[هنا الفقي]

المشاركة الأصلية كتبت بواسطة vampire1188

هوا اكيد سبب واحد من الاسباب دي ..

ودا بيرجع لشخصية البني ادم نفسه

هل هوا بيكلم البنت وعارف انه حرام وبيستهبل فيها ؟

هل هوا بيكلم البنت وجاهل ومش عارف ؟

هل البنت نفسها بتقضيها معاه وتقفل وتكمل معا التاني ؟

بس انا شخصيا بيتهيألي ان السبب الرئيسي (الكبت) .. وممكن نضيف للكبت (الشعور بالاستقلالية)

لو جينا نتكلم عن الكبت .. غالبا علاقات الولد والبنت مابتبدأ في مرحلة الثانوية وانتي طالعة لفوق

المرحلة دي بنسميها مرحلة المراهقة " المتعسرة "

الواحد بيبقي داخل الثانوية العامة طالع عين اللي جابوه ..مذاكرة ودح وقرف ودروس وامتحانات وتمارين

وضغط في الاعصاب .. ويوم النتيجة المشهود ..

في اللحظات دي الشخص (سواءا بنت او ولد) بييجوا يبصوا لنفسهم بيحسوا انه في حاجة ناقصاهم
ده اذا كانو لسه ما بصوش م الاعدادي ودول الغلابة دلوقتي الابتدائي بقى بيلحق بدري بدري

دا شعور طبيعي .. طبعا اللي داخل في تأثير دا بكم كبير جدا .. الأغاني والافلام

يعني مثلا اما واحد يقعد يسمع قرب كمان من حضني ....... بتاعة عم تامر منه لله

والنبي انا راضي ذمتكوا .. عايزين من الشخص ايه اما يقعد يحلل في الكلام ..

ماهو اكيد لازم دماغه تروح لحاجات زي كدا

اما واحده تقعد تتفرج على فيلم زي (عن العشق والهوا) ..

اذا كان اسم الفيلم نفسه زي الزفت .. يبقي عايزين ايه ؟!
ماهو ده اللي بيخلي الناس اللي ماحبتش تقولك نفسي اجرب ونفسي اعيش معرفش ايه وحجات كده

الواحد او الواحده بقي اول مابيخشوا الجامعة . ياسلااااااام .. البنت همها كله المنظرة قدام الولاد عشان تجذبهم

والولد اهم حاجة عنده انه يبقي روش وفانكي عشان البنات تتلم حواليه ..

والبنت بتضحك على الواد .. والواد بيتسهبل على البنت .. وكله بيلعب على كله !!

والمهم انه البنت عارفه ان الواد بيتسهبل .. والولد عارف ان البنت بتستعبط .. ومع ذلك قابلين دا على نفسهم !

عشان كدا لو نلاحظ .. دائما بتوع سنة اولي جامعة هما اللي بيبقوا عندهم الحتة اللي فيها هبل شوية دي (طبعا مش كلهم)

بس اما بيعدوا بعد كدا بيبقي خلاص .. اتعودوا على اللي بيحصل ..

زي بالظبط اللي لسه اول مرة ياكل آيس كريم .. وفضل ياكله لمدة سنة لغاية ماتخنق منه

السبب التاني بقي ( الشعور بالاستقلالية)

الواحد في الثانوية .. طالع عينه .. ومش حاسس بأي شخصية .. رايح من الدرس .. جاي من الدرس

رايح الامتحان .. جاي من الامتحان .. روتين يومي متكرر لمدة عام دراسي كامل

يبقي فين الاستقلالية في دا ..

عشان كدا بيبقي عايز اي منفذ يهرب منه عشان يحس بنفسه شوية ..

والمشكلة ان مشكلة الاستقلالية دي بتبقي موجودة عن الطرفين .. الولد والبنت

فابيبقي فيه علاقة مصلحة .. الولد عايز يحس بنفسه .. والبنت عايزة تحس بنفسها

ومن خلال دا تنشأ العلاقة اللي غالباً مابنتهي بالفشل المحتم !

رايك بصراحة اكتر من رائع واضافتك جميلة جدا تشرفت جدا بمرورك