شاب مصري اسمه "محمد عبدالباقي" بيدرس في سنة رابعة كلية حقوق جامعة بنها عمل صرف نبيل وشهم وفي قمة الجدعنة..
"محمد" عنده مكتب تأجير عربيات وقرر يعمل مبادرة في نطاق قريته في بنها محافظة القليوبية بيوفر من خلالها عربيات ملاكي حديثة ومكيفة عشان يزف بيها العرسان مجاناً وينقل بيها المرضى للمستشفيات سواء جوا بنها أو بره.. والسبب؟.. عشان يخفف الأعباء المادية على جيرانه وأهله غير المقتدرين، ويحاول يفرحهم بطريقته..
مش معنى كده إنه مش بيأجر عربيات بفلوس لكنه بيعمل ده جنب ده، وأى عريس بيجيله ويقول له إن ظروفه مش مناسبة عشان يأجر عربية أو مريض محتاج توصيلة لمستشفى عشان يتعالج؛ بيديله عربية وببلاش تماماً وبمنتهى السرية بدون ما حد يعرف منعا للحرج.. مش كده وبس ده كمان بيكون حريص على تزيين عربيات العرسان بالورود على أكمل وجه!..
"محمد" بيقول في حواره مع الصحفي "محمد خاطر": (أنا بحب الخير وعايز أفضل أعمله طول الوقت، ومفيش أحسن من جبر الخواطر، ونفسي ميبقاش فيه حد محتاج أي حاجة، وتكون الدنيا سهلة على الكل)..
شاب مصري جدع خصص جزء من وقته وشغله لخدمة الناس وجبر خاطرهم لإنه مصري أصيل وعارف إن الخير اللي بيعمله النهاردة هيتردله من ربنا بكره، وعارف برضه إن الناس لبعضيها.. بلدنا حلوة وناسها حلوة.
#بالعامية_المصرية
__________________
ابتسم ... كن متفائلا ... وقل الحمد لله 
|