بسبب المزارع السمكية اللي تم افتتاحها خلال آخر سنتين في مصر ومنها مزرعة الفيروز والديبة وبركة غليون؛ مصر حققت الاكتفاء الذاتي في الإنتاج السمكي.. كمان فيه إنفوجراف مهم أصدره مركز المعلومات الصوتية والمرئية في وزارة الزراعة واستصلاح الأراضي استعرض خلاله أهم الأرقام والمؤشرات الخاصة بانتاج الأسماك والثروة السمكية في مصر، والحقيقة إنها كانت أرقام مبهرة وعظيمة..
انتاج مصر من الأسماك 2 مليون طن كل سنة، منهم 1.6 مليون طن من الاستزراع السمكي، و400 ألف طن من المصايد الطبيعية.. كمية الإنتاج الضخمة دي أهلت مصر عشان تبقى في المركز الأول في إفريقيا في الاستزراع السمكي والسادسة على العالم!..
لما تحط التفوق المصري السابق ده على معلومة مهمة تانية بتقول إن مصر حالياً في المركز الثالث على مستوى العالم في إنتاج السمك البلطي؛ هتقدر عن قرب تتأكد إن الدولة عندها خطة محكمة وبتتنفذ بمنتهى الدقة في تعزيز الأمن الغذائي وزيادة عائدات مصر من التصدير من خلال زيادة الإنتاج من الأسماك سواء للسوق المحلي أو للتصدير..
لغة الأرقام مش بتكذب.. الرقم هو ترجمة ملموسة على أرض الواقع بتخليك تشوف بوضوح حجم الإنجاز اللي تم في ملف معين بعيد عن أى كلام.. النجاح اللي حصل في ملف الاستزراع السمكي بيقول إن الدولة هدفها تحقيق مصالح المصريين في المقام الأول لإن المستفيد الأول دايماً هو المواطن المصري سواء بفرص عمل جديدة بتتوفر من خلال المشروعات أو بتحقيق الاكتفاء الذاتي في ركن غذائي مهم زى الانتاج السمكي.
#بالعامية_المصرية
__________________
ابتسم ... كن متفائلا ... وقل الحمد لله 
|