يَجب محاربتُه، مع اتفاق المُحقِّقين من العلماء على أن لا إنكار في المسائل الاجتهادية الخلافية.

انا مش ضد النقاب ولايمكن اكون ضد فرض او سنة في الدين
لكن حبيت ارد في الموضوع لان معظم الردود اللي شفتها لأما بتقول ان النقاب فرض وواجب التمسك بيه لاما بتعارض النقاب وبتقول انه مش من الدين فحبيت يبقى في رد وسط في الموضوع
وكمان ليه تعليق على بعض الكلام اللي ورد في الردود
البعض بيشتكي ان اللي حوليها بيعملوها وحش او بيتجنبوها عشان منقبة
ربنا يكون في عنهم بجد لكن اللي عايزة ابينه الاسباب اللي بتخلي اللي حوليكي يعملوا كده
يعنى بالنسبة لزمايلي اللي منقبات في بعض منهم بتتعامل عادي وبتكلم وبتهز وكل حاجة
لكن للاسف في بعض منهم بتعامل غير المنقبات باستحقار صدقوني ده بيحصل فعلا
في بعض المنقبات مبحبش اتعمل معاهم لانهم بيتعاملوا على انهم لمجرد انها لبست النقاب يبقى داخل الجنة داخلين الجنة واننا غير المنقبات حتى لو محجبة يبقى داخلين النار .كان في واحدة زميلتي منقبة وبتتعامل مع الكل بالطريقة دي والمشكلة كمان انها بتغش في الامتحانات وشايفة ان الغش ده حاجة عادية ومش مشكلة وانه مش حرام يعنى بجد كنت بستغرب فعلا المفروض انها لابسة النقاب عشان تتقرب لربنا مش عشان تتكبر على خلق الله
وفي البعض معملتهم مع اللي حوليهم بتتغير لما يتنقبوا يعني واحدة قربتنا لما اتنقبت فضلت حوالي سنة كاملة مزرتناش في البيت برغم اننا كعيلة كنا بنتجمع في الاعياد لكن هيه لما لبست النقاب بطلت تزورنا من غير سبب ده مثال مثلا.
همه نسبة قليلة بس للاسف موجودين وعشان كده كتير من الناس واخده فكرة وحشة عن المنقبات انا مش قصدي اسيء للمنقبات انا بس ببين هوه ليه الناس واخدة فكرة خاطئة عنهن.

ويتجوز فلانة البنت اللى لابسه محترم
وصاينه نفسها ومش ماشيه فى الشارع كده
اللى رايح واللى جاى شايف ....

مهيه دي الكارثة انه يبقى شاب مش ملتزم دينيا واخلاقه مش كويسه ويروح يتجوز واحدة مأدبة ومحترمة وملتزمة بدينها يعنى البنت اللي مش ملتزمة بنقلها انت حتتعقبي ومش حتجوزي وحتتعذبي في الاخرة كمان انما الولد اللي مش ملتزم بنكفأه ونهديه زوجة صالحة!!!!!!!!
اذكر قصة لاحد الشباب على منتدى من المنتديات يشتكي انه طول فترة الدراسة الثانوية والجامعية لم تكن له علاقة محرمة باي فتاة عكس معظم زميلوه اللي كانوا على علاقات مع بنات وفي الآخر اتجوزوا من زوجات صالحات بعد ما كانوا دخلوا في علاقات زي مهمه عايزيين فكان حاسس بالمرارة انه لم يدخل في اي علاقة محرمة لكن لم يستطع ان يجد زوجة صالحة وحاسس انه زميلوه استمتعوا زي مهما عايزيين وفي الآخر لما جم يتجوزوا اختاروا زوجة صالحة طبعا مكنتش من البنات اللي مشيوا معاهم وبصراحة الشاب ده كان كاتب جملة غريبة اوي ان البنات بيفضلوا الرجل اللي عنده خبرة من قبل الجواز عشان كده هوه مش عارف يتجوز
كان فيه ردود مختلفة على مشكلته لكن اكتر رد لفت انتباهي كان "لو كنت اعرف تاريخ زوجي قبل الجواز لما تزوجته" ورد آخر واحدة بتقول انها اكتشفت بعد الجواز ان جوزها كان لوه علقات كتير قبل الجواز ودلوقتي بيقعد يقولها انا كنت عارف اللي اجمل منك واحسن منك
انا حبيت اعلق على النقطة دي بالذات لاني بسمعها من وانا في ابتدائي ان حتى الشباب اللي اخلاقه مش كويسة لما ييجي يتجوز بيدور على البنت المأدبة المحترمة والناس بتردد المقولة دي على انها انتصار للمحجبات والملتزمات بدينهن لكن مش واخديين بالهم انها كارثة وانها حاجة ضد المحجبة.
آسفة اني طولت في الرد
سلام