بوابة الثانوية العامة المصرية - الفرق بين جرافيك فنون جميلة, وجرافيك فنون تطبيقية

هنتكلم عن قسم الجـــرافيك في فنون جميلة والجرافيك في فنون تطبيقية, وايه الفرق برده بينهم ؟!
وازاى تدخل الكلية من غير متكون بتعرف ترسم عادي ????

أولا: قسم جرافيك ، (فنون جميلة) - لأدبي وعلمى علوم ورياضة:

أول سنة في فنون جميلة فنون هي إعدادي بتدرس فيها مادة من ال3 أقسام بتوعها، وبيكون اختيار القسم بالرغبات ومفيش تنسيق ابدا بتختار تانى سنة برغبتك
طبعا امتحان القدرات بتاعها هو نفسه بتاع قسم الديكور بس بعد كدة ف الكلية علمى بيدخل ديكور وادبي بيدخل اعدادى فنون. طبعا باستثناء اسكندرية

بتدرس أول سنتين الجرافيك بشكل عام، والسنتين التانيين بتتخصص في واحدة من شعبتين:
برغبتك برضو من غير تنسيق
1- شعبة تصميم مطبوع:
بتتكلم عن الرسم للطبيعة الصامتة (موديل أو أي حاجة قدامك) وكمان الرسم والحفر على المعادن باستخدام أحماض معينة
2- الرسوم المتحركة وفن الكتاب:
بتتكلم عن تصميم الشخصيات الكرتونية وتحريكها 2D، وتصميم أغلفة الكتب والمجلات والصفحات والجرائد وغيرها
يعني باختصار شعبة رسوم متحركة > ألوان
شعبة تصميم مطبوع > أبيض وأسود
..
جرافيك بتشتغل بعد ما تتخرج منه مصمم جرافيك شاطر ومحترف، وكمان بيبقى ليك شغل في مجال الديكورات والتشطيب المعماري مع شركات كبيرة جدا، ومجالات الدعايا والإعلان والسينما والمسرح والخدع السينمائية.
يعني بتتخرج ومعاك ذخيرة فنية وفي الكمبيوتر والبرامج كمان.
وممكن تشتغل رسام معماري وممكن تشتغل في الـAnimation والـGraphics.
من الآخر جرافيك قسم مجاله ممتاز وليه كذا طريق.
بس كده??

---------------------------------------------------------------------------

قسم اعلان (جرافيك) - فنون تطبيقية لعلمى فقط:

من أعلى أقسام الكلية في التنسيق الداخلي بعد قسم تصميم داخلي واثاث، في قسم إعلان انت بتدرس ازاي تطلع فكرة وتترجمها في شكل بصري عشان تبقى إعلان في أي وسيلة من وسائل الإعلان (إعلان طريق - تليفزيون - مجلة - ...), أو تصميم الهوية البصرية لأي مؤسسة أو شركة، يعني اللوجو بتاعها والحاجات اللي بتستخدمها زي الأوراق والأظرف والتيشيرت وأي حاجة زي كده حسب نشاط الشركة، كمان بتشتغل في التصميم المطبوع عموما زي المجلات والكتب والمطويات وغيره :D والخطوط واستخدامها في التصميم، انت بتتعلم تصمم فونت كامل في أول سنة إعلان :D
قسم الإعلان ومجاله عموما من أمتع المجالات اللي ممكن تشتغل فيها، انت في القسم بتفكر كتير وبتطلع أفكارك في اسكتشات وبعد كده بتبدأ تنفذها على برامج الجرافيك، ف أساسي يكون معاك لابتوب تشتغل عليه وعندك شوية معرفة ببرامج الجرافيك حتى لو بسيطة، وده ممكن توصل له بكورس قبل ما تبدأ دراسة في القسم.
طيب في ناس بتقول لك مش محتاج تدخل القسم عشان تشتغل الشغلانة دي انت ممكن تاخد كورس فوتوشوب وخلاص؟ انت فعلا ممكن تشتغل Graphic Designer وانت مش دارس، بس اللي هتتعلمه من كورس الجرافيك ده ازاي تشتغل على البرامج وتستخدمها بس مش هتتعلم أساسيات التصميم نفسها وازاي تطلع أفكار وازاي تعمل إعلان صح، وده اللي هتتعلمه في القسم. ودة الفرق طبعا.
المواد النظري بتاعة القسم تعتبر خفيفة.
وبالنسبة لمجال الشغل ف هو واسع ومطلوب جدا، سهل تلاقي شغل أول ما تتخرج بمرتب كويس، وسهل تشتغل في الدراسة أو في الاجازة كمان لو شغلك كويس وبتطور نفسك :D

مش لازم طبعا تبقي بتعرف ترسم علشان تخش الكلية المهم يكون عندك استعداد تتعلم,
الموهوب بيبقي ربنا خلقه معاه أسس وقواعد للرسم ومحاور, ولو متعلمش الحجات دى بتقع منه وبينساها ومستواه بيقل, لكن أي حد عادى عايز يتعلم ممكن يتعلم الأسس والقواعد دى كلها ويطور نفسه ويبقي أحسن من الموهوب بكتير ودة اسمه احتراف,
وطبعا الدليل وجود كليات فنون, م الاخر دى موهبة قابلة للتعلم وناس كتير مكانوش بيعرفوا يرسموا والحمد لله اتعلموا وجابوا اعلى تقديرات ف الكلية كمان

ومواعيد التقديم لامتحان القدرات هيكون بعد امتحان الثانوية العامة تابعوا المتدى واحنا في خدمتكم في اى استفسار

اضغط هنا لمعرفة نظام امتحان القدرات الجديد 2018