[أحمد بلما]

والله يا باشمهندس أنا مش عارف اقولك ايه
انا نفسي دي تعتبر المشاركة السابعة ليا في المنتدي الجميل ده من ساعت ما دخلت المعتقل (اقصد الكلية)
وبصراحة كنت كل شوية بدخل لكن مبلاقيش موضوعات جامدة زي زمان في الاجازة
ناس كتير اتغيرت وناس كتير سابت المنتدي وموضوع منتهي الهندسة اللي كان المفروض ينطلق مع اول يوم في الدراسة لكن يافرحة ما تمت
المهم أنا هحاول ارغي شوية عن كليتي هندسة القاهرة وياااااارب تاخد فكرة كويسة عنها :
السنة الاعدادية يا سيدي بتبقي في مدينة الشيخ زايد وبتكون طبعا علي ترمين
الترم الاول بندرس فيه الآتي
ـ رياضيات (جبر و تفاضل) محاضرة جبر ومحاضرة تفاضل و2سيكشن في الاسبوع)

بالنسبة للجبر بيكون 6فصول
استنتاج رياضي ،نظرية ذات الحدين،الكسور الجزئية،نظرية المعادلات ،الحلول العددية للمعادلات ،جبر المتجهات
يمكن يكون محتوي منهجنا زيكوا بالظبط مع اختلاف التسميات (هه فذلكه طبعا)
بالنسبة للتفاضل منهجه كبير جدا ولكن هقولك اللي خدناه
الدوال الحقيقية ، النهايات والاتصال ، الدوال المتسامية و الدوال العكسية، الاشتقاق من طاطا لسلام عليكو ،المشتقة النونية وصيغة ليبنز ،نظرية لوبيتال
ـ الفيزياء(خواص مادة وكهربية) محاضرة خواص ومحاضرة كهربية و2سيكشن في الاسبوع)
وللعلم :الفيزياء بالنسبة لينا هي بعبع الطلبة والبركة في الدكاترة طبعا(بعضهم مش كلهم بصراحة )
بالنسبة للخواص خمس فصول
الابعاد والوحدات ،المرونة(بتتاخد بضمييير)،ديناميكا الموائع المثالية ،اللزوجة،قوي التجاذب
بالنسبة للكهربية :اربع فصول (بندرس الكهربية الساكنة فقط في الترم ده):
قانون كولوم والمجال الكهربي ،قانون جاوس لفيض المجال الكهربي، الجهد الكهروستاتيكي،الاوساط العازلة والمكثفات الكهربية
ـ الكيمياء الهندسية محاضرة وسيكشن في الاسبوع)
مادة جميلة وزي الفل وحوالي تلات تربع الكتاب ملغي علينا ولكننا مطالبين باللي بتقوله الدكتورة وبناخد :
الغازات المثالية ،الغازات الحقيقية ،الاحتراق ،الغاز الطبيعي،المحاليل، التلوث والهندسة البيئية ،المزلقات وزيوت التزليق والشحوم،مواد البناء والاسمنت(متتخضش اوي احنا بناخد طراطيش كلام مش اكتر)
ـ الرسم الهندسي والاسقاط 2سيكشن في الاسبوع)
هو هو نفس الرسم اللي بيخده اي طالب اعدادي في الدنيا (تماس ،مساقط،استنتاج مسقط ثالث،ايزومتريك:وياويله اللي مايتخيلش في المادة دي)
ـ ميكانيكا (استاتيكا ترم اول ): (محاضرة و سيكشن في الاسبوع)
خمس فصول :مبادئ المتجهات في الفراغ ،المجموعات المتكافئة،الاتزان في الفراغ ،مركز الكتل ،عزم القصور
ـ حاسبات(والدكتور اللي بيديها..............................ولا بلاش!!!)(محاضرة و سيكشن في الاسبوع)
مادة ظريفة وسهلة بس الدكتور بتاعها بيتفنن في احباط وتاييس الطلبة ، احنا بندرس فيها البرمجة واول فصلين فيها بيبقوا تعريف بالحاسب و مكوناته ونظم تشغيله وكده يعني فمبناخدهمش (علي اساس ان احنا عباقرة) وبنبدا بالفصل الثالث اللي هو الفلو تشارت زي ما حضرتك وصفته ومن اول الفصل الرابع للفصل الثامن اللي هو نهاية الكتاب (لغاية آخر السنة يعني)بندرس لغة برمجة واحدة بس بالتفصيل الممل اللي هي ++c ودي لغة لاول مرة بتدرس لطلبة اعدادي بعد ما كان بيدرسها طلبة اولي اتصالات
ـ لغة فنية(اللي هي الانجليزي) (سيكشن فقط في الاسبوع)
وياويله اللي يقول عليها انجليزي (المعيد ممكن يضربه باي حاجه في ايده) مادة حلوة وبسيطة لكن مانتاش عارف ايه الغرض منها
ـ فيزياء عملية(سيكشن كل اسبوعين)
بناخدها في المعمل وبنعمل شوية تجارب كده بعد ما نتقسم لفرق كل فرقة علي تجربة
امتحانات الترم بتاعتنا بدات 19يناير وانتهت 29يناير وامتحنا الرياضيات و الفيزياء و اللغة الفنية و الكيمياء و مقولكش الامتحانات كانت عاملة ازاي
الترم التاني بيمشي بنفس نظام الاول مع تبديل الكثير من المواد(كيمياء بانتاج،جبر بهندسة تحليلية ،تفاضل بتكامل،خواص بحرارية ،كهربية بمغناطيسية،لغة فنية بانسانيات اللي هي تاريخ العلوم الهندسية،استاتيكا بديناميكا )في مواد انا اول مرة اسمع عنها زي حقوق الانسان دي مثلا
ياريت اكون افدتك ياباشمهندس ويااااااااااااااااااااااااااااااااااااارب كلنا نعدي من السنة دي علي خير و ندخل القسم اللي عايزينه
اخوك :احمد بلما
معتقل بهندسة القاهرة من 21سبتمبر 2008الي اجل غير مسمي