هااااااااااااااااااااااااااااااااام رجاء المساعدة
 

عزيزى رفعت توفيق 2

أنا مدرس انجليزي من المحلة و اشتغلت فى الاحساء او زى ما اهلها بيسموها " الحسا " حوالى 7 سنيين بلد هادية و حضرية و كويسة و عيشتها رخيصة عن معظم المدن السعودية انا راجع من هناك 2009 و كنت حكومة مش خاص
انت رايح على مدرسة خاصة و لا ايه نوع العمل

و ايه هى الاسئلة و انا ممكن اجاوبك عليها

مدرسة خاصة يا أستاذي اسمها الأنجال الدولية لو عندك معلومات عنها أكون شاكر ليك

الانجال الدولية تعتبر المدارس الاولىعلى مستوى الاحساء بالنسبة لمستوى الطلاب

هى ملك عائلة الملحم و دى عيلةمحترمة جدا من اكبر عائلات الاحساء و حتى اصلهم تركى شكلهم مختلف عن السعوديين يعنى بشرتهم بيضا و هيئتهم مختلفة تقريبا مدير المدارس اسمه عبد المحسن انا اشتغلت مع اخوه عبد الله كان اياميها وكيل مدرسة الرميلة الثانوية .

اللى بيمشي المدرسة شوية فلسطينيين و اردنيين ولاد لذينة يعنى هتشتغل يعنى هتشتغل ومش هتسمع كلمة تشجيع ظبط نفسك على كده انت تشتغل و تحلل راتبك لله متستناش حاجة من حد لا جزاء و لا شكور لانك مش هتلاقى

طبعا الطلاب فى اى مدارس خاصة حتى الفقرية هنا فى مصر زى الزفت و خاصة انك ممكن تلاقى تنويعة طلاب مصريين محدثى نعمة وزى الزفت هماواهليهم فلسطينيين اغراب سعوديين مش من الاحسا من حتةتانية وجايين مع اهلهم يششتغلوا فى ارامكو او غيره - ارامكو دى شركة البترول بتاع السعودية حساويين كتير شغالين فيها

المدارس فى مكان كويس جنب اسواق كبيرة اسمها المخازن و جنب مستشفى الاحساء و دى مستشفى كبيرة و جنبيها او بالادق مقابلها محطة القطار و طبعا هى فى مللك الملحم فجنبيها ديوانية الملحم او مجلس الملحم حاجة كده زى مركز مؤتمرات العائلة

خد بالك تلاقى سعوديين كتيرمدرسين معاك يعنى حرصمنهم لغاية ما تلاقى معدنهم ايه و هتلاقى شباب معظمهم شيعة دول بيشتغلوا شهر شهرين فى كل مدرسة شوية لغاية ما يتوظفوا فى التربية و التعليم او يزهقوا و يمشوا فمتسمعش كلامهم لانهم هتلاقيهم ناقمين على المدرسة عايزين يشتغلوامدرا بس

احسن مكان تسكن فيه هو شارع المزروعية و ماحواليه عموماانت اول ما تنزل روح لمطعم اسمه الدمياطي دابتاع اكل مصرى وكده حتى هتلاقى فيه اشتراك لوجبة الغدا اكل مصرى ب 10 ريال او اشتراك شهرى 270 فى الشهر هتلاقى مصريين كتير و هتعرف اخبار السكن منهم