يا جماعه انا عارف الضغط العصبي اللي انتو عيشينه من اهلكوا واحساس انها مسؤليه كبيره بس دي مشكله في المجتمع بتعنا ونظام التعليم
بس في حاجه ان الانسان يقدر يقنع نفسه باي شئ
يعني انا اقدر اقنع نفسي اني بكره الفيزياء واقدر برضو اقنع نفسي اني بحبها
وعلشان تحب علم لازم تفهمه وتفهم اساسياته كويس اللي انتو بتدرسوه دلوقتي
ومقولة ان حاجه مفيهاش حفظ دي غلط كل حاجه فيها حفظ وخاصة الاساسيات بس حفظ عن حفظ يفرق
في ناس بتحفظ كل حاجه من غير متحاول تفهم حتي زي اللي بنشفهم في التلفزيون في الافلام
وناس بتحفظ بفهم يعني ايه يعني افهم الدرس القانون لازم طبعا يتحفظ اقسم الدرس لنقط رئيسية واكتب من تعبيري انا علي كل نقطه اللي فهمته ولو لقيت نفسي نسيت حاجه اضفها كنقطه جديده وهكذا ومقعدش احفظ كلمه كلمه
بالنسبة لمصطلحات العلميه طبعا دي اجبها من القانون مثلا الكثافة هي كتلة الجسم بالكيلو جرام عندما يكون حجمه 1 متر مكعب
بالنسبة لاسألة علل افهم السؤال كويس وافهم ايه المطلوب وبعد كدا اجاوب لو لقيت اجبتي مش زي الاجابه النموذجيه يعني نقصها عناصر اقسم الاجابة لنقط واعرف النقط دي كويس واتكلم عن كل نقطه وهكذا برضوا
بالنسبة للقوانين والمسائل لازم يكون عندي مهارات رياضيه الجمع والطرح والقسمه بحيث اني اشكل القانون زي ما انا عايز
وطالما هو عايز ناتج لازم احط في زهني ان المعطيات حتكفي لحل المثال واخراج الناتج واستخدم كل القوانين الفيزيائية والرياضيه اللي انا اعرفها علشان اوصل احط المطلوب في طرف والرموز المعطي قيمتها في طرف
بالنسبة لاسئلة اشرح
الفيزياء فيها حاجات كتير مقدرش احسها ودا يعني اني لازم اتخيلها مثلا الالكترونات حد شاف الكترون معدي في سلك قبل كدا
طبعا لا بس انا بحس اثاره لمبه تنور الخ بس انا اقدر اتخيل ان في الكترون ماشي في السلك واقدر بكدا افهم المقاومه واتخيلها والمكثف وباقي المكونات الالكترونيه واقدر اوصف الظواهر دي بسهوله لو تخيلتها
انا عيزكم تحبو العلم لانه شئ جميل جدا بعيد عن المنظره وانا جايب مجموع كام والناس تقول ان الواد دا شاتر وبيفهم العلم شئ بيحسسك انك انسان اكرمك الله بالعقل تقدر تلاحظ وتتعلم ليك قيمه والعلم قبل ميكون في الكتب والورق والاقلام العلم في الظواهر والعقل والعالم يشفع يوم القيامه لاهله علي فكره بعد الانبياء والشهداء
اتعلموا علشان تبتكروا وبكدا حتحسوا انكم بتنجزوا ومش حتكرهو العلم وحتحققوا نجاح كبير ان شاء الله
وبالنسبة للثانوية والكليه دي امر بيخترهولك ربنا كل ميسر لما خلق له فارضي باللي اخترهولك لانك لو علمت الغيب لخترت الواقع
انا واحد من الناس جبت في ثانيه 88 وفي ثالثة 98 ومدخلتش برضو الكليه اللي كنت بتمنها لكن لما عرفت الكلية اللي ربنا كتبهالي والكلية اللي كنت بتمناها لقيت اني كنت غلطان وشكرت ربنا ووفقني "وإن شكرتم لازيدنكم "
وانا موجود ان شاء الله معاكوا بما رزقت من علم اسالو في اي حاجه وتاكدو اني طالما اقدر مش حتاخر
|