أول امبارح كنا في قمة السعادة والفخر وإحنا بنتكلم عن خبر فوز بطلنا المصري في رياضة السلاح "محمد ياسين" والمصنف الثاني عالميا بذهبية كأس العالم لسلاح سيف المبارزة شباب في البحرين.. كان حدث تاريخي وعظيم بدون شك..
قولنا برضه إن منتخبنا لسلاح سيف المبارزة هيبدأ مشواره في منافسات الفرق بمواجهة منتخب الكويت في دور ربع النهائي، وإن كلنا ثقة إن هما برضه هيشرفونا وهيحرزوا مركز متقدم وميدالية في ختام البطولة.. وده حصل فعلاً ورفعوا راسنا!..
العظيم إن امبارح منتخب مصر لسلاح سيف المبارزة فاز بلقب بطولة كأس العالم للشباب بعد الفوز على فرنسا في المباراة النهائية بنتيجة 45/34..
إنجاز جديد بأيادي ولاد مصر وشبابها.. إنجاز وخطوة بيقولوا إننا على طريق الصح في تفوق الرياضة المصرية وفرض سيطرتها على مجموعة من الألعاب العالمية اللي ورغم عدم شعبيتها مقارنة بكرة القدم لكن ولادنا بيعملوا فيها اللي عليهم للنهاية وبيجروا ورا شغفهم بمنتهى الاصرار وبيحفروا أسمائهم فيها بحروف من نور.. كل التحية والدعم وألف مبروك.
#بالعامية_المصرية
__________________
ابتسم ... كن متفائلا ... وقل الحمد لله 
|