[أسيل رزق]

مش عارفة حب المنتديات ده كتر كده ليه .. دا بقى ألعن من وباء انفلونزا الخنازير

عايزة بس أحاول أقنع الآنسة الجميلة صاحبة المشكلة برأى البنات

من الواضح إن اللى بتكلميه ده مش بيحبك .. على فكرة انا مش عايزة أكرهك فيه لأ .. انا عايزاكى تولعى فيه

لحد إمتى هتفضلى تبيعى فى كرامتك ؟؟!!! .. كرامة البنت هى عرضها و حياءها و إحترامها لذاتها وكل حاجة

و بعدين انتى لسه صغيرة على الحب ده الواحد كل ما حب وهو كبير كل ما كان حبه عقلانى و هادف بنية كويسة يعنى لكن أنا شايفة إنه حب مراهقين مش أكتر

معلش بقى .. لان الشخص اللى بتتكلمى عليه ده .. الله أعلم بناواياه

بس صدقينى مفيش واحد يكون بيحب واحدة ويخليها ماتقلش لاهلها .. مهما كانوا أهلها

و فى نوعية من الشباب بيكونوا عارفين دماغ البنات كويس جداً

هو شافك من النوع اللى عايزاه ينصحها .. روحى صلى روحى ذاكرى هو عارف إنك بكده هتتعلقى بيه

مش عارفة أقول كلام أحسن من اللى الإخوة قالوه

صدقينى لو فضلتى كده هتندمى .. ويجى يوم وتضحكى على نفسك ومن كتر الضحك عنيكى هتبكى

وصدقينى الولاد مش بيحبوا البنات اللى بيموتوا فيهم دول مش عايزين إلا الوش الخشب

بصى حتى لو كويس زى ما بتقولى حاولى تتخيلى كده إن الامور مشيت و هو اتقدملك و أهلك سألوه انت تعرفها منين .. هيقولهم إيه؟؟
بلاش دى .. تفتكرى إنهم هيوافقوا .. الاجابة الأكيدة لأ.. دا فى مصلحتك انتى .. يبقى كده كده الموضوع ده لازم ينتهى ولما تنهيه انتى أحسن ما يزهق هو منك ويسيبك ( ماتزعليش منى )

طيب أقولك على حاجة

جربى تكلميه بطريقة ناشفة .. إديله على دماغه .. عارضيه وكدبيه فى كل كلامه .. هتقلب خناقة و جايز ساعتها هيقولك اللى انتى مش قادرة تصدقيه .. ولو ماقلش سيبيه ماتكلمهوش فترة طويلة مش ساعتين و ترجعى تكلميه يعنى قد شهر اتنين و حطى فى عقلك إن لو كلمتيه هتضيعى كرامتك أكتر ما هى ضايعة .. و قولى لأهلك لو ولدتك مثلاً و كلميها بشويش و ربنا يعزك ويعز بنات المسلمين

و جربى انتى مش خسرانة حاجة بالعكس هتكسبى .. و ركزى فى مذاكرتك دلوقتى أهم من أى شىء ..