|
ساعدوا فتاه فى طريقها الى النجاح
بجد مشرعفة لكن قولت اطلب النصيحة ارجوا من صحابى البنات والمشرفات يجاوبولى على الاسئلة دى
اولا انا بلعب رياضة الكارتية وعندى 15 سنة وعلطول بندرب مع اصحابنا الاولاد وهم فى نفس سنى تقريبا او اكبر ماما بتشجعنى انى استمر وترى لى مستقبل الى حد ما كويس لكن انا كل ما اكبر بتحرج وانا لبسة البدلة وبتمرن هل الاشتباك فى رياضة الكارتية مع ولد حرام ولو حرام اقول للكابتن ايه لما يطلب منى العب مع ولد |
فتاه تبكى خوفا من ربها
ثانيا
انا بخاف من ربنا جدا جدا ولكن مع ذلك انا لا انتظم فى صلاتى كل مستغفر ربنا وهاقول خلاص مش هسيب الصلاه تانى ارجع اسيبها وماما دايما بتقولى انى ماعنديش ثقة فى نفسى ادخل الامتحان وانا خايفة ان ربنا يعاقبنى واجيب درجة وحشة فى النادى قبل ما دخل بطولة الكارتية للمبتدئين رجلى جلها تمزق فى الاربطة وما عرفتش ادخل مع انى كنت انام واصحى احلم بالبطولة هل تعتقدون ان هذا عقاب ربى لى وما الحل انا توفقت كتير فى حياتى لكن مع ذلك يحدث شيئ يعكر فرحتى هل افرح ام احزن |
ايه يا جماعة فين الرددود فين النصائح
|
قال رسولنا الحبيب ( العهد الذي بيننا وبينهم الصلاة فمن تركها فقد كفر )
اكيد لما نسيب فرض من فروض ربنا لازم نستنى عقابه يمكن اللى بيحصلك ده ابتلاء الله اعلم اتمنى من ربنا انه يريح قلبك |
بصى
انتى ممكن تسيبى الكاراتيه انا عارفه ان رأيى مش هيعجبك بس هقولك من ترك شيئا لله عوضه الله خيرا منه |
اقتباس:
|
اقتباس:
ازيك يا قمر؟ يارب تكوني بخير المشكلة بتاعتك فعلا مشكلة صعبة شوية انا عارفة ان الكارتيه مهم بالنسبالك لانها الرياضة اللى اتعودي تلعبيها لكن هل ينفع تكملي فيها؟ بصي يا جميل انتي دلوقتي كبرتي ونتكلم بصراحة اكبر نقول بقيت آنسة زي القمر وده السبب اللى بيخليكي تتحرجي من البدلة لان البدلة مش بتراعي مع كبر سن المتدرب هو ولد ولا بنت بتعتبرهم واحد واكيد ده مش ينفع لآنسة لان البدلة بتظهر تفاصيل في الجسم مينفعش انها تظهر لانك طبعا عارفة ان شروط الحجاب انه يكون ساتر للبدن ولا يصف ولا يشف بناخد بالنا ان حجابنا لا يشف بس ساعات بنتهاون في شرط انه لا يصف ربنا سبحانه وتعالى بيقول "يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلَابِيبِهِنَّ ذَلِكَ أَدْنَى أَنْ يُعْرَفْنَ فَلَا يُؤْذَيْنَ وَكَانَ اللَّهُ غَفُورًا" فمينفعش اننا نتهاون في امر من اوامر الله نيجي للنقطة الثانية بتاعة الاشتباك نفرض مثلا انك ماشية في الشارع ولاقيت بنت ماسكة في ايد ولد هل ده ينفع ؟ هل هو حلال؟ لا طبعا. طب ليه؟ عارفة انك شطورة وهتقولييلي لان لمس رجل لامرأة لا تحل له حرام طب ما الاشتباك كمان على حد علمي ولو اني ماليش في الكاراتيه :p اكيد بيحصل فيه لمس يبقى ايه فرقه عن البنت بتاعة الشارع دي و والله ما اقصد انك زيها ولكن انا بحاول اوصلك الفكرة ان مفيش فرق في امر اللمس من الاشتباك غير في المسميات انتي كبرتي ومينفعش ولد يمسك لانك جوهرة ولؤلؤة حطيها في عقلك الكلمة دي ومش تنسيها ابدا " انتي جوهرة ولؤلؤة" مش اي حد يلمسها ولا يقربلها ولا يشوف جمالها وزينتها وزي ما قالت زميلتنا فوق انها كانت بتلعب برده كاراتيه وسابته اقتداء بحديث رسول الله صلى الله عليه وسلم " من ترك شيئا لله عوضه الله خيرا منه" |
اقتباس:
كذلك انتي بتخافي من غضب ربنا عليكي فاعملي لتنالي رضاه سبحانه وتعالى هسألك الصلاة فرض ولا لأ؟ هتقوليلي فرض طبعا اكلملك كمان واقولك حديث الرسول صلى الله عليه وسلم " العهد الذي بيننا وبينهم الصلاة فمن تركها فقد كفر" يعني تارك الصلا كاااااااافر؟ ايوه إذا تركها جحود وجحود يعني كفر بيها مش مؤمن بالصلاة يعني لكن انتي إن شاء الله مش من النوع ده انتي بس عندك كسل في تأدية الصلاة . صح؟ انا عارفة انك هتقولي صح طب عارفة الكسل ده جه منين ؟ من الشيطان هو اللى مش عايزك تطيعي ربك ... هو اللي بيزين لك الكسل ويشغلك ويقولك اصلك مش قادرة تقومي .. طب شوفي البرنامج ده وبعدين قومي لا انتي تعبانة دلوقتي قومي صلي بعدين وبعدين تجيب بعدين لما تضيع الصلاة او يقولك انتي هتصلي ليه ربنا مش هيقبل منك صلاة ويخليكي تقنطي من رحمة الله لالالالالالالالالا متسمعيش للشيطان ولا لنفسك لان نفسنا آمارة بالسوء وقت الاذان قومي جري على طول اتوضي وصلي متأخريش الصلاة لاي عذر اغلبيه ( الشيطان) واهزميه ... كل ما تسمعي الاذان افتكري ان الصلاة دي لو راحت مش هتتعوض وهيجي يوم تقفي بين يدي الرحمن ويسألك عن صلواتك اللى ضيعتيها هتقولي ايه وقتها كل لما الشيطان يكسلك افتكري النار اللى هي ضعف نار الدنيا سبعين مرة ده احنا مبنستحملش الحر نستحمل النار وكمان ضعف الدنيا بسبعين مرة ربنا يعافينا ويعافيكي يا حبيبتي اللهم إنا نعوذ بك من نار جهنم انتي قولتي انك بتخافي من ربنا يعني بتخافي من عذابه وعذابه شديد فاعملي العمل اللى تتقي به عذاب الله واخيرا حبيبة قلبي مش معنى كلامي اني بخوفك وبس لاز ابن القيم رحمه الله قال كلام _ فيما معناه_ ان العبد في طريقه لربه زي الطائر يسير بجناحي الخوف والرجاء ورأس الطائر المحبة شوفتي يعني الامر كله يرجع للمحبة لو بتحبي ربنا هتقومي بطاعته اكتر من احساس الخوف احساس الحب يغلب بتحبيه بجد لانه خلقك .... ورزقك... وستر عيوبك عن خلقه... واعطاكي من نعمه ما لا يعد ولا يحصى لو بتحبي ربنا بجد هطعيه وبعد كده يجي الخوف والرجاء يعني ايه؟ لو فكرتي في معصية يجي الخوف يذكرك بالنار وعذابها ولو حبيتي تعملي طاعة وجه الشيطان ييأسك من نفسك ... يجي الرجاء في رحمة الله يساعدك عشان تعمليها لايمانك بان ربنا رحيم غفور كريم حبي ربنا بجد ادخلي في الصلاة وادعي وانتي ساجدة ده اقرب ما تكوني من الله ، قال رسول الله صلى الله عليه وسلم " أقرب ما يكون العبد من ربه وهو ساجد فأكثروا الدعاء" وشوفي الحديث ده كمان ،عن أبي هريرة - رضي الله عنه - قال : قال النبي - صلى الله عليه وسلم - : يقول الله تعالى : ( أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملإ ذكرته في ملإ خير منهم ، وإن تقرب إلي بشبر تقربت إليه ذراعا ، وإن تقرب إلي ذراعا تقربت إليه باعا ، وإن أتاني يمشي أتيته هرولة ) . ربنا بيحب عباده اوي وللأسف العباد فرطوا في حق الله يالا استعيني بالله واستعيذي من الشيطان |
الله يهديكى الى الطريق المستقيم
|
الحل الوحيد
انك تسيبى الكارنيه يا قمر اسمعى نصائح اصحابك ماشى يا قمر |
بقول لا لا لا لا لا
انتوا بتقولوا كدة علشان مبتلعبوش كارتية وخصوصا انى بدا ت الكارتية وانا عندى 3سنين ازاى يكون روحى فيها واسيبها الاول كنت بالعب سباحة وكنت احتل المركز الاول دائما لكن ماما مانعتنى وبابا وافقها رغم تحايلات الكابتن التى ادهشتنى وكثيرا ما قال لامى انى عندى موهبة فذة فى السباحة ورشاقه احسد عليها وسرعة تكاد لاترى ولكن بابا قالى كفاية كدة ولاادارى عليكم كمية الحزن التى احسست بها و اهتممت قليلا بالكارتية لكن حبى له بدأ يتزايد مع الوقت وخصوصا بعد ما بدأ اسمى يصعد فى البطولات واهتمام الكابتن بى المتزايد فكيف تريدون ان اترك روحى وبارادتى
احب الرياضة حبا جما ولا اقدر على فراقها كل دقيقة يتزايد حبى لها وجسمى الان رشيق وصلب ولو تركت الرياضة فى هذا العمر لتراخى جسمى وذهبت رشاقتى تقدروا تقوللى هاعمل ايه فى الاجازة بعد مكان ادخل بطولة اخرخ اخش وحدة تانية هاتقوللى احفظى قران اهتمى بربك بعمل كدة ايه الي هايسلى وقت المذاكرة ممتع كل ساعة وانا بذاكر باقوم اعمل رياضة يرجع جسمى نشيط ارجو ذكر الحل مع الاهتمام بانى لانى اترك رياضة الكارتيه ابدا بعد ما تركت السباحة |
إذا كنت بتحبى الكاراتيه فهمى مدربك انك مش عايزة تلعبى مع ولد ...لكن إذا لم يتفهم طلبك ممكن تلعبى لعبة ثانية مثل كرة السلة لأن بالتأكيد فى يوم من الأيام ستتركى الكاراتيه وده أكيد وأنت رياضية وعارفة يعنى مسيرك تسيبيه أما الصلاة أنت مقتنعة إن تركك لها معصية لله ...حاولى تلتزمى بإرادة قوية ومعك الدافع هو رضى الله سبحانه وتعالى وستجدى إن لن يرتاح لك بال وستشعرى أن هناك أمر هااااام عليك إنجازه وهو الصلاة وبعد تأديتها ستجدى كم من السعادة والراحة |
ممكن تسالى عن نادى تكون الدرب فية بنت واكيد المجموعة هتكون بنات ويكون فى مكان مغلق عشان تحافظى على رشاقة جسمك فى الدنيا وتحميه من عذاب النار والعياذ بالله واول مايسال عنه المرء يوم القيامة هو الصلاةزى ماانت خايفة على رشاقتك خاف من عذاب النار وادعى ربنا يثبتك وصحبى جروب يكون ملتزم عشان يكون فى تشجيع واخيرااا ادعيلى
|
رغم اختلافى معكم لكن شكرا لاصدقائى وانا مقتنعة ان عمر ما هيجى يوم وهسيب رياضتى انشاء الله وعالفكرة سال عن نادى يكون مغلق لا يوجد
نادى بتكون المدربة بنت معقول لكن مفيش حاجة فى الكارتية اسمها ولد وبنت كلهم اسمهم لاعيبة وهل البطولات الكوبرى ستكون مغلقة او تخلى البنات بس هيه الى تتفرج على زميلاتهم دى بطوله يعنى مدرج كبير فى بنات وولاد ومدربين ومدربات من كل الاعمار ارجو الايجابة بحلول معقولة ومنطقية |
اولا :متزعليش من التمزق الى جالك وكملى
انا كنت بلعب كاراتية من كام سنة كدا وتقريبا الاشتباك مفهوش حاجة لانة كلة (غير الجودو)من بعيد والكابتن المفروض يقول للولاد ان الاشتباك يبقي من بعيد وبسرعة احسن حل هو انك تقولى للكابتن "علشان لازم يكون في امانة مابين اللاعب والكابتن" ولو على اللبس ممكن تجيبي بدلة كبيرة بالمناسبة انتى في انهى حزام؟ :) |
| جميع الأوقات بتوقيت GMT +2. الساعة الآن 06:48 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.