بوابة الثانوية العامة المصرية

بوابة الثانوية العامة المصرية (https://www.thanwya.com/vb/index.php)
-   اجتماعيات طالب (https://www.thanwya.com/vb/forumdisplay.php?f=112)
-   -   ذكريات زنقة الامتحانات :p (https://www.thanwya.com/vb/showthread.php?t=598229)

smsmzeros 03-05-2014 04:24 PM

ذكريات زنقة الامتحانات :p
 

دى فكره نقلهلكم من موقع تواصل إجتماعى
جميله جدا وهتنفع هنا اوى
ودى المقدمه بتاعتهم
و ذكريات ليه ؟ ماحنا لحد دلوقتي بنتزنق و نقول هانذاكر أول بأول من الترم الجديد ... و بنتزنق برضه :d
كتير بيبعتولنا الأيام دي خصوصا بقى اخواتنا في الثانوية العامة عايزين حل مش عارفين يذاكروا و لا طايقين شكل الكتاب الإمتحانات قربت و الوقت ضيق و كل المواد شبه بعض و كتير كتير كتير و بيقولولنا نعمل ايه ؟
احنا كمان زيكم على فكرة كلنا مرينا بظروف صعبة علتمنا ازاي نخلي بالنا من وقتنا ازاي بعمل كونترول على المذاكرة و المواد في مواضيع كتير نشرناها هانعيد نشرها من تاني و عاملين الموضوع كل واحد فينا هايقول تجربة مر بيها .. و اتعلم ايه منها و نصايح من الكبير للصغير و العكس كلنا هانتعلم من بعض
نظرا ان الموضوع معمول عشان نساعد بعض في الفترة المزنوقة دي و لأن ناس كتير بتعمل موضوعات محتاجه دعم معنوي في فترة مهمه في حياتها خصوصا اخواتنا في الثانوية العامة
ف عملا بالحديث الشريف " من كان يؤمن بالله و اليوم الآخر فليقل خيرًا أو ليصمت "مسموح فقط بالمشاركات الايجابيه والنصائح المفيده
.....
المهم الموضوع دا هبقى انقل فيه البوستات المفيده وهنتناقش مع بعض فيها


smsmzeros 03-05-2014 04:47 PM

دا بوست للمهندس احمد عطاالله ..طالب فكلية حاسبات ومعلوماات
.......
‏لو هتكلم عن زنقة الامتحان يبقى مفيش غير هيا " الفيزياء" 3 ثانوى من سنه تقريبا فى السنه ديت فضلت الف كتير على مدرسين ومكنتش بهتم بنفسى غير انى الف واشوف مين المدرس اللى هقدر اتأقلم معاه و فضلت على الحال ده لحد اخر شهرين " كانت خساره كبيره ايقنتها لاحقا "وقولت بقى انا هذاكر لوحدى وهعمل اللى اقدر عليه فى الشهرين دول
وكان قدامى حوالى 15 فصل وكان فيه فصول لوحدها بمقدار 10 فصول وقولت كل يوم هذاكر فصل وهخلص الفيزياء مرتين قبل الامتحان وجعلت كل شئ بمشيئة الله ولكن لم افعل شئ من كل ذلك العزم اللى عزمته مع نفسى والامتحان قرب وخلاص داخل على الامتحانات ولسه مخلصتش الا 10 فصول فهم فقط انما حفظ مفيش دخلنا على الامتحانات وكانت امتحانات اقرب ما اقول لنفسى الحمد لله على كل شئ مكنتش فاهم فى ارشميدس شئ ولا افقه شئ فى فصول الكهربيه والحمد لله تبقى قبل الامتحانات 5 ايام .. وقولت هفعل ما بوسعى لكى الم المنهج كله واقدر اخلص كل واراجع قبل الامتحان وتكرر نفس ما حصل سابقا وجعلت كل شئ بمشيئه الله ولم افعل شئو تملكنى الخوف والذعر على نفسى وكل ما يجول بخاطرى كم من درجات سوف انقصها فى ذلك الامتحان وتبقى يومين على الامتحان وكل ما افعله انى اريد ان اخرج من تلك المشكله " الخوف"وجاءت تلك المقوله التى لا انساها ابدا ما حييت " لعله خير ان شاء الله "كان وقعها على اذنى رهيب وايقنت من بعدها ان لا شئ مستحيل وفعلت ما بوسعى وركزت على كل ما افهمه من فصول ومسائل بجد بجد مسكت خيالى ولعبت دور المتوقع وكل ما افعله انى اقرأ كل فصل واستخرج منه ما اظن انه فى الامتحان وفى غضون هذان اليومان كل ما افعله انى اتوقع واطبق على ما اتوقعه وهكذا فعلت الا ان دخلت الى الامتحان وكان اغلب ما توقعته موجود بنسبه
75%
وكنت فى قمه الفرح " مكنش فيه ارشيميدس" والصراحه مكنتش متوقع انها تيجى ومن ركزت عليها وخرجت من الامتحان فرحان وقولت انا لو هنققص هنقص حوالى
6درجات على الاقل ..وتركت القديم " الفيزياء والتفكير فيها " وركزت فى متعه القادمه وهيا " الرياضيات ".فى الاخر عايز انصح اخوتى الصغار بعض النصائح : " اعتبروها من اخوكم وليس شخص غريب "- ابدأ من الان .- لا تجعل كل شئ فى المشيئه وانت لا تفعل شئ .- لا تجعل تفكيرك " السئ " يقودك الى ما قادنى .- توقع وتخيل وكن انت واضع الامتحان .- لا تجعل الخوف يتملكك ابدا .- لا تندم على شئ قديم .. ولكن استحى من عدم قدرتك لفعل شئ اخرون تمكنوا من فعله .
‏لعله خير ان شاء الله‬
فى الاخر احب ادعوا لكم بالتوفيق وان تحذوا طريق النجاح‏

صاحبة الرداء الابيض 03-05-2014 10:12 PM

موضوع بجد اكتر من جامد يارب حقق لكل واحد اللى بيتمناه يارب وطبعا التقيم ممتاز

smsmzeros 04-05-2014 02:31 PM

اقتباس:

المشاركة الأصلية كتبت بواسطة صاحبة الرداء الابيض (المشاركة 5842129)
موضوع بجد اكتر من جامد يارب حقق لكل واحد اللى بيتمناه يارب وطبعا التقيم ممتاز

مرورك الاجمل
آمين يا رب
..
شكرا جزيلا :)

smsmzeros 04-05-2014 02:41 PM

خليها على الله
 

الدكتوره رضوه :) .. طالبه طب اسنان
.......
‬وانا في سنة اولى كلية .. كان عندي امتحان anatomy head & neck المادة دي تعتبر رخمة نوعا ما ومحتاجه مذاكرة كتير .. الوقت اللي كان متاح قبل المادة اسبوع ، وبما اني اسنان والمادة بشري فكنت مش بذاكرها طول السنة وباعتمد على مذاكرة ما قبل الامتحان بشكل كلي ..ويشاء الله ان في الاسبوع اللي قبل الامتحان ده يجيلي حاجه مقاربة للتسمم وانام في السرير المدة دي كلها .. لا باقدر اقوم ولا اذاكر ولا حتى اكل .. قبل الامتحان بيومين اختي بدأت تقرأ معايا شوية .. وتذاكر لي وانا اسمع لها .. بس لسه تعبانه ومش مركزة اوي ..يوم الامتحان مكنتش عايزة اروح ومش عارفه هاكتب ايه في الورقة اصلا .. لو كانوا قالولي حطي انتي اسئلة الامتحان مكنتش هلاقي اسئلة مناسبة المنهج اللي انا مش مذاكرة فيه حاجه ده ..وسبحان الله العظيم .. لما اتحطت قدامي ورقة الامتحان كانت الاسئلة من ابرز الاجزاء اللي راجعتها مع اختي .. والاجابة منسقة في دماغي بطريقة غريبة جداااا .. ودخلت امتحان الشفوي ربنا فتح عليا ^_^
والدكتورة كانت مبسوطة من اجاباتي جدا.. والحمد لله جبت في المادة امتياز :d
...
الخلاصة : مهما كنت اهملت في اللي فات ومهما كانت ظروفك خد بالاسباب في الوقت الحالي واعمل اللي عليك .. وادخل الامتحان بثقة في الله بنسبة ١٠٠٪ .. يكفي ان ربنا يقول للشئ كن فيكون

Only Forward 04-05-2014 03:29 PM

انا جيت
نورت ؟؟؟؟؟
انا عارفة انى منورة علي طول
فعلا
وشكرا ليك علي النصائح
بس المشكلة مش مشكلة مادة واحدة
دووووووووووووووووووووول سبعة
طبعا عارفين يعنى ايه سبعة
ان شاء الله هحاول احلها مادة مادة
وربنا يسهل

smsmzeros 04-05-2014 03:42 PM

خليها على الله
 

نصيحه من آيه نبيل .. طالبه فثانويه عامه :)
....

السلام عليكم ورحمة الله وبركاته
نظرا لكمية التفاؤل الرهيبة الموجودة اليومين دول أنا حابة أقول حاجة جمل كده بسمعها وبتعصبني بصراحة "اللي ذاكر ذاكر" "فاضل شهر تفتكر هلحق صعب !"ده كلام بجد بنضحك بيه علي نفسنا والله أيوة انت عارف شهر ده تعمل فيه ايه ده تذاكر اللي اللي فاتك وتراجع وتحل شهر ده كفيل يحققلك حلمك ويفرح أهلك بيك بس الشيطان بيضيع عليك اى فرصة والله وبيزعزع ثقتك بالله ثم بنفسك ايوة أصله تعهد لبني أدم وتحدي المولي "فبعزتك لأغوينهم" مش عن الصلاة والطاعة لأ هو اصلا مش عايزنا نعمل حاجة تقربنا من ربنا وربنا بيحب العلم وإن الملائكة لتضع أجنحتها رضا لطالب العلمازاى نفقد أمل وربنا معانا ازاى نستسلم للشيطان ؟! إزاى ننسي أهدافنا وتعبنا ؟!والله والله لسه فيه أمل محدش يضيع الفرصة ربنا رزقنا بقدرات ملهاش حدود ربنا قادر يحقق احلامنا في دقايق بل ثواني خلي ثقتك في الله كبيرة ابدأ من اللحظة متقولش بكرة لأنك مش عارف أصلا هتعيش ليه ولا لا اعمل حاجة ربنا يحبهاجرب تذاكر مش هتخسر حاجة جرب تعبد ربنا صح جرب تذاكر صح عشان ترضي ربنا لانه بيحب اتقان العمل نيتك والله لو كده ربنا هيحقق حلمكاوعي تستسلم والله اللي يتعب الشهر ده يقدر يجيب 100% دهشهر عارف يعني ايه ؟!استغل كل يوم صح وابهر الكل بقدراتك واتحدى الشيطان واثبت للكل انك قوى اكسر حاجز الخوف بالدعاء هو صعب انك ليلة الامتحان تشوف جملة بالصدفة وتيجي تاني يوم سؤال choose مش صعب علي ربنا اللي لو قال كن فسيكون ابدأ من دلوقتي بلاش نت كتير واكتب هدفك قدامك وعلقه مكان ما بتذاكر حط 123 انا عايز اذاكر ايه ولما تخلص اللي حددته كافأ نفسك بانك تقعد علي النت او تعمل اللي بتحبه متتخلاش عن حلمك لو فاضل يوم وركز علي الرسائل الربانية اللي ربنا بيبتعهالك واكبر رسالة هيا التجارب اللي علي الموضوع ده اسفة علي التطويل علي فكرة انا في ثانوية عامة علمي علوم ادعولي بقي احقق هدفي ربنا يفرح قلوبكم ويرزقكم بالجنة

smsmzeros 04-05-2014 04:23 PM

خليها على الله
 

الدكتوره : نها .. طالبه فكلية طب
........
بصراحه انا ايام ثانوى بالنسبالى كانت احلى ايام ... احلى صحبه... واحسن مدرسين ... وافضل مستوى دراسى وصلت ليه هحكيلكم شويه عن تجربتى مع الاحياء...وبالرغم من انى كنت بحب الماده دى اوى بس كنت خايفه منها جدا ...يمكن لان ساعتها كان قدامى حل من اتنين عشان اخد درس فيها اما انى اروح عند مدرس كويس بس بعيد قوى عن مكان اقامتى او انى اختار مدرس من مدرستى او حته قريبه يقدر يجينى بسهوله ... ولانى بكره الاماكن البعيده والمواصلات فضلت انى اخد عند حد قريب ودى كانت اول غلطه " مش غلطه قوى يعنى"...بس للاسف هو شبه كرهنى ف الماده لدرجه انى كنت بذاكر المواد التانيه عشان اعوض اللى هنقصه ف الاحياء قبل ما امتحن اصلا... وقربت مواعيد الامتحانات وانا معلوماتى عنها لا تتعدى ال 60%... قولت خلاص بقى لازم اسيب عمو ده واكمل مع نفسى بملخصاتى ومذكراتى و ربنا يعيينى وبالفعل بدأت خلصت معظمها قبل ما نبدأ لغه عربيه ... بس للاسف هى كانت اخر ماده ولحد ما وصلنالها كنت خلاص جبت اخرى من التعليم كله ... المهم روحت الامتحان وانا مسلمه امورى لربنا وراضيه بأى نتيجه... والمفاجأه الامتحان كان كويس جدا مفيش فيه غير مسأله وراثه غلسه حبتين " حلتها برضه احنا جامدين مش اى كلام ".. وعدى ع خير بس مكنتش متوقعه ان الاحياء هى الماده اللى اقفل فيها درجاتها كامله اولا وان مجموعى يعدى 100% ثانيا" مش هنسى ابدا فرحتى ساعتها ولا احساسى بأن ربنا مضيعش تعبى ولا ماما وهى بتزغرد ولا بابا وهو بيقول لصاحبه ف التليفون دى بنتى ..الدكتوره "ربنا يكتب الفرحه لكل طالب سواء مجتهد او كسلان شويه
ونصيحتى ليكم‫
‏كن مع الله ولا تبالى‬‫
المستقبل قدامكم‬
روحوا ذاكروا بقى ونلتقى هناك ف‫ ‏الجامعه‬


smsmzeros 04-05-2014 04:37 PM

خليها على الله
 

نصيحه من الدكتوره سحر :)
...
الشخص الناجح مش هو اللي يحط إيده علي خده لما أحلامه متتحققش ..
الناجح هو اللي طموحه ملوش سقف وكل نجاح بيوصله بيعتبره مرحلة لنجاح أكبر
وكل فشل بيتعلم منه
أوعي تخلي هدفك يستعبدك
ولما متحققهوش تقعد جمبه تولول عليه
الواقع مش وردي
الحياة نجاحات وإخفاقات
خليك قوي :) ‬


smsmzeros 04-05-2014 04:58 PM

اقتباس:

المشاركة الأصلية كتبت بواسطة نسيم الشتاء (المشاركة 5842840)
انا جيت
نورت ؟؟؟؟؟
انا عارفة انى منورة علي طول
فعلا
وشكرا ليك علي النصائح
بس المشكلة مش مشكلة مادة واحدة
دووووووووووووووووووووول سبعة
طبعا عارفين يعنى ايه سبعة
ان شاء الله هحاول احلها مادة مادة
وربنا يسهل

ههههه .. اكيد نورتى ودى محتاجه كلام :d
..

مش تستعجلى لسه الموضوع مستمر
واللى جاى احسن إن شاء الله
..
وكل مشاركه بيبقى منها هدف :)
...
العفو وشكرا على مرورك الجميل

شهد اليوسف 04-05-2014 06:02 PM

موضوع رؤؤؤ9ؤؤؤؤ9ؤؤعة بجد يا صالح
استفدت منو انا شخصياا كتيرر وحسيت انو لسه في امل وئدامي فرصة اعوض كل اللي فاتني ان شاء الله صحيح انهم 7 مواد بس احناا اقوي منهم بكتيرر ( وبس زي ما ئولناا العبرة في اللي ينفذ :d )
شكرا ليك اؤؤؤؤؤؤؤؤؤي ^_^
وجزاك الله خيراا :)

....رولا.... 04-05-2014 09:25 PM

جزاك الله خيرا موضوع مميز

رآجيه رضآ الله 04-05-2014 09:45 PM

حلووووة النصايح دي أدت الواحده دفعه وأمل

يـــارب

جزاكمـ الله خيراً

نولي 22 06-05-2014 10:59 AM

موضوع جميل

جزاك الله كل خير

خلتونى اتفائل شوية

smsmzeros 06-05-2014 08:28 PM


نصيحه من ... ReMo Elrwimy
حاول .. تصلى

اقرا قران .
قرب من ربنا
قرب منك كل حاجه حلوة
قول الكلمه الحلوة .
ذاكر
افرح
بلاش كلام ملوش لذمه
زى كلام الحب والعبط ده
خليك ايجابى خليك متفائل
جرب وحاول
اه ممكن تفشل لكن
متنساش ان اول خطوات النجاح الفشل
قرب من ابوك وامك
صاحب اخوك ..
حافظ على بنات الناس
خلى ربنا قدامك قبل ماتعمل اي حاجه
اصحى كل يوم الصبح بدري
رتب الشقه بتعاتك
افتح الشبايبك
العب رياضه
خلى ليك اكتر من هوايه
ازرع شجرةاو ورردة
‫كن متفائل
‬جربوا وادعولى

smsmzeros 08-05-2014 01:51 PM

اقتباس:

المشاركة الأصلية كتبت بواسطة نولي 22 (المشاركة 5844629)
موضوع جميل

جزاك الله كل خير

خلتونى اتفائل شوية

مرورك الاجمل
جزانا الله وايكم
إن شاء الله تتفائلى كمان وكمان


اقتباس:

المشاركة الأصلية كتبت بواسطة رآجيه رضآ الله (المشاركة 5843258)
حلووووة النصايح دي أدت الواحده دفعه وأمل

يـــارب

جزاكمـ الله خيراً

وهوا دا المطلوب بس يا رب يكون مع الامل دا عمل عشان نحقق المطلوب :)
جزانا الله واياكم

اقتباس:

المشاركة الأصلية كتبت بواسطة ....رولا.... (المشاركة 5843230)
جزاك الله خيرا موضوع مميز

جزانا الله واياكم
شكرا لمرورك :)

اقتباس:

المشاركة الأصلية كتبت بواسطة شهد اليوسف (المشاركة 5843011)
موضوع رؤؤؤ9ؤؤؤؤ9ؤؤعة بجد يا صالح
استفدت منو انا شخصياا كتيرر وحسيت انو لسه في امل وئدامي فرصة اعوض كل اللي فاتني ان شاء الله صحيح انهم 7 مواد بس احناا اقوي منهم بكتيرر ( وبس زي ما ئولناا العبرة في اللي ينفذ :d )
شكرا ليك اؤؤؤؤؤؤؤؤؤي ^_^
وجزاك الله خيراا :)

اكيد اقوى ويا رب تستفيدى كمان وكمان
ربنا يوفكم جزانا الله واياكم خيرا

smsmzeros 08-05-2014 01:52 PM


نصيحه من

Mờĥąmễd Ąħmễd


...............
لو فاكر إنك هتقرأ بوست عن طريقةالمزاكرة ، أو ازاي تنظم وقتك أو كيف تصبح طبيباً ناجحاً ، يبقى بلاش تكمل قرآءة ...

أنا هتكلم عن شوية ثوابت لازم تخليها قدام عينيك في أي مرحلة في حياتك ناوي فيها تثبت نفسك (( الثانوية كنموذج مصغر مثلا )) و هيا يا سيدي :
١- النجاح 20% منه مهارة و80% تخطيط و اجتهاد !!
٢- الفرق بين الشخص الناجح و الفاشل مش فرق قوة أو قدرات !! لكن فرق ((( إرادة و عزيمة )))
٣- حط لنفسك (( أهداف )) عالية قوي ، أعلى حتى من قدراتك ، عشان لو مش هتطول القمر ، هتطول النجوم !!
٤- الناجح الي بيقارن إنجازاته بالأهداف بتاعته ، لكن الفاشل بيقارن إنجازاته بإنجازات غيره !!
٥- اوعى تخلي الفشل من الخيارات الي قدامك ! آنتا أكيد هتنجح ، لكن لازم تعمل الي عليك ؛)
النقطة الأخيرة و أهم نقطة ، إن عمرك ما هتلاقي إنسان ناجح إلا و لـ (( بر الوالدين )) و قربه من ربه نصيب كبير
و ربنا يوفقكم و يوفقنا ...



islamkd 08-05-2014 08:56 PM

شكرا ليكم بجد انا مذكرتش الرياضة من اول السنة انا 3 ثانوى ولس هبدا فيها وكونت محبط جدا جدا و دايما كونت السنة كلها بهرب منها بغيب كتير من حصص المدرس و مش بذكرها خالص وان شاء الله هخلصها و ربنا يسهل

شكرا لكل الردود الجميلة الى بتدى امل لبكره شكرا ليكم

smsmzeros 11-05-2014 11:29 AM

قواعد المذاكره العشرين :-
1) اعمل شاى
2) اشحن الموبايل
3) ادخل الحمام
4) اتأكد ان السقف لسه فى مكانه
5) اتأكد ان السرير لسه فى مكانه
6) اتأكد ان الحيطه لسه فى مكانها
7) اتأكد ان الموبايل بيشحن
8) اعمل شاى بدل اللى برد
9) اتأكد ان التلاجه فى مكانها
10) اتطمن تانى على التلاجه معلش
11) السقف بخير !
12) السرير فى مكانه !
13) التلاجه تمام !
14) فين الشاى !
*الكهربا قطعت*
15) .........
16) .........
17) .........
18) .........
19) .........
...< Five Hours Later >...
*الكهربا رجعت*
20) اعمل شاى



smsmzeros 11-05-2014 11:42 AM

شـوفت الجـو أتغير في الشوية اللى فاتو كدة ازاي ؟
شـوفت من قمـة الحر لـ قمة البرد أزاي ؟
في 24 ساعه بـ الظبط ؟
شـوفت قدرة ربنا في غمضة عين ايه الـ حصل ؟
طـيب ما مش ربنـا الـ غير الـ جو هـو ربك أنت كمان ؟
مش ربنا الـ بعتلك البلاء قادر في غمضة عين يشيله كمان ؟
خـلاص زعلان ليه ,
ربـــك بيقول كن فـ يكون , كلمة واحده بس بيغير منها الكون كله , و يغير بيها حالك أنت كمان ,
أنت ممكن تنام مهموم و حزين و مكسـور الخاطر , و تقوم من نومك على فرج لا على بالك ولا خاطرك ,
في ثانيه الحال بيتبدل , في أقل من ثاينه , بس الصبر الصبر , لازم تصـبر , و تثق في ربك ,
مهما ضــــــــاقت هتفـرج , مهما أتقفلت هتفرج , مهما حصل هتفرج , إن مع العسر يسرا ,
أصبر و ثق بالله , و ربنا مُستحيل يضيع حد واثق فيه , مُستحيل
احبك ربى

smsmzeros 14-05-2014 05:11 AM


لما ألاقي موضوع بيسأل " هل في حد هنا في بلا بلا بلا .. الخ
عرف يذاكر آخر شهر و يجيب تقدير او مجموع عالي ؟ "يعني مشكلتك في انك تلم في شهر و لا مشكلتك في النتيجة ؟
هل لو قالولك انه مفيش نتيجة مش هاتشتغل ؟
عارف ... هي دي مشكلتنا مابنعملش اللي علينا طالما مفيش نتيجة ملموسة هاتيجي حتى لو ده اللي المفروض يتعمل انت اسمك ايه ؟سنك كام ؟وظيفتك ايه ؟ وظيفتك طالب
طالب علم
سيدنا إبراهيم عليه السلام لما الملائكة راحت تبشره قالت "إِنَّا نُبَشِّرُكَ بِغُلامٍ عَلِيمٍ"مش غلام بس .. لا عليم
مش عالم .. لأ عليم
ليه بتحصر نفسك في النتيجة ؟
ليه مش بتتعلم لغاية او لهدف طلب العلم في حد ذاته عارفة انه ده كلام مجرد اوي .. خصوصا في بلدنا
بس مش ذنبك انك اتولدت في مصر و بقيت طالب علم فيها في عصرنا ده
بس ذنبك لو رضيت بده
عارف احساسك و انت بتشوف فيلم او بتقرأ كتاب و نفسك تعرفي ايه و ايه الحبكة الدرامية مثلا ؟ليه معندناش الشغف ده ؟
لو حد جرب حلاوة انه يعرف معلومة جديدة .. عمره ما هيبطل يتعلم
كلام برة السرب عارفة .. بس يهمني أعرف رأيكم

raneem magdi 17-05-2014 05:42 PM

اه بجد كلام جميل جدا بس يارب اقدر اتعامل بيه انا حياتي مدمره اساسا كل ما اعمل جدول مش امشي عليه لحد ما وقت خلااااص وماما كل شويه ها دا فاضل شهر انتي ازاي كتبك فاضيه فين حل لحد ما جالي احبااااط

Omnia Ayad 19-05-2014 05:22 PM

انا بذاكر من اول السنه يمكن يكون مش بتركيز اوي بس حاسه نفسي دلوقتي تايهه مش عارفه اعمل ايه
انا قرات الموضوع جميل جدا اداني امل وف نفس الوقت خوفي زاد











__________________________________________________ _____________________________
لا اله الا الله عدد ما كان وعدد ما يكون وعدد الحركات والسكون

المجلس2009 20-05-2014 02:29 AM

والله كلامكو جميل اوي وحاسس فية الصدق بس كتييييييييييييييير
دا المذاكرة أسهل

smsmzeros 22-05-2014 10:52 PM


نصيحه من dr:b ....... ‎
تلاقي الشاب من دول طول النهار عمال يدعي يا رب انجح ... يا رب اجيب 99% يا رب اخش هندسة.... يا رب اجيب امتياز .... يا رب ..... يارب ................وطول اليوم عمال يتنقل بين الفيس والاسك والتلفزيون والواتس وشويه يقوم ياكل ... يقوم يكتشف للاكتشاف العظيم انه تخن يقوم يقعد يلعب ضغط وبطن ..يحس انه عرق يقوم يستحمى بعد ما يطلع من الحمام يكتشف اكتشاف اعظم ان اوضته مش متروقة ...... إلخو وعمال يدعي كل شويه كل ما يفتكر ان عنده مذاكرة وامتحانات....واحيانا بتوصل معاها انه يفضل يدعي كل ساعة في يوم الجمعة عشان بيستنى ساعة الإجابة .....هوبا تيجي اخر السنة ... ما حققش اللي في باله ... طبعا يخش في إكتئاب وزعل وليه يا رب وانا دعيتك وربنا ما بيستجبش .....اضرب لحضرتك مثال بسيط تخيل واحد واقف قدام طربيزة وعمال يدعي يا رب الطربيزة تتحرك وبيدعي بحرقة وحرارة وبيعيد وبيدعي كل شويه .... قعد سنة سنتين هوبا الطربيزة ما اتحركتش .... زعل جدا وليه يا رب انا بقالي كثير بدعي بلا بلا بلا ..... طبعا هتقول ان الشخص ده مش عاقل ... ايه اللي بيعمله ده !! ويزعل على ايه اصلا !!حضرتك ربنا بيحب عبده وبيحب ليك الخير .. بس هو مستنيك بس تجرب تحركها وربنا هيسهلها عليك بطريقته ده نفس الشخص اللي فوق اعقلها وتوكل ... اتعب وادعي ... ذاكر وادعي
اتمنى تكون الرسالة وصلت شدوا حيلكم بقى طبعا مش بقلل أبدا من قيمة الداعاءبس بزود في اهمية التعب
‫‏شتان بين التوكل والتواكل

son470508165410 26-05-2014 10:42 PM

موضوع في غايه الافاده
بس هل من الممكن انك تنزلي لينا الموقع ده

smsmzeros 13-06-2014 03:25 PM

نصيحه من المهندس :احمد فوزى :)
........
نصيحة لكل طلاب الثانوية العامه اللى داخلين على مرحلة الجامعه ,, مفيش حاجه اسمها كلية قمة بمعنى لو حليت وحش فى الامتحانات مش لازم تنتحر يعنى
انت بنفسك تقدر تخلى تعليمك قمة ,, انا مهندس ميكانيكا و شغال فى مواقع و قابلت كتيييير منهم المهندس اللى بيفهم اوى و تحس ان دماغه بتنور و منهم اللى اخد الشهاده فى كيس شيبسى و قابلت خرجين تجاره و علوم و اداب و السن ناجحين جدا جدا
ابعد عن ضغط اهلك ما تخليش حد يقرر مستقبلك اختار الحاجه اللى انت حاسس انك حتنجح فيها الحاجه اللى انت بتحبها مش اللى بيحبها بابا ,,
كلمة كليات القمه دى احنا اللى صنعناها تعليمك بيبان اذا كان قمه او لا فى سوق العمل
انا شخصيا لو رجع بيا الزمن كنت هفكر جديا انى ادخل كلية اعلام مش هندسه ,,
مش علشان هندسه وحشه بالعكس انا بعشقها و بعشق علم الميكانيكا بس انا كنت حاسس انى هكون ناجح فى الاعلام .
فكر و اختار و قرر مصيرك بايدك و تأكد مفيش حاجه اسمها كليات قمه

smsmzeros 13-06-2014 03:32 PM

نصيحه من dr:B :)
.....
الفيزياء = العو الكبير = البعبع = اللى الناس بتحول ادبي عشان خايفين منهامصطلحات كثير بنسمعها كفيلة انها تخليك اصلا تحبط من المادة قبل ما تدخل الامتحان ... وبتدخل الامتحان عليك ضغط نفسي رهيب جدا وخايف جدا رغم انك اول ما بتحل امتحانت مع نفسك بتمشي فيها كويس وبتحس انك برنس
اول حاجة لازم افهمك ان الفيزياء مادة زي اي مادة تانية وانا شايف انها مش اصعب من باقي المواد ولا حاجة بس احنا اللي بنهول الموضوع
تذاكر اليومين دول إزاي ... مفيش حد يقدر يجبرك على استايل معين للمذاكرة في اليومين دول اي مذاكرة او حل هيفيدك
انتم كلكم 18 او 17 سنة ما شاء الله عليكم وكلكم ناضجين كفاية انكم تعرفوا ايه اللي ناقصكم وايه اللي محتاجين تعيدوا عليه او تراجعوه
واحد يحب يراجع التعريفات والبراهين في اليومين دول وواحد يحب يراجع مسائل وواحد يحب يراجع فصل بعينه وواحد يحب يحل الامتحانات وواحد يحب يجيب المنهج كله من تاني كل ده مفيد وكل ده صح وكل واحد ادرى هوه ايه اللي نقصه ... المهم بقى انك ما تضيعش اي وقت خالص ... كل دقيقة بتعدي بتقربك من الامتحان
ادخل الامتحان نايم كويس جدا جدا لان الفيزياء محتاجة تركيز واستيعاب كويس
بلاش تكلم اي حد ممكن يحبطك بالعكس عاوز تهدي اعصايك وتريح بالك كلم واحد صاحبك وهديه والله انته نفسيا اللي هتستريح
نظم اجابتك والمسائل حلها بالنظام اللي متعود عليه
واهم حاجة تفرغ كل المعلومات اللي في المسألة قدامكلو فيه سؤال او حاجة استعصت عليك ما تقفش عليها دقيقة وخش على اللي بعده على طول وارجعلها بعد ما تكون هديت اعصابك وانتخت في اللجنة واللجنة هديتلو فيه مسألة استعصت عليك .. ومش عارف تتصرف فيها ... اظرف كل القنوانين المتعلقة بالمسألة قدامك وطلع اي حاجة تعرف تطلعها هتلاقي المسألة بتنور حبة حبة بس خليها في الاخر خالص
ما تنساش وردك ودعاءك وتركز مع نفسك ومتشغلش بالك بالناس اللي بتعيط حواليك حتى لو كنت مزنوق او متلخبط العياط مش هيفيد بحاجةبالعكس هيوترك وهيوتر اللي حواليك كمان حاول لغاية اخر دقيقة والله ممكن الحل تفتكره في اخر لحظة اخواتنا اللي في ازهر الكلام اللي قولته في الفيزياء ينطبق عليكم بالضبط
وربنا يكون في عونكم بالتوفيق ليكم جميعا لو عندك نصيحة لغيرك ما تستخسرهاش فيهم وهم هيقرأوها ما تقلقش

alshymaa hafez 13-06-2014 07:47 PM

انا داخله السنة الجايه 3 ثانوى واستفدت جامد من الكلام ده جزاكم الله خيرا ^_^

NeVeR CoMe BacK 13-06-2014 09:19 PM

خير خير خير :d

smsmzeros 13-06-2014 10:01 PM

اقتباس:

المشاركة الأصلية كتبت بواسطة son470508165410 (المشاركة 5871384)
موضوع في غايه الافاده
بس هل من الممكن انك تنزلي لينا الموقع ده

حضرتك إبحثى فجوجل عن نفس العنوان
هتلاقى الصفحه على الفيس هى عباره عن مناسبه وبيشارك فيها كل اللى عنده نصيحه :)

smsmzeros 13-06-2014 10:04 PM

اقتباس:

المشاركة الأصلية كتبت بواسطة alshymaaeldeep (المشاركة 5898016)
انا داخله السنة الجايه 3 ثانوى واستفدت جامد من الكلام ده جزاكم الله خيرا ^_^

إن شاء الله ديما تستفيدى وتفيدى :)
جزاكم الله وإيانا خيرا

smsmzeros 13-06-2014 10:12 PM

اقتباس:

المشاركة الأصلية كتبت بواسطة never come back (المشاركة 5898146)
خير خير خير :d

؟؟؟؟؟؟؟
عموما إن شاء الله خير :)

ahmad khalid 13-06-2014 10:17 PM

موضوع رائع انا رايح 3 ثانوى و استفدت منه من بعض الاجزاء

smsmzeros 13-06-2014 10:34 PM

اقتباس:

المشاركة الأصلية كتبت بواسطة ahmad khalid (المشاركة 5898209)
موضوع رائع انا رايح 3 ثانوى و استفدت منه من بعض الاجزاء

بتمنالك دوام
الاستفاده والتقدم والنجاح :)

smsmzeros 17-06-2014 10:39 AM

إيه اخبار الامتحانات معاكم

Solty Ray 19-06-2014 09:05 PM

الحمد لله
في الحلوووووووووووو وفي للاسف الوحش
بس امتحان الاحياء كــــــــــــــــــــــــان جميل الحمد لله
ويارب كل المواد الباقية زيها كدة

smsmzeros 20-06-2014 08:27 AM

اقتباس:

المشاركة الأصلية كتبت بواسطة solty ray (المشاركة 5904814)
الحمد لله
في الحلوووووووووووو وفي للاسف الوحش
بس امتحان الاحياء كــــــــــــــــــــــــان جميل الحمد لله
ويارب كل المواد الباقية زيها كدة

المهم نفرح بالحلو ونتعلم من الوحش ونستفاد منه ونتفادى الاخطاء بتاعته قدر المستطاع
..
الحمد لله
...
يا رب
..
إن شاء الله تكون كل المواد زيها كده حلوه وجميله وسهله وبالتوفيق لكم جميعا :)
..
شدى حيلك ببقى كده وخلاص هانت

شروق احمد محمد 09-07-2014 04:27 PM

جزاك الله الف الف خير
انا برده رايحة سنة تالتة
بالله عليك ادعيلي

نورهان العريشى 21-07-2014 01:25 AM

الموضوع جميل جدا ...

اسراء سمير00 21-07-2014 02:56 AM

بجد من أروع الموضوعات الهامة والمميزة
تسلم إيد حضرتك
وربنا يوفقنا جميعا في كُلياتنا وحياتنا ومستقبلنا
شكراااا جزيلاااااا لحضرتك علي الموضوع القيم ..

خالص تحياتي

smsmzeros 23-04-2015 12:27 PM

شكرا لمروركم
تم تنشيط الموضوع لاهميته ف الايام دى

aalaaabdelhamed 23-04-2015 12:48 PM

انا خاايفة الامتحانات تيجي صعبة او تيجي حاجة مش عارفاها

smsmzeros 23-04-2015 01:10 PM

اقتباس:

المشاركة الأصلية كتبت بواسطة aalaaabdelhamed (المشاركة 6163208)
انا خاايفة الامتحانات تيجي صعبة او تيجي حاجة مش عارفاها

زى ما بنقول ديما
لازم نتخلص من الخوف دا
او نحوله لدافع لينا يخلينا نشد حيلنا لحد ما نطمن او نستغله فانه نخليه نقطة ضغط عشان نذاكر
..
او نتخلص منه لان الواحد مننا بيعمل اللى عليه ومفيش داعى للخوف من بكره لانه فالغيب وفيد الخالق عز وجل
واحنا بنقدم له العمل والنتيجه من عند ربنا

smsmzeros 23-04-2015 03:23 PM

الدكتوره سحر قالت مجمل اللى عاوز اقوله وبزياده
....

من واقع بوستاتكم ورسايلكم رغي لابد منه ..
1- حالياً كلكم بتمروا بمرحلة ال mental block مخكم خلاااااااااص فيص بمعني الكلمةجاب أخره ماشي علي رتم معين بقاله شهوراللي كان بيدح من أول السنة وصل لمرحلة المش قادرواللي كان مكسل من أول السنة بدأ يعمل شغل أكبر من طاقته فتعب
بسرعةواللي قافل علي نفسه ومنعزل عن العالم
واللي ...ومشكلة المخ اللي قفل وقال انا هستسلم لأني مش قادر دي بيتم التعامل معاها بنوعين من البشر فيه نوع هيقول " جري إيه 0_0 إنت هتشمتهم فيا ولا إيه ؟يعني انا مستحمل كل ده عشان تقولي في الاخر مش قادر ؟ "ونوع أخر هيقول " فعلاً انت مش قادر وانا مش قادر وفكك بقي هنعمل ايه يعني اكتر من اللي عملناه ؟ نريح بقي وقدر الله ماشاء فعل واللي عملناه كفاية ومش مهم يعني نص المنهج مش مراجعينه ! "دول نوعين نوع إنهزامي بيقع مع أول مشكلة ويقول مش هكمل السباق رغم إنه لو كان صبر علي نفسه شوية كانت قدرت وكملت ديفاضلها خطوة وتكسب السباق
ونوع قادر يحفز نفسه دايماً هو عارف إن نفسه من حقها تتعب بس مش من حقها إنها تستسلم !من نظرتي العامة علي الإيفنت والرسايل اللي بتجيلنا سواء علي البيج أو الخاص كلكم حالياً قاعدين قعدة رباطية عمالين تقنعوا نفسكم إنكم عندكم مشكلة في كـــــــــــــــــــــــــل المواد مش عارفين تراجعوا كـــــــــــــل المواد
ليل نهار انا عندي مشكلة .. انا مش عارف اراجع .. أنا بعك من أول السنة.. طيب هو فيه أمل ؟ .. طيب انا كده حلمي راح ؟أولاً أنا ضد مبدأ التعميم في كل أنحاء حياتنا أول طريقة عشان تحل مشكلة هو إنك تعرف هي إيه المشكلةوبالمناسبة كلكم ال IQ أو معدل الذكاء بتاعكم فوق الطبيعي الحمدلله وعشان كده وصلتوا للمرحلة الثانوية أو الكلية تتفاوتوا في مرحلة ما فوق الطبيعي بس في النهاية كلكم في المعدل السليم عشان كده مينفعش تعمم مشكلتك لأنك كده مش هتعرف تحلهاأنا عايزاك تقعد مع نفسك وتقنعها فعلاً إن فيه مشكلة بس هي المشكلة في مادة إيه بالظبط ؟ وأنهي جزء في المادة دي ؟ وفي مذاكرتها ولا في مراجعتها ولا في الحل عليها ؟اعرف ايه هي النقطة اللي انت مش عارفها وليه مش عارفها وساعتها هتبقي حليت نص المشكلة !بلاش تعميم بلاش تقول انا عندي مشكلة في كل المواد وكل الدراسة عشان كده انت مش هتحل حاجة ؟!ولا حتي اللي بيساعدك هيعرف يساعدك طبيعي علي سبيل المثال لو عندك 7 مواد ان علي الاقل 2 بس او اكثر بقليل هما للي متضايقينك واكيد جزء معين منهم هو اللي متضايقك لكن مش الكل !دي نقطة

2- بطلوا هرجلة ! بطلوا مذاكرة بأسلوب اللهم صلي ع النبي نستفتح اليوم النهاردة بإيه مد إيدك يا باشا في الصندوق والكتاب اللي يطلع نذاكره بالصلاة ع النبي !عيب بقي انتوا ناس كبار وناضجيين واكيد فاهمين ايه اللي ناقصكم ولازم تبقوا ماشيين بنظام ومسستمين المنهج في دماغكم بخطة ثابتة لأن أهم نقطة في الحل في الامتحان هي استرجاع المعلومة والمعلومة هتضيع لو انت بتهرجل وانت بتستوعبها ! خليكم منظمين في مذاكرتكم وفي حفظ معلوماتكم !

3- هو انتوا ليه قاعدين 24 ساعة علي النت ؟! احنا لما كنا قدكم في ثانوي كنا عاملين معسكر مغلق من شهر 3 لا نت ولا تلفزيون انا عارفة انكم بتستفيدوا من الإيفنت بس ساعة كل يوم بالليل تدخل تشوف ايه الجديد لكن بلاش حاجة تشتتكم أرجوكم !

4- لو مش هتبقي إضافة لصحابك بلاش تكون مصدر تعطيل وتشتت ليهم !

5- بطلوا تدوروا علي خمسين ألف مصدر للمذاكرة ثبت دماغك علي مصدر واحد عشان متتشتتش !

6- بطلوا كسل وأصحوا بدري واستغلوا ساعات النهار الأولي دي لأنها بتكون مميزة جداً وهادية ومفيش دوشة خلوا في بالكم إن كمان كام يوم العيال الصغيرين بتوع ابتدائي هياخدوا اجازة وهيملوا الشارع زعيق ولعب وصويت ومش هتعرفوا تذاكروا باقي ساعات النهار

7-كلوا كويس عشان من ناقصة تعب ! تعب الامتحانات لوحده كفاية

8- البنات البنات البنات أرجوكم التوتر ملوش لازمة التوتر بيضيع قدرتك علي استرجاع المعلومات ناهيكي عن حفظها سيبي التوتر علي جمب طلقيه بالتلاتة إنتي مش محتاجة تتوتري :((

9- قولنا قبل كده وهنقول تاني ملكمش دعوة بالإشاعات ولا ببرامج التوك شو

10 - انا عارفة ان معظمكم حالياً بقي بيصلي وبيدعي استغل الفترة دي فرصة وحسن علاقتك بربنا وقويها وحافظ علي كده حتي بعد ما تحقق حلمكحلمك مش وهم .. إنت تقدر تخليه حقيقة .. آمن بيه وهيتحقق إن شاءالله

dr.Sa7ar

amal alamir 23-04-2015 04:07 PM

انا بتكلم بجد
 
كل التجارب اللى حضارتكم قولتوها كويسه جدا

انا اتشجعت جدا وخصوصا لان الكلام حقيقى مش كلام علم نفس وخلاص
يعنى اللى حصل معاكم
ان شاء الله اقدر اخلص يارب :rolleyes::rolleyes::rolleyes::rolleyes::rolleyes: :rolleyes::rolleyes:
ويوفقكم جميعا :028ja7::028ja7::028ja7::028ja7::028ja7::028ja7::0 28ja7::028ja7:
حلمى يوما ما سنلتقى
لا تتأخر عليا انى انتظرك
{لا تدرى لعل الله يحدث بعد ذلك امرا }:022yb4::022yb4::022yb4::022yb4::022yb4::022yb4::0 22yb4::022yb4::022yb4::022yb4::022yb4::022yb4::022 yb4::022yb4::022yb4::022yb4::022yb4::022yb4::022yb 4::022yb4::022yb4:

smsmzeros 23-04-2015 04:15 PM

اتمنالك التوفيق والافادة الدائمه
ربنا يعينك

Duke Tefa 05-06-2015 03:14 AM

اقتباس:

المشاركة الأصلية كتبت بواسطة smsmzeros (المشاركة 5841666)

دى فكره نقلهلكم من موقع تواصل إجتماعى
جميله جدا وهتنفع هنا اوى
ودى المقدمه بتاعتهم
و ذكريات ليه ؟ ماحنا لحد دلوقتي بنتزنق و نقول هانذاكر أول بأول من الترم الجديد ... و بنتزنق برضه :d
كتير بيبعتولنا الأيام دي خصوصا بقى اخواتنا في الثانوية العامة عايزين حل مش عارفين يذاكروا و لا طايقين شكل الكتاب الإمتحانات قربت و الوقت ضيق و كل المواد شبه بعض و كتير كتير كتير و بيقولولنا نعمل ايه ؟
احنا كمان زيكم على فكرة كلنا مرينا بظروف صعبة علتمنا ازاي نخلي بالنا من وقتنا ازاي بعمل كونترول على المذاكرة و المواد في مواضيع كتير نشرناها هانعيد نشرها من تاني و عاملين الموضوع كل واحد فينا هايقول تجربة مر بيها .. و اتعلم ايه منها و نصايح من الكبير للصغير و العكس كلنا هانتعلم من بعض
نظرا ان الموضوع معمول عشان نساعد بعض في الفترة المزنوقة دي و لأن ناس كتير بتعمل موضوعات محتاجه دعم معنوي في فترة مهمه في حياتها خصوصا اخواتنا في الثانوية العامة
ف عملا بالحديث الشريف " من كان يؤمن بالله و اليوم الآخر فليقل خيرًا أو ليصمت "مسموح فقط بالمشاركات الايجابيه والنصائح المفيده
.....
المهم الموضوع دا هبقى انقل فيه البوستات المفيده وهنتناقش مع بعض فيها



لو سمحت يا مستر
فيه موضوع كدا علي اجتماعيات طالب
اسمه "دفعة ثانوية عامة 2016" مهم جدا كنت عاوز حضرتك تثبته عشان الطلبة يدخلوا عليه بكل سهولة

smsmzeros 07-06-2015 05:27 PM

اقتباس:

المشاركة الأصلية كتبت بواسطة engineer tefپ0ٹ1 (المشاركة 6203137)

پ1†8پ1‡2 پ1…1پ1†9پ1„5پ1„2 پ1‡4پ1ƒ9 پ1†9پ1…1پ1„2پ1„9
پ1†5پ1‡4پ1‡1 پ1†9پ1‡2پ1…4پ1‡2پ1…7 پ1†7پ1„7پ1ƒ9 پ1…7پ1†8پ1‡4 پ1ƒ9پ1„4پ1„2پ1†9پ1ƒ9پ1…7پ1‡4پ1ƒ9پ1„2 پ1…5پ1ƒ9پ1†8پ1„0
پ1ƒ9پ1…1پ1†9پ1‡1 "پ1„7پ1†5پ1…7پ1„1 پ1„3پ1ƒ9پ1‡0پ1‡2پ1‡4پ1„1 پ1…7پ1ƒ9پ1†9پ1„1 2016" پ1†9پ1‡1پ1†9 پ1„4پ1„7پ1ƒ9 پ1†7پ1‡0پ1„2 پ1…7پ1ƒ9پ1‡2پ1…0 پ1„5پ1…4پ1„9پ1„2پ1†7 پ1„2پ1„3پ1„0پ1„2پ1‡1 پ1…7پ1…2پ1ƒ9پ1‡0 پ1ƒ9پ1†8پ1…5پ1†8پ1„0پ1„1 پ1‡4پ1„7پ1„6پ1†8پ1‡2پ1ƒ9 پ1…7پ1†8پ1‡4پ1‡1 پ1„0پ1†7پ1†8 پ1…1پ1‡1پ1‡2پ1†8پ1„1

پ1ƒ9پ1‡2پ1†8پ1ƒ9 پ1ƒ9پ1…1پ1†9پ1‡3 پ1…3پ1ƒ9پ1†8پ1„5 پ1‡2پ1†9پ1…2 پ1†9پ1…1پ1„2پ1„9 پ1‡2پ1†8پ1ƒ9 پ1ƒ9پ1‡3 پ1†8پ1†6پ1„0
..
پ1„5پ1ƒ9پ1…4پ1„9 پ1„5پ1…4پ1„9پ1„2پ1†7 پ1ƒ9پ1‡2پ1†8 پ1†9پ1ƒ9 پ1„7پ1†5پ1…7پ1‡1 2015 پ1„2پ1„6پ1†8پ1…3 پ1ƒ9پ1†9پ1„2پ1„5پ1ƒ9پ1‡0پ1ƒ9پ1„2 پ1‡1پ1‡4پ1„2پ1†9 پ1„2پ1„3پ1„0پ1‡4پ1„2 پ1ƒ9پ1†8پ1†9پ1‡2پ1…4پ1‡2پ1…7 پ1ƒ9پ1†8پ1„4پ1„7پ1‡4پ1„7

الـبشمهندز 28-06-2015 01:17 PM

ايييييييييييييييييييييييييه كانت اياام .. سوده =d


جميع الأوقات بتوقيت GMT +2. الساعة الآن 07:42 AM.

Powered by vBulletin® Version 3.8.11
Copyright ©2000 - 2020, Jelsoft Enterprises Ltd.