لو لسه ماتعرفش؛ فبعد أقل من أسبوع وتحديداً يوم الخميس 27 يناير وحتى يوم 7 فبراير؛ هتنطلق الدورة رقم 53 من معرض القاهرة الدولي للكتاب واللي بتحمل شعار "هوية مصر.. الثقافة وسؤال المستقبل" في مركز مصر للمؤتمرات والمعارض الدولية..
الجميل في الموضوع وتشجيعا وتيسيرا على زوار المعرض قررت اللجنة العليا للمعرض فتح خمس منافذ بيع إضافية بجانب المنصة الإلكترونية لاستيعاب أكبر عدد من الزوار وتبسيط الاجراءات عليهم، وتقرر دخول الأطفال تحت سن 12 سنة مجاناً، بالإضافة لكبار السن وذوي الاحتياجات الخاصة، وهيكون فيه مركز مخصص لتلقي التطعيم بلقاح كورونا داخل المكان..
الدكتور "هيثم الحاج علي" رئيس هيئة الكتاب قال في تصريحات صحفية إن أهم الإجراءات الاحترازية اللي هيتم تطبيقها لدخول الجمهور فعاليات الدورة الـ53 للمعرض بتتمثل في منع من لم يحصلوا على لقاح كورونا من دخول المعرض..
الدورة هتقام على مساحة 80 ألف متر مربع، وبتضم 5 قاعات للعرض، وعدد الأجنحة 879 جناح، وعدد الناشرين، والجهات الرسمية المصرية والأجنبية 1067 دار نشر وتوكيل..
معرض القاهرة الدولي للكتاب حدث مصري دولي بيتم تنظيمه كل سنة بكفاءة ممتازة، وبشهادة آلاف الزوار المصريين والعرب اللي بيشوفوا فيه مهرجان للثقافة والأدب.. منتظرين نجاح الدورة زى الدورات اللي قبلها لإن مصر عودتنا لما بتعمل حاجة بتخرج في أفضل صورة ممكنة.
#بالعامية_المصرية
__________________
ابتسم ... كن متفائلا ... وقل الحمد لله 
|